लैव्यव्यवस्था 15

शरीर तै बहणआळे अशुद्ध स्राव

1फेर यहोवा नै मूसा अर हारुन तै कह्या, 2“इस्राएलियाँ तै कहो के जिस-जिस आदमी कै धातु रोग हो, तो वो धातु रोग कै कारण अशुद्ध ठहरै। 3वो चाहे बैहन्दा रहवै, चाहे बहणा बन्द भी हो, तोभी उसकी अशुद्धता बणी रहवैगी। 4जिसकै धातु रोग हो वो जिस-जिस बिछाणा पै लेटै वो अशुद्ध ठहरै, अर जिस-जिस चीज पै वो बैठ्ठै वो भी अशुद्ध ठहरै। 5अर जो कोए उसके बिछोणे नै छुवै वो अपणे कपड़े नै धोकै पाणी तै नहावै, अर साँझ तक अशुद्ध ठहरया रहवै। 6अर जिसकै धातु रोग हो अर वो जिस चीज पै बैठ्या हो, उसपै जो कोए बैठ्ठै वो अपणे कपड़ेयां नै धोकै पाणी तै नहावै, अर साँझ तक अशुद्ध ठहरया रहवै। 7अर जिसकै धातु रोग हो उसतै जो कोए छू जावै सै वो अपणे कपड़ेयां नै धोकै पाणी तै नहावै अर साँझ तक अशुद्ध रहवै। 8अर जिसकै धातु रोग हो जै वो किसे शुद्ध माणस पै थूकै, तो वो अपणे कपड़ेयां नै धोकै पाणी तै नहावै, अर साँझ तक अशुद्ध रहवै। 9अर जिसकै धातु रोग हो वो सवारी की जिस चीज पै बैठ्ठै वो अशुद्ध ठहरै। 10अर जो कोए उस चीज नै जो उसकै तळै रही हो छुवै, वो साँझ तक अशुद्ध रहवै; अर जो कोए इसी किसे चीज नै ठावै वो अपणे कपड़ेयां नै धोवै अर पाणी तै नहावै, अर साँझ तक अशुद्ध रहवै। 11अर जिसकै धातु रोग हो वो जिस किसे नै बिना हाथ धोए छुवै वो अपणे कपड़ेयां नै धोकै पाणी तै नहावै, अर साँझ तक अशुद्ध रहवै। 12अर जिसकै प्रमेह हो वो माट्टी के जिस किसे बरतन नै छुवै वो तोड़ दिया जावै, अर काठ के सारे ढाळ के बरतन पाणी तै धोए जावै।”

13“फेर जिसकै धातु रोग हो वो जिब अपणे रोग तै ठीक हो जावै, तब तै शुद्ध ठहरण के सात दिन गिण ले, अर उनकै बीतण पै अपणे कपड़ेयां नै धोकै बहन्दे होए पाणी म्ह नहावै; फेर वो शुद्ध ठहरैगा। 14अर आठवें दिन वो दो पंडुक या कबूतरी के दो बच्‍चे लेकै मिलापआळे तम्बू कै दरबाजे पै यहोवा कै स्याम्ही जाकै उननै याजक नै दे। 15फेर याजक उन म्ह तै एक नै पापबलि; अर दुसरे नै होमबलि कै खात्तर चढ़ावा चढ़ावै; अर याजक उसकै खात्तर उसके धातु रोग कै कारण यहोवा कै स्याम्ही प्रायश्चित करै।”

16“फेर जै किसे आदमी का वीर्यपात हो जावै, तो वो अपणे सारे शरीर नै पाणी तै धोवै, अर साँझ तक अशुद्ध रहवै। 17अर जिस किसे कपड़े या चमड़े पै वो वीर्य पड़ै वो पाणी तै धोया जावै, अर साँझ तक अशुद्ध रहवै। 18अर जिब कोए आदमी औरत तै प्रसंग करै तो वे दोन्‍नु पाणी तै स्नान करै, अर साँझ तक अशुद्ध रहवै।”

