भजन संहिता 106
106
परमेसवर खात्तर इस्राएल का अबिश्वास
1यहोवा की स्तुति करो! यहोवा का धन्यवाद करो, क्यूँके वो भला सै
अर उसकी करुणा सदा की सै!
2यहोवा के सामर्थ के काम्मां का जिक्र कौण कर सकै सै,
या उसके सारे गुणा का कौण जिक्र कर सकै सै?
3कितणे धन्य सै वे जो न्याय पै चाल्लै,
अर हर बखत धर्म के काम करै सै!
4हे यहोवा, अपणी प्रजा पै करी खुशी कै कारण मन्नै याद कर,
मेरे उद्धार खात्तर मेरी सुधि ले,
5के मै तेरे चुणे होया की भलाई देक्खूँ,
अर तेरी प्रजा की खुशी म्ह खुश हो जाऊँ;
अर तेरे अपणे हिस्से कै गैल बड़ाई करण पाऊँ।
6हमनै तो अपणे बुजुर्गां की तरियां पाप करया सै; हमनै बुरे काम करे,
हमनै दुष्टता करी सै!
7मिस्र म्ह म्हारे पूर्वजां नै तेरे अचम्भे के काम्मां पै मन न्ही लाया,
ना तेरी अपार करुणा ताहीं याद राख्या;
उननै समुन्दर कै किनारे पै, यानिके लाल समुन्दर कै किनारे पै बलवा करया।
8फेर भी उसनै अपणे नाम कै मुताबिक उनका उद्धार करया,
जिसतै वो अपणे बड़े-बड़े काम्मां नै दिखावै।
9फेर उसनै लाल समुन्दर ताहीं घुड़क्या अर वो सूख ग्या;
अर वो उननै गहरे पाणी कै बीच म्ह तै मान्नो जंगळ म्ह तै लिकाड़ लेग्या।
10उसनै उन ताहीं बैरी कै हाथ तै बचाया,
अर दुश्मनां कै हाथ तै छुड़ा लिया।
11अर उनके दुश्मन पाणी म्ह डूबगे;
उन म्ह तै एक भी ना बच्या।
12फेर उननै उसके वचनां का बिश्वास करया;
अर उसकी स्तुति गाण लाग्गे।
13पर वे तावळे उसके काम्मां नै भूलगे;
अर उसकी योजना खात्तर ना रुके।
14उननै जंगळ म्ह घणी लालसा करी
अर जंगळ बियाबान म्ह परमेसवर का इम्तिहान लिया।
15फेर उसनै उनतै मुँह मांग्या वर तो दिया,
पर उनकी जान सूखा दी।
16उननै छावणी म्ह मूसा के,
अर यहोवा के पवित्र जन हारुन कै खिलाफ म्ह जळण करी,
17धरती पाटगी अर दातान नै निगळगी,
अर अबीराम के झुण्ड नै भी निगळगी।
18अर उनके झुण्ड म्ह आग भड़क उठी;
अर दुष्ट लोग लौ तै भस्म होगे।
19उननै होरेब म्ह बाछड़ा बणाया,
अर बणाई होई मूर्ति ताहीं दण्डवत करया।
20उननै परमेसवर की महिमा, ताहीं घास खाण आळे बाछड़े की मूर्ति म्ह बदल दिया
21वे अपणे उद्धारकर्ता परमेसवर नै भूलगे,
जिसनै मिस्र म्ह बड़े-बड़े काम करे थे।
22उसनै तो हाम कै देश म्ह अचम्भे के काम
अर लाल समुन्दर कै किनारे पै खतरनाक काम करे थे।
23ज्यांतै उसनै कह्या, के मै इनका सत्यानाश कर देन्दा
जै मेरा चुण्या होया मूसा जोखिम की जगहां म्ह उन खात्तर खड्या ना होन्दा
ताके मेरी जळजळाहट नै ठण्डा करै कदे इसा ना हो के मै उननै नाश कर देऊँ।
