1 कुरिन्थियों 9

प्रेरितां केरो अधिकार ते फर्ज़

1अवं ज़ैन केरनू चाताईं तैन केरनेरे लेई आज़ाद आई। अवं अक प्रेरित आईं, मीं प्रभु यीशु लाहोरोए ज़ै इश्शो प्रभुए, ज़ैन कम मीं प्रभुएरे लेई कियूं तुस तैसेरो नतीजोथ। 2अगर होरे लोक इस गल्‍ली न मन्न कि अवं प्रभु यीशुएरो प्रेरित आईं, त ढ्लाव तुसेईं त लोड़े मन्नोरू। किजोकि मीं ऐह तुसन कां खुशखबरी आनोरी थी। तुश्शो प्रभु विश्वास इस गल्‍ली साफ केरते कि अवं हकीकति मां तैसेरो प्रेरित आईं।

3ज़ैना लोक मेरे प्रेरित भोनेरे अधिकारे पुड़ सवाल पुछ़तन, तैन केरे लेई मेरो ईए फैसलोए। 4कुन असन खाने पीनेरू हक नईं? 5कुन असन अधिकार नईं, कि कोन्ची मसीही कुआन्शी सेइं ड्लाह बनाम, ज़ेन्च़रे होरे प्रेरित, ते प्रभुएरे ढ्ला ते कैफा (यानी पतरस) केरतन? 6या सिर्फ मीं ते बरनबासे ज़िन्दगी ज़ींनेरे लेई कम कियोरू लोड़े? 7को ज़ेरो फौजी अपनु खेइतां जंग केरते? या कौन बाग लेइतां तैसेरो फल न खाए? कौन भैड्डां रेखतां तैन केरू दुद्ध न पीए?

8अवं इना गल्‍लां मैन्हु केरि रीति पुड़ नईं लगोरो ज़ोने, मूसेरो कानून भी इन्ने ज़ोते। 9एल्हेरेलेइ मूसेरो कानून ज़ोते, तैस मां इन लिखेरूए, “तुस खल्‍ले मां च़लते बार दांतेरू आशी न बेन्दथ।” कुन परमेशर दांतां केरि फिक्र केरते? नईं। 10या खास केरतां इश्शे बारे मां लिखोरू, हाँ इश्शे लेई लिखेरूए, किजोकि ठीके कि जोट्लने बालो उमीदी सेइं जोट्ले, उपाने बालो उमीदी सेइं उपाए। 11असेईं तुसन परमेशरेरो सन्देश शुनेवरोए। ज़ेन्च़रे लोक बीज़ बेतन तेन्च़रे असेईं तुसन मां परमेशरेरे वचनेरू बीज़ बेव। एल्हेरेलेइ तुश्शो फर्ज़े कि इश्शे रोज़ेरो खर्च़ो असन देथ। 12हालांकि कि तुसेईं होरि लोकां केरि मद्दत की, ज़ैनेईं तुसन प्रचार कियो, त मेरू त कने बरनबासेरू जादे हक्‍के। किजोकि अस तुश्शे पेइले प्रेरित आम, फिर भी असेईं अपने ज़रूरतरे चीज़ां केरे लेई ज़बरदस्ती न की, तैसेरे बदले अपने मेर्ज़ी सेइं सब किछ झ़ैल्‍लू कि मसीहेरे खुशखेबरी पुड़ विश्वास केरनेरे लेई केन्च़रे लेई रुकावट बनम।

13कुन तुस न ज़ानथ कि ज़ै पवित्र चीज़ां केरि सेवा केरते; तै मन्दरे मरां खाते; ते ज़ै बलिदान केरनेरे ठारारी सेवा केरते; तै बलिदान केरनेरे ठारी सेइं शामल भोते। 14एन्च़रे प्रभुए ठहराव, कि ज़ैना लोक खुशखबरी शुनान, तैन केरि ज़िन्दगरो गुज़ारो भी तैन लोकन करां लोड़े भोवरो ज़ैन खुशखबरी शुन्तन।