19“फेर जिब किसे औरत नै मासिक धर्म रहवै, तो वो सात दिन तक अशुद्ध बणी रहवै, अर जो कोए उसनै छुवै वो साँझ ताहीं अशुद्ध रहवै।

20अर जिब तक वो अशुद्ध रहवै जद तक जिस-जिस चीज पै वो लेटै, अर जिस-जिस चीज पै वो बैठ्ठै वे सारी अशुद्ध ठहरै। 21अर जो कोए उसके बिछोणे नै छुवै वो अपणे कपड़े धोकै पाणी तै नहावै, अर साँझ तक अशुद्ध रहवै। 22अर जो कोए किसे चीज नै छुए जिसपै वो बैठ्ठी हो वो अपणे कपड़े धोकै पाणी तै नहावै अर साँझ तक अशुद्ध रहवै। 23अर जै बिछोणे या और किसे चीज पै जिसपै वो बैठ्ठी हो जै कोए उस चीज नै छुवै, तो छूण आळे साँझ तक अशुद्ध रहवै। 24अर जै कोए आदमी उसतै प्रसंग करै, अर उसका रूधिर उसकै लाग ज्या, तो वो आदमी सात दिन तक अशुद्ध रहवै, अर जिस-जिस बिछोणा पै वो लेटै वे सारे अशुद्ध ठहरै।”

25“फेर जै किसे औरत कै अपणे मासिक धर्म के नियुक्त बखत तै घणे दिन ताहीं रूधिर बैहन्दा रहवै, या उस नियुक्त बखत तै ज्यादा बखत तक मासिक धर्म रहवै तो जिब तक वो इसी हालत म्ह रहवै तब ताहीं वो अशुद्ध बणी रहवै। 26उसकै मासिक धर्म रहण के सारे दिनां म्ह जिस-जिस बिछोणे पै वो लेटै वे सारे उसकै मासिक धर्म के बिछोणे की ढाळ ठहरै; अर जिस-जिस चीज पै वो बैठ्ठै वे भी उसकै मासिक धर्म रहण कै दिनां की तरियां अशुद्ध ठहरै। 27अर जो कोए उन चिज्जां नै छुवै वो अशुद्ध ठहरै, ज्यांतै वो अपणे कपड़े धोकै पाणी तै नहावै, अर साँझ तक अशुद्ध रहवै। 28अर जिब वो औरत अपणे मासिक धर्म तै ठीक हो ज्या, फेर तै वो सात दिन गिण ले, अर उन दिनां कै बीतण पै वो शुद्ध ठहरै। 29फेर आठवें दिन वो दो पंडुक या कबूतरी के दो बच्‍चे लेकै मिलापआळे तम्बू कै दरबाजे पै याजक कै धोरै जावै। 30फेर याजक एक नै पापबलि अर दुसरे नै होमबलि कै खात्तर चढ़ावै; अर याजक उसकै खात्तर उसकै मासिक धर्म की अशुद्धता के कारण यहोवा कै स्याम्ही प्रायश्चित करै।”

31“इस तरियां तै थम इस्राएलियाँ नै उनकी अशुद्धता तै न्यारे राख्या करो, कदे इसा ना हो के वे यहोवा का निवास जो उनकै बिचाळै सै अशुद्ध करकै अपणी अशुद्धता म्ह फँसकै मर ज्यां।”

32जिसकै धातु रोग हो अर जो आदमी वीर्यपात होण तै अशुद्ध हो; 33अर जो औरत मासिक धर्म तै हो; अर के आदमी के औरत, जिस किसे कै धातु रोग हो, अर जो आदमी अशुद्ध औरत कै गेल्या प्रसंग करै, इन सारया कै खात्तर येए नियम-कायदे सै।

Currently Selected:

लैव्यव्यवस्था 15: BGC

Highlight

Copy

Compare