मत्ती 8

कोढ़ के रोगी ताहीं छू कै चंगा करणा

1जिब यीशु उस पहाड़ तै उतरा, तो एक बड्डी भीड़ उसके पाच्छै हो ली।

2अर, एक कोढ़ी नै धोरै आकै उस ताहीं प्रणाम करया अर कह्या, “हे प्रभु, जै तू चाहवै, तो मन्‍नै ठीक कर सकै सै।”

3यीशु नै हाथ बढ़ाकै उस ताहीं छुआ, अर कह्या, “मै चाहूँ सूं, के तू इस बीमारी तै ठीक हो ज्या।” अर वो जिब्बे कोढ़ तै ठीक होग्या। 4यीशु नै उसतै कह्या, “देख किसे तै ना कहिये, पर जाकै अपणे-आपनै याजक ताहीं दिखा अर अपणे कोढ़ तै ठीक होण कै बारै म्ह जो कुछ मूसा नबी नै जो पवित्र ग्रन्थ म्ह चढ़ावा बताया सै उसनै चढ़ा, के माणसां खात्तर या गवाही हो, के तू ठीक होग्या सै।”

सूबेदार के बिश्वास पर यीशु की प्रशंसा

5जिब यीशु कफरनहूम नगर म्ह आया तो एक सूबेदार#8:5 सूबेदार-रोमी सेना के सौ सिपाही कै उप्पर हो सै नै धोरै आकै उसतै बिनती करी,

6“हे प्रभु, मेरा नौक्‍कर लकवे के रोग तै घणा दुखी होरया सै।”

7यीशु नै उस ताहीं कह्या, “मै आकै उसनै ठीक करुँगा।”

8सूबेदार नै जवाब दिया, “हे प्रभु, मै इस लायक कोनी के तू मेरे घरां आवै, पर सिर्फ मुँह तै कह दे तो मेरा नौक्‍कर ठीक हो ज्यागा। 9क्यूँके मै जाणु सूं, के मै भी किसी के आदेशां का पालन करुँ सूं, अर सिपाही मेरै आदेशां का पालन करै सै। जिब मै एक तै कहूँ सूं, जा, तो वो जावै सै, अर दुसरे तै कहूँ, आ, तो वो आवै सै, अर अपणे नौक्‍कर तै कहूँ सूं, यो कर, तो वो करै सै।”

10यो सुणकै यीशु कै अचम्भा होया, अर जो लोग उसकै पाच्छै आवै थे उनतै कह्या, “मै थमनै साच्‍ची कहूँ सूं के मन्‍नै इस्राएल देश म्ह भी इसा बिश्वास न्ही देख्या, जिसा इस सूबेदार का सै। 11अर मै थमनै कहूँ सूं के पूरब अर पच्छिम तै घणेए गैर यहूदी आवैंगे अर भोज म्ह अब्राहम अर इसहाक अर याकूब के गेल्या सुर्ग के राज्य म्ह बैठैगें। 12पर राज्य की औलाद (यहूदी लोग) बाहर अन्धेरे म्ह गेर दिये जावैंगे उड़ै रोणा अर दाँत पिसणा होगा।”

13जिब यीशु नै सूबेदार तै कह्या, “घर चला जा, जिसा तेरा बिश्वास सै, उसाए तेरे खात्तर होगा।” अर उसका नौक्‍कर उस्से बखत ठीक होग्या।

पतरस के घर म्ह अनेक रोगियाँ की चंगाई

14यीशु जिब पतरस के घरां आया, तो उसनै उसकी सास्सू ताहीं बुखार म्ह पड्या देख्या। 15उसनै उसका हाथ पकड्या अर उसका बुखार उतर ग्या, अर वा उठकै उसकी सेवा-पाणी करण लाग्गी।

16जिब साँझ होई फेर माणस उसके धोरै घणेए माणसां नै ल्याए जिन म्ह ओपरी आत्मा थी अर यीशु नै उन आत्मायाँ ताहीं अपणे वचन तै लिकाड़ दिया, अर सारे बिमारां ताहीं ठीक कर दिया। 17ताके जो वचन यशायाह नबी के जरिये कह्या गया था वो पूरा हो “उसनै खुद ए म्हारी कमजोरी ले ली अर म्हारी बीमारी उठा ली।”#8:17 (1 पत. 2:24)

