भजन संहिता 68
68
इस्राएल की जीत का गीत
प्रधान बजाण आळे खात्तर दाऊद का भजन, गीत
1परमेसवर उठ्ठै, उसके दुश्मन तित्तर-बितर हों;
अर उसके बैरी उसके स्याम्ही तै भाज जावै।
2जिस तरियां धुम्मा उड़ जावै सै, उस्से तरियां ए तू उन ताहीं उड़ा दे;
जिस तरियां मोम आग की आँच तै पिघळ जावै सै,
उसे तरियां ए दुष्ट लोग परमेसवर की मौजूदगी तै नाश हों।
3पर धर्मी खुश हों; वे परमेसवर के स्याम्ही प्रफुल्लित हों;
वे आनन्द म्ह मगन हों!
4परमेसवर का गीत गाओ, उसके नाम का भजन गाओ;
जो निर्जल देशां म्ह#68:4 निर्जल देशां म्ह बादळां पै सवार होकै चाल्लै सै,
उस खात्तर सड़क बणाओ;
उसका नाम यहोवा सै, इस खात्तर थम उसके स्याम्ही प्रफुल्लित हो!
5परमेसवर अपणे पवित्र धाम म्ह,
अनाथ्थां का पिता अर विधवाओं का रुखाळी#68:5 रुखाळी न्यायी सै।
6परमेसवर अनाथ्थां का घर बसावै सै;
अर बन्दियाँ नै छुड़ाकै सम्पन्न करै सै;
पर विद्रोहियाँ नै सूक्खी धरती पै रहणा पड़ै सै।
7हे परमेसवर, जिब तू अपणी प्रजा कै आग्गै-आग्गै चाल्या था,
जिब तू निर्जल धरती म्ह सेना समेत चाल्या,
8फेर धरती काँप उठी,
अर अकास भी परमेसवर के स्याम्ही टपकण लाग्या,
ओड़ै सीनै पर्वत परमेसवर, हाँ इस्राएल के परमेसवर कै स्याम्ही काँप उठ्या।
9हे परमेसवर, तन्नै भोत घणी बारिस करी;
तेरा अपणा भाग तो भोत सूखा था, पर तन्नै उस ताहीं हरा-भरा करया सै;
10तेरा झुण्ड उस म्ह बसण लाग्या;
हे परमेसवर तन्नै अपणी भलाई तै दीन जन खात्तर तैयारी करी सै।
11प्रभु हुकम देवै सै,
फेर खुशखबरी सुणाण आळियाँ की बड़ी सेना हो जावै सै।
12अपणी-अपणी सेना समेत राजा भागे जावै सै,
अर घरबारण लूट नै बाँट लेवै सै।
13के थम भेड्डां के बाड़े कै बीच लेट जाओगे?
अर इसी कबूतरी की तरियां होगे जिसके पंख चाँदी तै
अर जिसके पर पीळे सोन्ने तै मढ़े होए हों?
14जिब सर्वशक्तिमान नै उस म्ह राजाओं ताहीं तित्तर-बितर करया,
फेर जणु सल्मोन पर्वत पै बर्फ पड़ी।
15बाशान का पहाड़ परमेसवर का पहाड़ सै;
बाशान का पहाड़ भोत ऊँच्ची चोट्टी आळा पहाड़ सै।
16पर हे ऊँच्ची चोट्टी आळे पाहाड़ों, थम क्यूँ उस पहाड़ नै घूरो हो,
जिस ताहीं परमेसवर नै अपणे रहण खात्तर चाह्या सै,
अर जित्त यहोवा सदा वास करे रहवैगा?
