लैव्यव्यवस्था 18

यौन नैतिकता का नियम

1फेर यहोवा नै मूसा तै कह्या, 2“इस्राएलियाँ तै कह के मै थारा परमेसवर यहोवा सूं। 3थम मिस्र देश के काम्मां कै मुताबिक, जिस म्ह थम रहों थे, ना करियो; अर कनान देश के काम्मां कै तरियां भी, जड़ै मै थमनै ले चाल्‍लूँ सूं, ना करियो; अर ना उन देशां की विधियाँ कै मुताबिक अपणा जीवन बिताईयो। 4मेरे ए नियमां नै मान्दे होए मेरी ए विधियाँ नै मान्दे होए उनपै चालियो। मै थारा परमेसवर यहोवा सूं। 5इस करकै थम मेरे नियमां अर मेरी विधियाँ नै लगातार मानियो; जो माणस उननै मान्‍नै सै वो उनकै कारण जिन्दा रहवैगा। मै यहोवा सूं।”

6“थारे म्ह तै कोए अपणे कुण्बे की जनान्‍नी कै गैल शारीरिक सम्बन्ध ना बणावै। मै यहोवा सूं। 7थारी माँ का तन, जो तेरे पिता का तन सै, उसतै शारीरिक सम्बन्ध ना बणाणा; वा तो थारी माँ सै, इस करकै थम उसकै साथ शारीरिक सम्बन्ध ना बणाईयो। 8अपणी सौतेल्‍ली माँ कै गैल भी शारीरिक सम्बन्ध ना बणाईयो; वो तो थारे पिता का ए तन सै। 9अपणी भाण चाहे सगी हो चाहे सौतेल्‍ली हो, चाहे वो घर म्ह पैदा होई हो चाहे बाहर, उसकै गैल भी शारीरिक सम्बन्ध ना बणाईयो। 10अपणी पोत्ती या अपणी दोहती कै गैल भी शारीरिक सम्बन्ध ना बणाईयो, क्यूँके उनका अपमान तो थारा ए अपमान सै। 11थारी सौतेल्‍ली भाण जो थारे पिता तै पैदा होई, वो थारी भाण सै, इस करकै उसकै गैल भी शारीरिक सम्बन्ध ना बणाईयो। 12अपणी बुआ कै गैल भी शारीरिक सम्बन्ध ना बणाईयो; वो तो थारे पिता के कुण्बे की सै। 13अपणी मौस्सी कै गैल भी शारीरिक सम्बन्ध ना बणाईयो; क्यूँके वो थारी माँ कै कुण्बे की सै। 14अपणे चाचा का अपमान ना करियो, यानिके उसकी जनान्‍नी कै गैल भी शारीरिक सम्बन्ध ना बणाईये; वो तो थारी चाच्‍ची सै। 15अपणी बहू कै साथ शारीरिक सम्बन्ध ना बणाईयो क्यूँके वो तो तेरे बेट्टे की जनान्‍नी सै, इस करकै थम उसकै साथ शारीरिक सम्बन्ध ना बणाईयो। 16अपणी भाभ्भी कै गैल शारीरिक सम्बन्ध ना बणाईयो; वो तो तेरे भाई का ए तन सै। 17किसे औरत अर उसकी बेट्टी दोनुआं कै साथ शारीरिक सम्बन्ध ना बणाईयो, अर अपणी पोत्ती नै या अपणी दोहती नै अपणी औरत करकै उसकै साथ शारीरिक सम्बन्ध ना बणाईयो; वे तो धोरै के कुण्बे की सै; इसा करणा महापाप सै। 18अर अपणी जनान्‍नी की भाण नै भी अपणी औरत करकै उसकी सौत ना बणाईये कदे पैहली के जिन्दा रहन्दे होए उसकै साथ शारीरिक सम्बन्ध ना बणाईये।”

19“फेर जिब तक कोए औरत अपणे मासिक धर्म कै कारण अशुद्ध रहवै जद तक उसकै गैल शारीरिक सम्बन्ध बणाण कै खात्तर उसकै धोरै ना जाईये। 20फेर अपणे भाई-बन्धु की औरत तै कुकर्म करकै अशुद्ध ना हो जाईयो। 21अपणे बाळकां म्ह तै किसे नै मोलेक#18:21 मोलेक शर्म का देवता देवता कै खात्तर होम करकै ना चढ़ाईयो, अर ना अपणे परमेसवर कै नाम नै अपवित्र ठहराणा; मै यहोवा सूं। 22स्त्रीगमन की तरियां पुरुषगमन न्ही करणा; वो तो घिनोणा काम सै। 23किसे भी जात कै पशु कै गेल्या पशुगमन करकै अशुद्ध ना होइयो, अर ना कोए औरत पशु कै स्याम्ही इस करकै खड़ी हो के उसकै गेल्या कुकर्म करै; या तो उलटी बात सै।”

24“इसा-इसा कोए भी काम करकै अशुद्ध ना हो जाणा, क्यूँके जिन जात्तां नै मै थारे आग्गै तै लिकाड़ण पै सूं वे इसे-इसे काम करकै अशुद्ध होगी सै; 25अर उनका देश भी अशुद्ध होग्या सै, इस करकै मै उसपै उसके अधर्म की सजा देऊँ सूं, अर वो देश अपणे बासिन्दया नै उगळ देवै सै। 26इस करकै थम मेरी विधि अर नियमां नै लगातार मानियो, अर चाहे देशी, चाहे थारे बिचाळै रहणआळे परदेशी हो, थारे म्ह तै कोए भी इसा घिनोणा काम ना करै; 27क्यूँके इसे सारे घिनोणे काम्मां नै उस देश के माणस जो थारै तै पैहल्या उस म्ह रहवैं थे, वे करदे आये सैं, इस्से तै वो देश अशुद्ध होग्या सै। 28इब इसा ना हो के जिस तरियां तै जो जात थारै तै पैहल्या उस देश म्ह रहवै थी, उस ताहीं उसनै उगळ दिया, उस्से तरियां जिब थम उसनै अशुद्ध करो, तो वो थारे ताहीं भी उगळ दे। 29जितने इसा कोए घिनोणा काम करै वे सारे माणस अपणे माणसां म्ह तै नाश करै जावै। 30ये हुकम जो मन्‍नै थारे ताहीं मान्‍नण नै दिये सै, उसनै थम मानियो, अर जो घिनोणे रीति-रिवाज थारे तै पैहल्या मान्‍नै जावै सै, उन म्ह तै किसे पै ना चालियो, अर ना उनकै कारण अशुद्ध होइयो। मै थारा परमेसवर यहोवा सूं।”

Currently Selected:

लैव्यव्यवस्था 18: BGC

Highlight

Copy

Compare