गिनती 32

यरदन कै पूर्व म्ह बसे गोत्र

1रूबेनियाँ अर गादियाँ कै धोरै घणे जानवर थे। जिब उननै याजेर अर गिलाद इल्‍लुरिकुम परदेस ताहीं देखकै विचार करया, के वो पशुआं कै लायक देश सै, 2फेर मूसा अर एलीआजर याजक अर मण्डळी के प्रधानां कै धोरै जाकै कहण लाग्गे, 3“अतारोत, दीबोन, याजेर, निम्रा, हेशबोन, एलाले, सबाम, नबो, अर बोन नगरां का देश 4जिसपै यहोवा नै इस्राएल की मण्डळी ताहीं जीत दिलवाई सै, वो पशुआं कै लायक सै; अर तेरे दास्सां कै धोरै पशु सैं।” 5फेर उननै कह्या, “जै तेरा अनुग्रह तेरे दास्सां पै हो, तो यो देश तेरे दास्सां नै मिलै के उनकी खुद की धरती हो; हमनै यरदन नदी के परली ओड़ ना ले ज्या।” 6मूसा नै गादियाँ अर रूबेनियाँ तै कह्या, “जिब थारे भाई युद्ध करण नै जावैंगे फेर के थम उरै बैठ्ठे रहोगे? 7अर इस्राएलियाँ तै भी उस पार कै देश जाणकै बारै म्ह, जो यहोवा नै उन ताहीं दिया सै, थम क्यूँ मना करवाओ सो? 8जिब मन्‍नै थारै बाप-दाद्यां ताहीं कादेशबर्ने तै कनान देश देखण कै खात्तर भेज्या, फेर उननै भी इसाए करया था। 9यानिके जिब उननै एशकोल नाम की घाटी ताहीं पोहचकै देश तै देख्या, फेर इस्राएलियाँ तै उस देश कै बारै म्ह जो यहोवा नै उन ताहीं दिया था मना करा दिया। 10इस करकै उस बखत यहोवा नै छो म्ह होकै या कसम खाई, 11‘जरुर जो माणस मिस्र देश तै लिकड़ आये सैं उन म्ह तै, जितने बीस साल के या उसतै घणी उम्र के सैं, वे उस देश नै देखण ना पावैगें, जिसके देण की कसम मन्‍नै अब्राहम, इसहाक, अर याकूब तै खाई सै, क्यूँके वे मेरै पाच्छै पूरी तरियां तै न्ही होए; 12पर यपुन्‍ने कनजी का बेट्टा कालेब, अर नून का बेट्टा यहोशू, ये दोन्‍नु जो मेरै पाच्छै पूरी तरियां तै हो लिये सैं ये उस ताहीं देखण पावैगें।’ 13आखर यहोवा का छो इस्राएलियाँ पै भड़क्या, अर जिब ताहीं उस पीढ़ी के सारे माणसां का अन्त न्ही होया, जिननै यहोवा कै खिलाफ बुरा करया था, जिब तक यानिके चाळीस साल ताहीं वो उननै जंगळ-बियाबान म्ह मारे-मारे फिरान्दा रह्या। 14अर सुणो, थम माणस उन पापियाँ के बाळक हो के इस करकै अपणे पूर्वजां कै जगहां पै प्रगट होए सो, के इस्राएल कै खिलाफ यहोवा के भड़के होए छो नै और भी भड़काओ! 15जै थम उसकै पाच्छै चाल्‍लण तै मुड़ो, तो वो फेर हम सारया नै जंगळ-बियाबान म्ह छोड़ देगा; इस तरियां थम इन सारे माणसां का नाश कराओगे।”

