यहो. 9

गिबोनियाँ का छळ

1यो सुणकै हित्ती, एमोरी, कनानी, परिज्जी, हिब्बी, अर यबूसी, जितने राजा यरदन नदी के पश्चिमी पहाड़ी देश म्ह अर नीच्‍चै के देश म्ह, अर लबानोन कै स्याम्ही के भूमध्य-सागर के किनारे पै रहवै थे, 2वे एक मन होकै यहोशू अर इस्राएलियाँ तै लड़ण नै कठ्ठे होए।

3जिब गिबोन के निवासी जो के हिब्बी थे उननै सुण्या के यहोशू नै यरीहो अर आई कै गैल के-के करया सै, 4फेर उननै छळ करया, अर राजदूत्तां का भेष बणाकै अपणे गध्यां पै पुराणे बोरे, अर पाट्टे-पुराणे, अर जोड़े होए शराब के कुप्पे लादकै 5अपणे पैरां म्ह पुराणी टांकी लाग्गी होई जूत्ती, अर तन पै पुराणे कपड़े पैहरे, अर अपणे भोजन खात्तर सूक्खी अर फफूंदी लाग्गी होई रोट्टी ले ली। 6फेर वे गिलगाल की छावणी म्ह यहोशू कै धोरै जाकै उसतै अर इस्राएली आदमियाँ तै कहण लाग्गे, “हम दूर देश तै आए सां; इस करकै इब थम म्हारै तै करार करो।” 7इस्राएली आदमियाँ नै उन हिब्बियाँ तै कह्या, “के जाणा थम म्हारे बीच म्ह ए रहन्दे हो तो; फेर हम थारे गैल करार किस तरियां करां?” 8उननै यहोशू तै कह्या, “हम तेरे दास सां।” फेर यहोशू नै उनतै कह्या, “थम कौण हो? अर कित्त तै आए सो?” 9उननै उसतै कह्या, “तेरे दास घणे दूर के देश तै तेरे परमेसवर यहोवा का नाम सुणकै आए सैं; क्यूँके हमनै यो सब सुण्या सै, यानिके उसकी कीर्ति अर जो कुछ उसनै मिस्र म्ह करया, 10अर जो कुछ उसनै एमोरियां के दोन्‍नु राजयां गैल करया जो यरदन के उस पार रहवै थे, यानिके हेशबोन के राजा सीहोन तै, अर बाशान के राजा ओग तै जो अश्तारोत म्ह था। 11ज्यांतै म्हारे उरै के बुजुर्ग माणसां नै अर म्हारे देश के सारे निवासियां नै म्हारे तै कह्या, के राह खात्तर अपणे गैल भोजनवस्तु लेकै उनतै मिलण नै जाओ, अर उनतै कहिये, के हम थारे दास सां; इस करकै इब थम म्हारे तै करार करो। 12जिस दिन हम तेरै धोरै आण खात्तर लिकड़े उस दिन तो हमनै अपणे-अपणे घर तै ये रोट्टी गरम अर ताजा ली थी; पर इब देक्खो, ये सूखगी सै अर इस म्ह फफूंदी लाग्गी सै। 13फेर ये जो शराब के कुप्पे हमनै भर लिये थे, जद तो नये थे, पर देक्खो इब ये पाटगे सैं; अर म्हारे ये कपड़े अर जूत्ती घणा लाम्बा सफर तय करण कै कारण पुराणी होगी सैं।” 14फेर उन आदमियाँ नै यहोवा तै बिना सलाह लिये उनके खाणे म्ह तै कुछ लिया। 15फेर यहोशू नै उनतै मेल करकै उनतै यो करार करया, के थमनै जिन्दा छोडागें; अर मण्डळी के प्रधानां नै उनतै शपथ खाई।

16अर उनकै गैल करार करण के तीन दिन बाद उन ताहीं यो समाचार मिल्या; के वे म्हारे पड़ोस के रहणआळे माणस सैं, अर म्हारे ए बीच म्ह बसे सैं। 17फेर इस्राएली कूच करकै तीसरे दिन गिबोन के नगरां नै जिनके नाम गिबोन, कपीरा, बेरोत, अर किर्यत्यारीम सै पोहचगे, 18अर इस्राएलियाँ नै उन ताहीं मारया न्ही, क्यूँके मण्डळी के प्रधानां नै उनकै गैल इस्राएल के परमेसवर यहोवा की शपथ खाई थी। फेर सारी मण्डळी के माणस प्रधानां कै बिरुध्द कुड़कुड़ाण लाग्गे। 19फेर सारे प्रधानां नै सारी मण्डळी तै कह्या, “हमनै उनतै इस्राएल के परमेसवर यहोवा की कसम खाई सै, इस करकै इब हम उननै छू न्ही सकदे। 20हम उनकै गैल योए करागें, के उस कसम कै मुताबिक हम उननै जिन्दा छोड़ देवांगे, न्ही तो म्हारी खाई होई कसम कै कारण म्हारै पै छो पड़ैगा।” 21फेर प्रधानां नै उनतै कह्या, “वे जिन्दा छोड़े जावैं।” आखर प्रधानां के इस वचन कै मुताबिक वे सारी मण्डळी कै खात्तर लकड़हारे अर पाणी भरणआळे बणे।

22फेर यहोशू नै उन ताहीं बुलवाकै कह्या, “थम म्हारे ए बीच म्ह रहो सो, फेर थमनै म्हारै तै यो कहकै क्यूँ छळ करया सै, के हम थारै तै घणा दूर रहवां सां? 23इस करकै इब थम श्रापित हो, अर थारे म्ह तै इसा कोए न्ही रहवैगा जो दास, यानिके मेरे परमेसवर के भवन कै खात्तर लकड़हारा अर पाणी भरणआळा ना हो।” 24उन ताहीं यहोशू नै जवाब दिया, “तेरे दास्सां तै यो जरुर बताया गया था, के तेरे परमेसवर यहोवा नै अपणे दास मूसा तै हुकम दिया था के थमनै वो सारा देश दे, अर उसके सारे निवासियां नै थारै स्याम्ही तै सर्वनाश करै; ज्यांतै हमनै थारे कारण अपणी जान के लाल्‍ले पड़गे, ज्यांतै हमनै इसा काम करया। 25अर इब हम तेरे वश म्ह सां, जिसा बरताव तन्‍नै भला लाग्गे अर ठीक लाग्गे, उसाए बरताव म्हारे गैल कर।” 26अर यहोशू नै उनकै गैल उसाए करया, अर गिबोनियाँ नै इस्राएलियाँ के हाथ तै इसा बचाया, के वे उननै घात करण न्ही पाए। 27पर यहोशू नै उस्से दिन उनतै मण्डळी कै खात्तर, अर जो जगहां यहोवा चुण ले उस म्ह उसकी वेदी कै खात्तर, लकड़हारे अर पाणी भरणआळे नियुक्त कर दिया, जिसा आज ताहीं सै।

Currently Selected:

यहो. 9: BGC

Highlight

Copy

Compare