अय्यूब 40
40
1फेर यहोवा नै अय्यूब तै यो भी कह्या:
2“के जो वाद-विवाद करै सै वो सर्वशक्तिमान तै झगड़ा करै?
जो परमेसवर तै विवाद करै सै वो इसका जवाब दे।”
अय्यूब का परमेसवर नै जवाब
3फेर अय्यूब नै यहोवा ताहीं जवाब दिया:
4“देख, मै तो निकम्मा सूं, मै तेरे ताहीं के जवाब दियुँ?
मै अपणी आंगळी दाँत तळै दबाऊँ सूं।
5एक बार तो मै कह चुक्या, पर और कुछ न्ही कहूँगा:
हाँ दो बार भी मन्नै भी कह दिया, पर इब कुछ और आग्गै न्ही कहूँगा।”
6फेर यहोवा नै अय्यूब तै आँधी म्ह तै यो जवाब दिया:
7“माणस की ढाळ तैयार होज्या,
मै तेरे तै सवाल करुँ सूं, अर तू मन्नै बता।
8के तू मेरा न्याय भी बेकार ठहरावैगा?
के तू आप बेकसूर ठहरण की मनसा तै मन्नै दोषी ठहरावैगा?
9के तेरी बाजुआं का जोर परमेसवर कै बराबर सै?
के तू उसकी तरियां शब्द तै गरज सकै सै?”
10“इब अपणे आप नै महिमा अर प्रताप तै संवार
अर ऐश्वर्य अर तेज के कपड़े पैहर ले।
11अपणे घणे छो की बाढ़ नै बहा दे,
अर एक-एक घमण्डी नै देखदे ए उस ताहीं नीच्चा कर।
12हर एक घमण्डी नै देखकै झुका दे,
अर दुष्ट माणसां नै जित्त खड़े हों ओड़ै तै गिरा दे।
13उन ताहीं एक साथ माट्टी म्ह मिला दे,
अर उस गुप्त जगहां म्ह उनके मुँह बाँध दे।
14फेर मै भी तेरे बारे म्ह मान ल्यूँगा,
के तेराए सोळा हाथ तेरा उद्धार कर सकै सै।”
15“उस बेहोमत#40:15 बेहोमत यो मिस्र देश एक दरियाई घोड़े की तरियां सै नै देख, जिस ताहीं मन्नै तेरी गैल बणाया सै,
वो बळध की तरियां घास खावै सै।
16देख उसकी कमर म्ह ताकत सै,
अर उसके पेट के पट्टां म्ह उसकी ताकत रहवै सै।
17वो अपणी पूँछ नै देवदार की तरियां हिलावै सै;
उसकी जाँघां की नस एक-दुसरे तै मिली होई सै।
18उसकी हाड्डी मान्नो पीत्तळ की नळी सै,
उसकी पसळियाँ मान्नो लोहे की साँगळ सै।”
19“वो परमेसवर का खास काम सै;
जो उसका बणाण आळा सै उसके धोरै तलवार लेकै आवै!
20जरुर पहाड़ां पै उसका चारा मिलै सै,
और जित्त सारे जंगळी-पशु मस्ती करै सै।
21वो कमल के पौध्यां कै तळै रहवै नरकटां की आड़ म्ह
अर चिकड़ पै लेट्या करै सै
22कमल के पौधे उसपै छाया करै सै,
वो नाळे के बेंत के पौध्यां तै घिरया रहवै सै।
23चाए नदी की बाढ़ भी हो फेर भी वो न्ही घबरावैगा,
चाए यरदन भी बढ़कै उसके मुँह तक आवै पर वो बेधड़क रहवैगा।
24जिब वो चौक्कस हो फेर के कोए उस ताहीं पकड़ सकैगा,
या फंदे लगाकै अर उसकी नथ म्ह लगाम लगा सकैगा?”
Currently Selected:
अय्यूब 40: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