16फेर उननै मूसा कै और धोरै आकै कह्या, “हम अपणे डांगरां कै खात्तर उरैए बाड़े बणावांगें, अर अपणे बाळकां कै खात्तर उरैए नगर बसावांगें, 17पर खुद इस्राएलियाँ कै आग्गै-आग्गै हथियारबन्द जिब ताहीं चाल्‍लांगें, जिब ताहीं उननै उनकी जगहां म्ह न्ही पोहुच्या दें; पर म्हारै बाळ-बच्‍चे इस देश के बाशिंद्यां कै डर तै गढ़आळे नगरां म्ह रहवैंगे। 18पर जिब तक इस्राएली अपणे-अपणे हिस्सां के हकदार ना हों जिब ताहीं हम अपणे घरां नै ना बोहड़ागें। 19हम उनकै गेल्या यरदन नदी के परली ओड़ या किते आग्गै अपणा हिस्सा ना लेवांगे, क्यूँके म्हारा हिस्सा यरदन नदी कै इस पार पूरब कान्ही मिल्या सै।” 20फेर मूसा नै उनतै कह्या, “जै थम इसा करो, यानिके जै थम यहोवा कै आग्गै-आग्गै युद्ध करण नै हथियार बान्धो। 21अर हरेक हथियारबन्द यरदन नदी कै परली ओड़ जिब ताहीं चाल्‍लै, जिब ताहीं यहोवा अपणे आग्गै तै अपणे बैरियाँ नै न्ही काड्डै 22अर देश यहोवा कै बस म्ह ना आवै; तो उसकै पाच्छै थम उरै बोहड़ोगे, अर यहोवा कै अर इस्राएल कै बारै म्ह बेकसूर ठहरोगे; अर यो देश यहोवा कै प्रति थारी खुद की धरती ठहरैगी। 23अर जै थम इसा न्ही करो, तो यहोवा कै खिलाफ पापी ठहरोगे; अर जाण ल्यो के थमनै थारा पाप लाग्गैगा। 24थम अपणे बाळकां कै खात्तर नगर बसाओ, अर अपणी भेड़-बकरियाँ कै खात्तर बाड़े बणाओ; अर जो थारै मुँह तै लिकड़या सै वोए करो।” 25फेर गादियाँ अर रूबेनियाँ नै मूसा तै कह्या, “अपणे प्रभु के हुकम कै मुताबिक तेरे दास करैगें। 26म्हारै बाळ-बच्‍चे, जनानियाँ, भेड़-बकरी आदि, सारे पशु तो उरैए गिलाद के नगरां म्ह रहवैंगे; 27पर अपणे प्रभु के कहे होए कै मुताबिक तेरे दास सारे के सारे युद्ध कै खात्तर हथियारबन्द यहोवा कै आग्गै-आग्गै लड़ण नै परली ओड़ पार जावैंगे।”

28“फेर मूसा नै उनकै बारै म्ह एलीआजर याजक, अर नून के बेट्टे यहोशू, अर इस्राएलियाँ कै गोत्रां के पितरां कै घरान्यां कै खास-खास माणसां ताहीं यो हुकम दिया, 29के जै सारे गादी अर रूबेनी आदमी युद्ध कै खात्तर हथियारबन्द थारी गैल यरदन नदी के परली ओड़ जावैं, अर देश थारे बस म्ह आ जावै, तो गिलाद देश उनकी खुद की धरती होण कै खात्तर उननै दियो। 30पर जै वे थारै गैल हथियारबन्द परली ओड़ ना जावैं, तो उनकी खुद धरती थारै बिचाळै कनान देश म्ह ठहरै।” 31फेर गादी अर रूबेनी बोल उठे, “यहोवा नै जिसा तेरे दास्सां तै कुहाया सै उस्से तरियां ए हम करागें। 32हम हथियारबन्द यहोवा कै आग्गै-आग्गै उस पार कनान देश म्ह जावागें, पर म्हारी खुद की धरती यरदन नदी कै इस पार रहवै।”

33फेर मूसा नै गादियाँ अर रूबेनियाँ ताहीं, अर यूसुफ के बेट्टे मनश्शे के आध्धे गोत्रियाँ ताहीं एमोरियां के राजा सीहोन अर बाशान के राजा ओग, दोनुआ कै राज्यो का देश, नगरां, अर उनके लोवै-धोरै की धरती सुधा दे दिया। 34फेर गादियाँ नै दीबोन, अतारोत, अरोएर, 35अत्रौतशोपान, याजेर, योगबहा, 36बेतनिम्रा, अर बेत-हारन नाम के नगरां ताहीं मजबूत करया, अर उन म्ह भेड़-बकरियाँ कै खात्तर बाड़े बणाये। 37अर रूबेनियाँ नै हेशबोन, एलाले, अर किर्यातैम ताहीं, 38फेर नबो अर बालमोन कै नाम बदलकै उननै, अर सिबमा ताहीं मजबूत करया; अर उननै अपणे मजबूत करे होए नगरां के न्यारे-न्यारे नाम धरे। 39अर मनश्शे के बेट्टे माकीर के वंशआळयां नै गिलाद देश म्ह जाकै उस ताहीं ले लिया, अर जो एमोरी उस म्ह रहवै थे उन ताहीं लिकाड़ दिया। 40फेर मूसा नै मनश्शे के बेट्टे माकीर के वंश तै गिलाद दे दिया, अर वे उस म्ह रहण लाग्गे। 41अर मनश्शेई याईर नै जाकै गिलाद की कितनी बस्तियाँ ले ली, अर उनके नाम हव्वोत्याईर#32:41 हव्वोत्याईर जायेर कै गाम धरे। 42अर नोबह नै जाकै गाम्मां सुधा कनात ताहीं ले लिया, अर उसका नाम अपणे नाम पै नोबह धरया।

Currently Selected:

गिनती 32: BGC

Highlight

Copy

Compare