17परमेसवर के रथ बीस हजार, बलके हजारों हजार सै;
प्रभु उनकै बीच म्ह सै,
जिस तरियां वो सीनै पहाड़ तै अपणे पवित्र जगहां म्ह सै।
18तू ऊँच्चे पै चढ़ा, तू लोग्गां नै गुलाम्मी म्ह लेग्या;
तन्नै माणसां तै, बलके हठीले माणसां तै भी भेंट ली,
जिसतै यहोवा परमेसवर उन म्ह वास करै।
19धन्य सै प्रभु, जो हर रोज म्हारा बोझ ठावै सै;
वोए म्हारा उद्धारकर्ता परमेसवर सै।
20वोए म्हारे खात्तर बचाण आळा परमेसवर ठैहरा;
यहोवा प्रभु मौत तै भी बचावै सै।
21पक्का परमेसवर अपणे दुश्मनां के सिर पै,
अर जो अधर्म के राह पै चालदा रहवै सै,
उसके बाळां तै भरी खोपड़ी पै मार-मार के उसनै चूर करैगा।
22प्रभु नै कह्या सै, “मै उननै बाशान#68:22 बाशान देश का नाम देश तै लिकाड़ लाऊँगा,
मै उन ताहीं ढुंघे समुन्दर के तळै तै भी फेर ले आऊँगा,
23ताके तू अपणे पायां नै लहू म्ह डुबोवै,
अर तेरे दुश्मन तेरे कुत्याँ का भाग ठहरें।”
24हे परमेसवर तेरी शोभायात्रा देक्खी गई,
मेरे परमेसवर, अर मेरे राजा की शोभायात्रा पवित्र स्थान म्ह जान्दी होई दिखाई दी;
25गाणआळे आग्गै-आग्गै अर तारआळे बाज्यां के बजाण आळे पाच्छै-पाच्छै गए,
चारु ओड़ कुमारियाँ डफ बजावै थी।
26सभाओं म्ह परमेसवर का,
हे इस्राएल के चोए तै लिकड़े होए माणसों,
प्रभु का धन्यवाद करो।
27पैहला बिन्यामीन जो छोट्टा गोत्र सै,
फेर यहूदा के हाकिम अर उसकी सभा
अर जबूलून अर नप्ताली के हाकिम सै।
28तेरे परमेसवर नै तेरी सामर्थ ताहीं बणाया सै,#68:28 तेरी सामर्थ ताहीं बणाया सै, हे परमेसवर तेरी सामर्थ दिखा
हे परमेसवर, अपणी सामर्थ्य नै म्हारे पै जाहिर कर, जिसा तन्नै पैहले जाहिर करी थी।
29तेरे मन्दर के कारण जो यरुशलेम म्ह सै,
राजा तेरे खात्तर भेंट ले आवैंगे।
30नरकटां म्ह रहण आळे जंगळी-पशुआं नै,
खागड़ां के झुण्ड नै अर देश-देश के बाछड़ां नै झिड़क दे।
वे चाँदी के टुकड़े लिये होए प्रणाम करैगें;
जो माणस युद्ध तै खुश रहवै सै, उन ताहीं उसनै तित्तर-बितर करया सै।
31मिस्र तै अधिकारी आवैंगे;
कूश देश के लोग अपणे हाथ्थां नै परमेसवर की ओड़ फुर्ती तै फैलावैंगे।
32हे धरती पै के राज्य-राज्य के लोगों परमेसवर का गीत गाओ;
प्रभु का भजन गाओ,
33जो सब तै ऊँच्चे सनातन सुर्ग म्ह सवार होकै चाल्लै सै;
देक्खो वो अपणी वाणी सुणावै सै, वा गम्भीर वाणी शक्तिशाली सै।
34परमेसवर की सामर्थ्य की बड़ाई करो,
उसका प्रताप इस्राएल पर छाया होया सै,
अर उसकी सामर्थ्य आकाशमण्डल म्ह सै।
35हे परमेसवर, तू अपणे पवित्रस्थानां म्ह अदभुत सै,
इस्राएल का परमेसवर ए अपणी प्रजा नै सामर्थ्य अर शक्ति का देण आळा सै।
परमेसवर धन्य सै।
Currently Selected:
भजन संहिता 68: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