24उननै मन भाण आळे देश ताहीं निकम्मा जाण्या,
अर उसके वचन का बिश्वास ना करया।
25वे अपणे तम्बुआं म्ह बड़बड़ाए,
अर यहोवा का कहणा न्ही मान्या।
26फेर उसनै उनकै बारै म्ह कसम खाई के मै इननै जंगळ म्ह नाश करुँगा,
27अर इनकै कुण्बा नै गैरजात्तां कै आग्गै गेर दियुँगा,
अर देश-देश म्ह तित्तर-बितर करुँगा
28वे बालपोर देवता नै पूज्जण लाग्गे अर मुर्दयां ताहीं चढ़ाए होये पशुआं का माँस खाण लाग्गे।
29इस तरियां उननै अपणे काम्मां तै उस ताहीं छो दुवाया,
अर महामारी उन म्ह आगी।
30फेर पीनहास नै उठकै न्यायदण्ड दिया,
जिसतै महामारी थमगी।
31अर यो उसके लेखे म्ह पीढ़ी तै पीढ़ी तक सदा खात्तर धर्म गिणया गया।
32उननै मरीबा कै सोता कै धोरै भी यहोवा का छो भड़काया,
अर उनकै कारण मूसा का नुकसान होया;
33क्यूँके उननै उसकी आत्मा तै बलवा करया,
फेर मूसा बिना सोच्चे बोल पड्या।
34जिन लोगां कै बारै म्ह यहोवा नै
उनतै हुकम दिया था, उसनै उन ताहीं सत्यानाश न्ही करया,
35पर वे उन्हे जात्तां तै हिलमिल ग्ये
अर उनके तौर तरीके सीख लिये;
36अर उनकी मूर्तियाँ की पूजा करण लाग्गे,
अर वे उन खात्तर फंदा बणगी।
37पर उननै अपणे बेट्टा-बेट्टी भूत-पिशाचां खात्तर बलि कर दिए;
38अर अपणे निर्दोष बेट्टे-बेटियाँ का लहू बहाया
जिन नै उन ताहीं कनान की मूर्तियाँ पै बलि करया,
ज्यांतै देश खून तै अपवित्र होग्या।
39अर वे आप अपणे काम्मां कै कारण अशुद्ध होगे,
अर अपणे काम्मां कै कारण जार भी बणगे
40फेर यहोवा का छो अपणी प्रजा पै भड़क्या,
अर उसनै अपणी निज प्रजा तै नफरत होई;
41फेर उसनै उन ताहीं गैरजात्तां कै बस म्ह कर दिया,
अर उनके बैरियाँ नै उनपै राज करया।
42उनके दुश्मनां नै उनपै अन्धेर करया,
अर वो उनकै हाथ नीच्चै दबगे।
43बार-बार उसनै वे छुड़ाये,
पर वो उसके खिलाफ बलवा करदे गए,
अर अपणे अधर्म के कारण दबदे गए।
44तोभी जिब-जिब उनका चिल्लाणा उसकै कान म्ह पड्या,
तब-तब उसनै उनके संकट पै निगांह करी!
45अर उनके हित म्ह अपणे करार ताहीं याद करकै
अपणी अपार करुणा के मुताबिक तरस खाया,
46अर जो उननै बन्दी बणाकै लेगे थे उन सबतै उनपै दया कराई।
47हे म्हारे परमेसवर यहोवा, म्हारा उद्धार कर,
अर हमनै गैरजात्तां म्ह तै कठ्ठा कर ले,
ताके हम तेरे पवित्र नाम का धन्यवाद करां,
अर तेरी स्तुति करदे होए तेरै बारै म्ह बड़ाई करां।
48इस्राएल का परमेसवर यहोवा
अनादिकाल तै अनन्त काल तक धन्य सै!
अर सारी प्रजा कहवै आमीन!
यहोवा की स्तुति करो।
Currently Selected:
भजन संहिता 106: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
