भजन संहिता 89
89
राष्ट्रीय मुसीबत कै बखत स्तुतिगान
एतान एज्रावंशी का मश्कील
1मै यहोवा की सारी करुणा खात्तर सदा गान्दा रहूँगा;
मै तेरी सच्चाई पीढ़ी तै पीढ़ी तक बतान्दा रहूँगा।
2क्यूँके मन्नै कह्या सै, “तेरी करुणा सदा बणी रहवैगी,
तू सुर्ग म्ह अपणी सच्चाई नै स्थिर राक्खैगा।”
3तन्नै कह्या, “मन्नै अपणे चुणे होए तै करार करया सै,
मन्नै अपणे दास दाऊद तै कसम खाई सै,
4‘मै तेरे खानदान नै सदा बणाए राक्खूँगा;
अर तेरी राजगद्दी नै पीढ़ी-पीढ़ी तक बणाए राक्खूँगा’।”
5हे यहोवा, सुर्ग म्ह तेरे अदभुत काम्मां की,
अर पवित्रां की सभा म्ह तेरी सच्चाई की बड़ाई होवैगी।
6क्यूँके आकाशमण्डल म्ह यहोवा कै बराबर कौण हो सकै सै?
ताकतवर के बेट्याँ म्ह तै कौण सै जिसके गैल यहोवा की बराबरी करी जावैगी?
7परमेसवर पवित्रां की सभा म्ह घणा बड़ाई के योग्य,
अर अपणे चारु ओड़ सारे रहण आळयां तै घणा भययोग्य सै।
8हे सेनाओं के परमेसवर यहोवा,
हे यहोवा, तेरे बराबर कौण सामर्थी सै?
तेरी सच्चाई तो तेरै च्यांरु ओड़ सै!
9समुन्दर के घमण्ड नै तू ए तोड़ै सै;
जिब उसके तरंग उठ्ठै सै, फेर तू उन ताहीं शान्त कर देवै सै।
10तन्नै रहब#89:10 रहब यो उस बखत की कहाणियाँ म्ह बोल्या जाण आळा एक समुन्दरी जीव था अर वो एक बुरे माणसां का एक प्रतीक था ताहीं घात करै होया की तरियां कुचळ दिया,
अर अपणे दुश्मनां नै अपणे बाजूवां के जोर तै तित्तर-बितर करया सै।
11अकास तेरा सै, धरती भी तेरी सै;
दुनिया अर जो कुछ उस म्ह सै, वो तन्नै ए बणाया सै।
12उत्तर अर दक्षिण ताहीं तन्नै ए रच्या;
ताबोर#89:12 ताबोर यो एक 555 मीटर ऊँच्चा पहाड़ था जो गलील राज्य के दक्षिणी छोर म्ह था अर हेर्मोन#89:12 हेर्मोन यो एक 2,750 मीटर ऊँच्चा पहाड़ था जो गलीली झील तै 75 किलोमीटर की दूरी पै था तेरे नाम का जयजयकार करै सै।
13तेरी भुजा ताकतवर सै;
तेरा हाथ शक्तिमान अर तेरा सोळा हाथ भारी सै।
14तेरे सिंहासन का मूल, धर्म अर न्याय सै;
करुणा अर सच्चाई तेरा आग्गै-आग्गै चाल्लै सै।
15कितना धन्य सै वो समाज जो खुशी की ललकार#89:15 खुशी की ललकार परमेसवर की आराधना म्ह स्तुति करण की आवाज नै पिच्छाणै सै;
हे यहोवा, वे माणस तेरे तेज की रोशनी म्ह चाल्लै सै,
16वे तेरे नाम के कारण दिन भर मगन रहवै सै,
अर तेरे धर्म कै कारण महान हो ज्या सै।
17क्यूँके तू उनके ताकत की शोभा सै,
अर अपणी प्रसन्नता तै म्हारे सींग#89:17 सींग ताकत नै ऊँच्चा करैगा#89:17 म्हारे सींग नै ऊँच्चा करैगा म्हारी ताकत नै बढ़ावैगा।
18क्यूँके म्हारी ढाल यहोवा की ओड़ तै सै,
म्हारा राजा इस्राएल के पवित्र की ओड़ तै सै।
19एक बखत तन्नै अपणे भक्त तै दर्शन देकै बात करी;
अर कह्या, “मन्नै मदद करण की जिम्मेदारी एक वीर तै दे राक्खी सै,
अर प्रजा म्ह तै एक ताहीं चुण कै बढ़ाया सै।
20मन्नै अपणे दास दाऊद ताहीं लेकै,
अपणे पवित्र तेल तै उसका अभिषेक करया सै।
21मेरा हाथ उसकै गैल बण्या रहवैगा,
अर मेरी बाजू उसनै मजबूत राक्खैगी।
22दुश्मन उस ताहीं तंग करण न्ही पावैगा,
अर ना कठोर माणस उसनै दुख देण पावैगा।
