लैव्यव्यवस्था 5

दोषबलि की विधि

1“जै कोए गवाह होकै इसा पाप करै के कसम खुवाकै बुझ्झण पै भी के तन्‍नै यो सुण्या या जाणै सै, अर वा बात जाहिर ना करै, तो उसनै अपणे अधर्म का बोझ ठाणा पड़ैगा। 2या जै कोए किसे अशुद्ध चीज नै भूल तै छू ले, चाहे वो अशुद्ध जंगळी-पशु की हो, या घरेलू पशु की, या रेंगण आळे जीव-जन्तु की लोथ हो, तो वो अशुद्ध होकै कसूरवार ठहरैगा। 3या जै कोए माणस किसे अशुद्ध चीज नै भूल तै छू ले, चाहे वो अशुद्ध चीज किसे भी ढाळ की क्यूँ ना हो जिसतै माणस अशुद्ध हो ज्या सै तो जिब वो उस बात नै जाण लेगा फेर वो कसूरवार ठहरैगा। 4या जै कोए बुरा या भला करण खात्तर बिना सोच्‍चे-समझे कसम खावै, चाहे किसे ढाळ की बात वो बिना सोच्‍चे-समझे कसम खाकै कहवै, तो इसी बात म्ह वो कसूरवार उस बखत होवैगा जिब उस ताहीं बेरा लाग ज्यागा। 5अर जिब वो इन बात्तां म्ह तै किसे भी बात म्ह कसूरवार हो, तो जिस बारै म्ह उसनै पाप करया हो वो उसनै मान ले, 6अर वो यहोवा कै स्याम्ही अपणा दोषबलि ले आवै, यानिके उस पाप कै कारण वो एक मादा भेड़ या बकरी पापबलि करण कै खात्तर ले आवै; फेर याजक उस पाप कै बारै म्ह उसकै खात्तर प्रायश्चित करै।”

7“पर जै उसकी भेड़ या बकरी देण की ओकात ना हो, तो अपणे पाप कै कारण दो पिंडुक या कबूतरी के दो बच्‍चे दोषबलि चढ़ाण कै खात्तर यहोवा कै धोरै ले आवै, उन म्ह तै एक तो पापबलि कै खात्तर अर दूसरा होमबलि कै खात्तर। 8वो उन ताहीं याजक कै धोरै ले आवै, अर याजक पापबलि आळे नै पैहल्या चढ़ावै, अर उसकी नाड़ मरोड़दे, पर न्यारा ना करै, 9अर वो पापबलि पशु कै लहू म्ह तै कुछ वेदी कै बाजू पै छिड़कै, अर जो लहू बाकी रहवै सै वो वेदी कै पावेयां पै उण्डेल्या जावै; वो तो पापबलि ठहरैगा। 10फेर दुसरे पंछी नै वो नियम#5:10 नियम वो सारे नियम-कायदे जो पैहले ए बताये गए थे कै मुताबिक होमबलि करै, अर याजक उसकै पाप का प्रायश्चित करैं, अर फेर वो माफ करया जावैगा।”

11“जै वो दो पिंडुक या कबूतरी कै दो बच्‍चे भी न्ही दे सकै, तो वो अपणे पाप कै कारण अपणा चढ़ावा एपा#5:11 एपा 1 किलोग्राम का दसमां हिस्सा मैद्दा पापबलि करकै ले आवै; उसपै ना तो वो तेल गेरै, अर ना लोबान धरै, क्यूँके वो पापबलि होवैगा 12वो उस ताहीं याजक कै धोरै ले जावै, अर याजक उस म्ह तै अपणी मुट्ठी भर याद दिलाण आळा हिस्सा जाणकै वेदी पै यहोवा कै हवनां कै उप्पर जळावै; वो तो पापबलि ठहरैगा। 13अर इन बात्तां म्ह तै किसे भी बात कै बारै म्ह जो कोए पाप करै, याजक उसका प्रायश्चित करै, अर फेर वो पाप माफ करया जावैगा। अर इस पापबलि का बाकी अन्‍नबलि का बाकी समान याजक का ठहरैगा।”

14फेर यहोवा नै मूसा तै कह्या, 15“जै कोए यहोवा की पवित्र करी होई चिज्जां कै बारै म्ह भूल तै बिश्वासघात करै अर पापी ठहरै, तो वो यहोवा कै धोरै एक निर्दोष मिंढा दोषबलि कै खात्तर ले आवै; उसका दाम पवित्र स्‍थान कै शेकेल कै मुताबिक उतने ए शेकेल चाँदी का हो जितना याजक ठहरावै। 16अर जिस पवित्र चीज कै बारै म्ह उसनै पाप करया हो, उस म्ह वो पाँचवाँ हिस्सा और बढ़ाकै याजक नै दे; अर याजक दोषबलि का मिंढा चढ़ाकै उसकै खात्तर प्रायश्चित करै, फेर उसका पाप माफ करया जावैगा। 17जै कोए इसा पाप करै, के उन काम्मां म्ह तै जिन ताहीं यहोवा नै मना करया सै किसे काम नै करै, तो चाहे वो उसतै अनजाणे म्ह होया हो, फेर भी वो कसूरवार ठहरैगा, अर उसनै अपणे अधर्म का बोझ ठाणा पड़ैगा। 18ज्यांतै वो एक बेकसूर मिंढा दोषबलि करकै याजक कै धोरै ले आवै, वो उतने दाम का हो जितना याजक ठहरावै, अर याजक उसकै खात्तर उसकी उस भूल का जो उसनै अनजाणे म्ह करी हो प्रायश्चित करै, अर वो माफ करया जावैगा। 19या दोषबलि ठहरै; क्यूँके वो माणस पक्‍का यहोवा कै स्याम्ही कसूरवार ठहरैगा।”

Currently Selected:

लैव्यव्यवस्था 5: BGC

Highlight

Copy

Compare