15पन मीं इन अधिकारन मरां कोई भी इस्तेमाल न कियो। ते मीं एना गल्‍लां एल्हेरेलेइ नईं लिखोरी, कि मेरे लेई एरू कियूं गाए। बिलकुल नईं! किजोकि इस करां त मेरू मरनू रोड़ूए; कि कोई मेरू घमण्ड बेफैइदू ठहराए। 16ते अगर अवं खुशखबरी शुनेई, त मेरू किछ घमण्ड नईं, किजोकि इन त मेरे लेई ज़रूरीए, ते अगर अवं खुशखबरी न शुनेई, त मीं पुड़ अफ़सोस। 17किजोकि अगर अवं इन कम अपने मेर्ज़ी सेइं केरताईं, त मीं इनाम मैल्हेलू। पन अगर इन मेरी मेर्ज़ी सेइं नईं, पन अगर परमेशरे ई ज़िमेदारी दित्तोरीए, त अवं कोन्ची इनामेरी उमीद न रेखी बेटि। 18ते फिरी मेरू कुन इनामे? कि खुशखबरी शुनाने मां मसीहेरी खुशखबरी मुफ्त बेंटी; इड़ी तगर कि ज़ैन खुशखेबरी मां मेरू हक्‍के, तैसेरो पूरो इस्तेमाल केरि।

19किजोकि सेब्भन करां आज़ाद भोने पुड़ भी मीं अपनो आप सेब्भी केरो गुलाम बनाव; कि जादे करां जादे लोकन खिचतां ऐनीं। 20अवं यहूदी केरे लेई यहूदी बनो ताके यहूदन खिचतां मसीह मां ऐनीं, ज़ैना लोक यहूदी केरे कानूनेरे अधीन्न तैन केरे लेई कानूनेरे अधीन न भोने पुड़ भी अधीन भोव, कि तैन ज़ैना कानूनेरे अधीन्न तैन खिचतां मसीह मां ऐनीं। 21ज़ैना कानूनेरे अधीन नईं तैन केरे लेई अवं (पन अवं ज़ानताईं कि अवं परमेशरेरे कानूने करां हीन नईं, किजोकि अवं मसीहेरे कानूनेरे अधीन आईं) तेरहो बनो, कि तैन खिचतां मसीह कां ऐनीं। 22अवं विश्वासे मां कमज़ोरां केरे लेई कमज़ोर बनो, ताके कमज़ोरन खिचतां मसीह मां ऐनीं, अवं सेब्भी मैन्हु केरे लेई सब किछ बनो, कि कोन्ची न कोन्ची तरीके सेइं लोकन मुक्ति मैल्ही। 23ते अवं सब किछ मसीहेरे खुशखेबरारे लेई केरताईं, कि अवं होरन सेइं साथी तैन बरकतां केरो हिसेदार भोईं।

मसीही दौड़

24कुन तुस न ज़ानथ, कि दौड़ी मां त सब दौड़तन, पन इनाम अक्‍के नेते, तुस तेरहु दौड़ा, कि ज़ींतथ। 25ते हर अक पलवान हर किसमेरो परेज़ रखते, तै त अक शुकने बाले ताजेरे लेई इन सब किछ केरते, पन अस त तैस ताजेरे लेई केरतम ज़ैन कधी नईं शुकनू। 26एल्हेरेलेइ अवं एन्च़रे दौड़ताईं, पन बगैर मकसदे नईं, अवं भी एन्च़रे मुकन सेइं लड़ताई, पन तैसेरो ज़ेरो नईं ज़ै हवाई मां लड़ते। 27पन अवं अपने जानरी खुवैइशन मारताईं, ते कैबू मां केरताईं; एरू न भोए कि होरन प्रचार केरि, ते मीं इनाम न मैल्हेले।

Currently Selected:

1 कुरिन्थियों 9: BHDNT

Highlight

Copy

Compare