भजन संहिता 33
33
परमेसवर की बड़ाई का गीत
1हे धर्मियों यहोवा कै कारण खुशी कै गैल जयजयकार करो।
क्यूँके धर्मी माणसां नै स्तुति करणा शोभा देवै सै।
2वीणा बजा-बजाकै यहोवा का धन्यवाद करो,
दस तार आळी सारंगी बजा-बजाकै
उसका भजन गाओ।
3उसकै खात्तर नया गीत गाओ,
जयजयकार कै गैल आच्छी ढाळ बजाओ।
4क्यूँके यहोवा का वचन सीध्धा सै;
अर उसका सारा काम सच्चाई तै होवै सै।
5वो धर्म अर न्याय तै प्यार राक्खै सै;
यहोवा की करुणा तै धरती भरपूर सै।
6अकासमण्डल यहोवा के वचन तै,
अर उसके सारे तारागण उसके मुँह की
साँस तै बणे।
7वो समुन्दर का पाणी ढेर की तरियां कठ्ठा करै सै;
वो गहरे सागर नै अपणे भण्डार म्ह राक्खै सै।
8सारी धरती के माणस यहोवा तै डरै,
दुनिया म्ह सारे रहण आळे उसका भय मान्नै!
9क्यूँके जिब उसनै कह्या, तब होग्या;
जिब उसनै हुक्म दिया,
तब सच म्ह उसाए होग्या।
10यहोवा जात्ति-जात्ति की तरकीब नै
बेकार कर देवै सै,
वो देश-देश के माणसां की कल्पना
नै नाकामयाब करै सै।
11यहोवा की तरकीब सदा टिक्यी रहवैगी,
उसके मन की कल्पना पीढ़ी तै पीढ़ी
तक बणी रहवैगी।
12कितनी धन्य सै वा जात्ति जिसका परमेसवर
यहोवा सै,
अर वो समाज जिस ताहीं उसनै अपणा निज भाग
होण खात्तर छाँट लिया हो!
13यहोवा सुर्ग तै निगांह करै सै,
वो सब माणसां नै निहारै सै;
14अपणी रहण की जगहां तै
वो धरती के सारे रहण आळयां नै देक्खै सै,
15वोए जो उन सारया के मनां नै बणावै,
अर उनके सारे काम्मां का विचार करै सै।
16कोए इसा राजा न्ही, जो
भोत घणी सेना कै कारण बच सकै;
वीर अपणी बड़ी ताकत कै कारण बच न्ही सकता।
17बच लिकड़ण खात्तर घोड़ा बेकार की आस सै,
वो अपणी बड़ी ताकत कै जरिये किसे नै
न्ही बचा सकता।
18देक्खो, यहोवा की निगांह उसके डरवैयां पै
अर उनपै जो उसकी करुणा की आस राक्खै सै
बणी रहवै सै,
19के वो उसके जी नै मौत तै बचावै,
अर अकाळ कै बखत उननै जिन्दा राक्खै।
20हम यहोवा की बाट देखदे आये सां;
वो म्हारा मददगार अर म्हारी ढाल सै।
21म्हारा मन उसके कारण आनन्दित होवैगा,
क्यूँके हमनै उसके पवित्र नाम पै भरोस्सा राख्या सै।
22हे यहोवा जिसी तेरे पै म्हारी आस सै,
उसीए तेरी करुणा भी म्हारै पै हो।
Currently Selected:
भजन संहिता 33: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
