2 कुरिन्थियों 9

मसीही सैथी केरे लेई मद्दत

1हुनी तैस सेवारे बारे मां ज़ै यरूशलेमेरे विश्वासी लोकन जो दान देनेरे बारे मां की गातीए, मीं तुसन जो लिखनू ज़रूरीए नईं। 2किजोकि अवं तुश्शे मनेरे तियैरारे बारे मां ज़ानताईं, ज़ेसेरे वजाई सेइं अवं तुश्शे बारे मां मकिदुनिया इलाकेरे विश्वासी लोकां केरे सामने घमण्ड हिराताईं, कि तुस अखाया इलाकेरे लोक एक्‍की साले करां तियार भोवरेथ, ते तुश्शे जोशे होरन भी जोश बनेवरोए। 3पन मीं तीतुस ते दूई होरे ढ्ला तुसन कां एल्हेरेलेइ भेज़े, कि असेईं ज़ैन घमण्ड तुश्शे बारे मां हिराव, तैन इस गल्‍ली मां बेफैइदे न भोए; पन ज़ेन्च़रे मीं ज़ोवं; तेन्च़रे तुस यरूशलेम नगरेरे विश्वासी लोकां केरे लेई दान देने जो तियार राथ। 4एरू न भोए, कि अगर किछ मकिदुनिया इलाकेरे विश्वासी लोक मीं सेइं साथी एज्जन, ते तुश्शू दान तियार न भोए, त अस तुसन पुड़ भरोसेरे केरनेरे वजाई छिथोम, पन तुस असन करां भी जादे छिथोले। 5एल्हेरेलेइ मीं विश्वासी ढ्लान सेइं ई बिनती केरनि ज़रूरी समझ़ी, कि तैना पेइले तुसन कां गान, ते तुश्शे खुल्‍ले दिले सेइं दान देनेरे बारे मां, ज़ेसेरे बारे मां पेइलो वाधो कियोरो थियो, तियार केरतां रखा, कि इन दबावे सेइं नईं बल्के इच्छाई सेइं भोए।

दान केन्च़रे देनू

6पन गल त ईए, कि ज़ै थोड़ू बेते तै कटेलो भी थोड़ू; ते ज़ै हछु बेते तै हछु कटेलो। 7हर अक मैन्हु ज़ेन्च़रे मने मां थापेरू भोते तेन्च़रे दान दे, न कुड़-कुड़ केरतां, ते न दबावे सेइं, किजोकि परमेशर खुशी सेइं देनेबालन पुड़ खुश भोते।

8परमेशर ज़ैन किछ तुसन ज़रूरते तैसेरो अनुग्रह देइ बटते, ज़ैस सेइं हर गल्‍ली मां ते हर वक्त, सब किछ, ज़ेसेरी तुसन ज़रूरत भोए, तुसन कां राए, ते हर एक्‍की रोड़े कम्मेरे लेई तुसन कां बड़ू किछ भोए। 9ज़ेन्च़रे पवित्रशास्त्रे मां लिखेरूए,

“परमेशर ज़ैन ज़रूरते तैन हछु देते,

ज़ैन तै केरते तैन ठीके ते तैन हमेशा रालू।”

10आखरी, ज़ै बेनेबाले बीज़, ते खानेरे लेई रोट्टी देते, तै तुसन बीज़ देलो, ते तैस सेइं फलवन्त केरेलो, ते तुश्शे धार्मिकतारो फल बधालो। 11तुसन हर गल्‍ली मां बरकत मैल्हेली ज़ैस सेइं तुस जादे दान देनेरे काबल बनेले, ते ज़ैखन अस तुश्शे हछ्छे दाने तैन कां नेमेले ज़ैन ज़रूरते त तैना लोक परमेशरेरू शुक्र केरेले। 12किजोकि सेवारे पूरे केरने सेइं, न सिर्फ परमेशरेरे लोकां केरो घाटो पूरो भोते, पन लोकां केरे तरफां परमेशरेरू बड़ू शुक्र भोते। 13किजोकि होरि लोकन दान देनेरी मद्दतरी सेवारू सबूत कबूल केरतां तैना परमेशरेरी महिमा बांदी केरतन, कि तुस मसीहेरी खुशखबरी मेनतां तैसेरे अधीन रहतथ, ते गरीब विश्वासी लोकां केरि, ते सेब्भी केरि मद्दत केरने मां हछु देनू बांदू केरतथ। 14ते तैना तुश्शे लेई परमेशरे कां प्राथना केरेले; तैना तुसन सेइं प्यार केरतन, किजोकि परमेशरे तुसन पुड़ अनुग्रह कियोरोए। 15परमेशरे तैसेरे तैस दानेरे लेई ज़ैन समझ़ी करां बेइर शुक्र भोए।

Currently Selected:

2 कुरिन्थियों 9: BHDNT

Highlight

Copy

Compare