23मै उसके दुश्मनां नै उसकै स्याम्ही तै नाश करुँगा,
अर उसके बैरियाँ पै मुसीबत गेरूँगा।
24पर मेरी सच्चाई अर करुणा उसपै बणी रहवैगी,
अर मेरा नाम कै कारण उसका सींग ऊँच्चा हो जावैगा।
25मै समुन्दर नै उसके हाथ कै नीच्चै
अर महानदा नै उसके सोळे हाथ कै नीच्चै कर दियुँगा।
26वो मेरे ताहीं पुकार कै कहवैगा, ‘तू मेरा पिता सै,
मेरा परमेसवर अर मेरे उद्धार की चट्टान सै।’
27फेर मै उसनै अपणा जेठ्ठा,
अर धरती के राजायां पै प्रधान बणाऊँगा।
28मै अपणी दया उसपै सदा बणाए राखूँगा,
अर मेरा करार उसकै खात्तर अटल रहवैगा।
29मै उसके वंश नै सदा बणाए राखूँगा,
अर उसकी राजगद्दी सुर्ग की तरियां सदा बणी रहवैगी।
30जै उसके वंश के माणस मेरे नियम-कायदे नै छोड्डै
अर मेरे नियमां के मुताबिक ना चाल्ले,
31जै वे मेरी विधियाँ का उलंघण करै,
अर मेरे हुकमां नै ना मान्नै,
32तो मै उनके अपराध्धां की सजा सोंटें तै,
अर उनके अधर्म का दण्ड कोड़े तै दियुँगा।
33फेर भी मै अपणी दया उसपै तै ना हटाऊँगा,
अर ना सच्चाई त्याग कै झूठ्ठा ठहरूँगा।
34मै अपणे करार नै न्ही तोड़ूँगा,
अर जो मेरे मुँह तै लिकड़ चुक्या सै, उस ताहीं न्ही बदलूँगा।
35एक बार मै अपणी पवित्रता की कसम खा चुक्या सूं;
मै दाऊद नै कदे धोक्खा न्ही दियुँगा।
36उसका वंश सदा रहवैगा,
अर उसकी राजगद्दी सूरज की तरियां मेरै स्याम्ही बणी रहवैगी।
37वो चाँद की तरियां,
अर आकाशमण्डल के बिश्वास लायक गवाह की तरियां सदा बण्या रहवैगा।”
38फेर भी तन्नै अपणे अभिषिक्त ताहीं छोड़ दिया, अर जमाए छोड़ दिया,
अर उसपै घणा छो करया सै।
39तन्नै अपणे दास कै गैल करे होए करार ताहीं छोड़ दिया,
अर उसके मुकुट ताहीं धरती पै गिराकै अशुद्ध करया सै।
40तन्नै उसके सारे बाड़याँ ताहीं तोड़ दिया सै,
अर उसके गढ़ां ताहीं उजाड़ दिया सै।
41सारे मुसाफिर उसनै लूट लेवै सै,
अर उसके पड़ोसियाँ तै उसकी बदनामी होवै सै।
42तन्नै उसके बिरोधियाँ ताहीं हावी करया;
अर उसके सारे दुश्मनां ताहीं खुश करया सै।
43फेर तू उसकी तलवार की धार नै मोड़ देवै सै,
अर युद्ध म्ह उसके पैर जमण न्ही देन्दा।
44तन्नै उसका तेज#89:44 तेज राजदंड ले लिया सै,
अर उसके सिंहासन ताहीं धरती पै पटक दिया सै।
45तन्नै उसकी जवान्नी ताहीं घटाया,
अर उस ताहीं शर्मिन्दगी तै ढँक दिया सै।
46हे यहोवा, तू कद तक लगातार मुँह फेरे रहवैगा,
तेरी जळजळाहट कद तक आग की तरियां भड़की रहवैगी।
47मन्नै याद कर, के मै किसा अभागा सूं,
तन्नै सारे माणसां ताहीं क्यूँ खामखा बणाया सै?
48कौण आदमी सदा अमर रहवैगा?
के कोए अपणी जान नै अधोलोक तै बचा सकैगा?
49हे प्रभु तेरी पुराणे बखत की दया कित्त गई,
जिसके खात्तर तन्नै अपणी सच्चाई की कसम दाऊद तै खाई थी?
50हे प्रभु अपणे दास्सां की बदनामी की सुधि ले;
मै तो सारी ताकतवर जात्तां का बोझ लिए रहूँ सूं।
51तेरे उन दुश्मनां नै तो हे यहोवा,
तेरे अभिषिक्त कै पाच्छै पड़कै उसका मजाक उड़ाया सै।
52यहोवा सदा धन्य रहवैगा!
आमीन फेर आमीन।
Currently Selected:
भजन संहिता 89: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
