प्रेरितां केरां कम्मां 14

इकुनियुस नगरे मां पौलुस ते बरनबास

1इकुनियुम नगरे मां पौलुस ते बरनबास दूईये ज़ने प्राथना घरे मां जे, ते एरू भाषण केरने लगे ते बड़े यहूदी लोकेईं ते यूनानी लोकेईं विश्वास कियो। 2पन विश्वास न केरनेबाले यहूदेईं, गैर यहूदी लोक भड़काए ते तैनेईं विश्वासी मैन्हु विश्वासे करां दूर किये, ते तैन केरे खलाफ क्रोध पैदा कियो। 3ते पौलुस ते बरनबास काई दिहाड़े तैड़ी राए, ते प्रभुएरी भरोसे पुड़ दिलेरी सेइं गल्‍लां केरते थिये, ते प्रभु तैन केरे ज़िरिये चमत्कार ते निशान करेइतां अपने अनुग्रहेरे वचने सच़्च़ो साबत केरतो राव। 4पन नगरेरे लोकन एप्पू मांमेइं फूट भोइजेइ, किछ लोक यहूदी केरे पासे भोए, ते किछ प्रेरितां केरे पासे भोए। 5यहूदी ते गैर यहूदी अपने प्रधान्न सेइं मिलतां तैन बेइज़त केरने ते तै घोड़ेईं बाने लगे। 6त तैन एस गल्‍लरो पतो लगो, तैना तैट्ठां नेश्शी जे, ते लुकाउनिया इलाकेरे नगरन लुस्त्रा ते दिरबे मां ते तैसेरे आसे-पासेरे इलाके मां च़ले जे। 7ते तैड़ी तैना खुशखबरी शुनाने लगे।

लुस्त्रा नगरे ते दिरबे मां अक लैंगड़ो बझ़ानो

8लुस्त्रा नगरे मां अक मैन्हु बिशोरो थियो, ज़ै पव्वां केरो कमज़ोर थियो, तै ज़र्मनेरो टोन्टो थियो, ते तै कधी न थियो च़लोरो। 9तै पौलुसेरी गल्‍लां ध्याने सेइं शुन्ने लग्गोरो थियो, पौलुसे तैसेरे पासे ध्याने सेइं तक्‍कू त ज़ांनू, कि एसमां एत्रो विश्वासे कि ऐह बेज़्झ़ोइ सकते। 10ते पौलुसे तैस मैन्हु ज़ोरे सेइं ज़ोवं, “अपने पव्वन पुड़ खड़ो भो।” ते तै तैखने खड़ो भोव, ते च़लने लगो। 11ज़ैखन लोकेईं पौलुसेरू एन कम हेरू त लुकाउनिया भाषाई मां ज़ोरे सेइं ज़ोने लगे, “कि देबतो असन कां मैन्हेरो शक्ली मां एवरोए।” 12ते तैन लोकेईं बरनबासेरू नवं ज्यूस रख्खू, (ज़ैन यूनानी देबतेरू नवं थियूं), ते पौलुसेरू हिर्मेस नवं रख्खू, (ज़ै होरि देबतां केरो बिस्तार देनेबालन मरां प्रधान थियो) किजोकि तै गल्‍लां केरने मां जादे माहिर थियो। 13ते ज्यूस देबतेरू मन्दर नगरेरे सामने थियूं, तैसेरो पुजारी दांत ते फूड़ू केरे हार एन्हतां नगरेरे फाटके पुड़ पुज़्ज़ो, किजोकि तैना लोक चाते थिये कि असां प्रेरितां केरे लेई बलिदान केरन।

14ज़ैखन बरनबास ते पौलुस प्रेरितेईं एन शुनू, त तैना दुखी भोए, ते तैनेईं अपना लिगड़ां छ़िन्दां ते मैन्हन मां जे ते ज़ोरे-ज़ोरे ज़ोने लगे, 15“लोकव तुस एन कुन केरने लगोरेथ? असां भी तुश्शे ज़ेरे दुख सुख झ़ैल्‍लने बाले मैन्हु आम, ते तुसन खुशखबरी शुनातम, ताके तुस एना फुज़ूल चीज़ां शैरतां ज़ींते परमेशरेरे पासे एज्जथ, ज़ैनी धरती त कने अम्बर ते समुन्दरे ते ज़ैन किछ भी एसमां आहे तैनी बनेवरूए। 16तैनी बीतोरे वक्ते मां सैरी कौमन अपने-अपने बत्तां च़लने दित्तू। 17फिरी भी तैनी अपनो आप बेगवाह न बनाव, पन अपनि भलियाई हिरानेरे लेई तैनी अम्बरेरां झ़ड़ी दित्ती, ते फसलां केरे लेई मौसम बनाए, ताके तुसन हछु अन भोए ते तुश्शे दिल खुशी सेइं भरे।” 18एना गल्‍लां ज़ोइतां तैनेईं लोक बेड़ि मुश्किली सेइं रोके, कि एना इश्शे लेई बलिदान न देन।

19तैखन किछ यहूदी अन्ताकिया नगरे ते इकुनियुम नगरे मरां आए, ते तैनेईं लोक अपने पासे केरतां पौलुसे पुड़ पथराव केरने लगे, ते तै मुओरो बुझ़तां नगर करां बेइरोवं घसीटतां नियो। 20ज़ैखन चेले तैड़ी पुज़्ज़े त तैनेईं पौलुस घरे मां आनो ते तै खड़ो उठो ते वापस नगरे मां अव, ते होरसां बरनबासे सेइं साथी दिरबे नगरे जो च़लो जेव।

सीरियारे अन्ताकिया नगरे जो वापस एजनू

21पौलुस ते बरनबासे तैस नगरे मां खुशखबरी शुनाई ते बड़े चेले बनाए, ते तैसेरां बाद तैना लुस्त्रा ते इकुनियुम नगरे ते अन्ताकिया नगरे मां वापस आए। 22तैना हर एक्‍की नगरेरे चेलां केरे मन मज़बूत केरते ते ई शिक्षा देते थिये कि विश्वासे मां बनोरे राथ, ते इन ज़ोते थिये, “कि असेईं बड़ो दुख झ़ेलतां परमेशरेरे राज़्ज़े मां दाखल भोनूए।” 23ते तैनेईं हर कलीसियाई मां तैन केरे बुज़ुर्ग ठहराए, ते बरतां रेखतां प्राथना की, ते तैना प्रभुएरे सुपुर्द किये, ज़ैस पुड़ तैनेईं विश्वास कियोरो थियो।

24फिरी तैना पिसिदिया इलाके मरां निस्तां पंफूलिया इलाके मां पुज़े। 25ते पिरगा नगरे मां वचन शुनेइतां त अत्तलिया नगरे मां आए। 26तैट्ठां ज़िहाज़े मां च़ेढ़तां वापस अन्ताकिया नगरे मां आए, ते तैड़ी तैनेईं तैस सेवारे लेई ज़ै तैनेईं पूरी कियोरी थी, परमेशरेरे अनुग्रहेरे सुपुर्द कियोरी थी। 27अन्ताकिया नगरे मां पुज़तां तैनेईं कलीसियारे लोक अकोट्ठे किये, कि परमेशरे असन सेइं साथी भोइतां केरहां-केरहां बडां कम्मां कियां! ते गैर कौमां केरे लेई बत खोल्‍ली, कि तैना भी यीशु पुड़ विश्वास केरन। 28ते तैना चेलन सेइं साथी बड़े दिहाड़न तगर राए।

Currently Selected:

प्रेरितां केरां कम्मां 14: BHDNT

Highlight

Copy

Compare