यीशु का चेल्‍ला बणण की किम्मत

18यीशु नै जिब अपणे चौगरदू एक भीड़ देक्खी तो अपणे चेल्यां ताहीं गलील समुन्दर के परली ओड़ जाण का हुकम दिया। 19यीशु अर उसके चेल्‍लें किस्ती की ओड़ जाण लागरे थे, तो एक शास्त्री नै धोरै आकै उसतै कह्या, “हे गुरु, जड़ै किते तू जावैगा, मै तेरे पाच्छै हो ल्यूँगा, क्यूँके मै तेरा चेल्‍ला बणणा चाहूँ सूं।”

20यीशु नै उसतै कह्या, “लोमड़ियां की घुरखाण अर अकास के पंछियाँ के बसेरे हो सै, पर मुझ माणस के बेट्टे खात्तर सिर छिपाण की भी जगहां कोनी सै।”

21एक और चेल्‍लै नै उसतै कह्या, “हे प्रभु, पैहले मन्‍नै घर जाणदे, मै अपणे पिता के मरण कै बाद उस ताहीं दफना के आऊँगा, फेर तेरा चेल्‍ला बणुगाँ।”

22यीशु नै उसतै कह्या, “तू मेरै पाच्छै हो ले, अर मेरा चेल्‍ला बण जा अर जो आत्मिक रूप तै मर चुके सै, उननै मुर्दे दफनाण दे।”

आँधी अर तूफान ताहीं शान्त करणा

23जिब यीशु किस्ती पै चढ़या, तो उसके चेल्‍लें उसकै पाच्छै हो लिए। 24अर देक्खो, समुन्दर म्ह एक इसा बड्ड़ा अन्धोड़ उठ्या के किस्ती झाल्‍लां तै ढक्ण लाग्गी, अर वो सोण लाग रह्या था। 25फेर चेल्यां नै धोरै आकै उस ताहीं जगाया अर कह्या, “हे प्रभु, हमनै बचा, हम डूबके मरण आळे सां।”

26यीशु नै उनतै कह्या, “हे बिश्वास म्ह कमजोर माणसों, क्यूँ डरो सों?” फेर उसनै उठकै आँधी अर पाणी ताहीं धमकाया, अर सब शान्त होग्या।

27अर वे अचम्भा करकै कहण लाग्ये, “यो किसा माणस सै के आँधी अर पाणी भी उसका हुकम मान्‍नैं सै।”

ओपरी आत्मायाँ ताहीं सूअरां के झुण्ड म्ह भेजणा

28जिब यीशु गलील समुन्दर कै परली ओड़ गदरेनियां के देश म्ह पोहचा, तो दो माणस जिन म्ह ओपरी आत्मा थी कब्रिस्तान म्ह तै लिकड़कै उसनै मिले। वे इतणे डरावणे थे के कोए उस रास्ते तै जा न्ही सकै था। 29दोन्‍नु माणसां नै किल्की मारकै कह्या, “हे परमेसवर के बेट्टे, म्हारा तेरे तै के काम? के तू बखत तै पैहल्या हमनै दुख देण आड़ै आया सै?”#8:29 (लूका. 4:34)

30उनतै थोड़ी सी दूर पै घणेए सूअरां का टोळ चरै था। 31ओपरी आत्मायाँ नै उसतै या कहकै बिनती करी के, “जै तू हमनै लिकाड़ै सै, तो सूअरां के टोळ म्ह भेजदे।”

32उसनै उन ताहीं कह्या, “जाओ!” अर वे ज्या के सूअरां म्ह बैठगी अर देक्खो, सारा टोळ ढळान पै तै झपटकै पाणी म्ह ज्या पड्या, अर डूब मरया। 33उनके पाळी भाज्ये, अर नगर म्ह जाकै ये सारी बात अर जिन म्ह ओपरी आत्मा थी उनका सारा हाल कह सुणाया। 34फेर सारे नगर के माणस यीशु तै फेटण नै लिक्ड़ाए, अर उस ताहीं देख के बिनती करी के म्हारी सीमा तै बाहर चल्या ज्या।

Currently Selected:

मत्ती 8: BGC

Highlight

Copy

Compare