अय्यूब 38
38
यहोवा का अय्यूब ताहीं जवाब
1फेर यहोवा नै अय्यूब ताहीं आँधी म्ह तै इस तरियां जवाब दिया,
2“यो कौण सै जो बिना ज्ञान की बात कहकै
योजना नै बिगाड़णा चाहवै सै?
3माणस की ढाळ तैयार होज्या#38:3 तैयार होज्या कमर बाँध,
क्यूँके मै तेरे तै सवाल करुँ सूं, अर तू मन्नै जवाब दे।”
4“जिब मन्नै धरती की नीम गेरी, तब तू कित्त था?
जै तू समझदार हो तो जवाब दे।
5उसका नाप किसनै ठहराया, के तू जाणै सै
उसपै किसनै सूत खींच्या?
6उसकी नीम कौण सी चीज पै धरी गई,
या किसनै उसके कोणे का पत्थर बिठाया,
7जिब के सबेरै के तारे एक गैल आनन्द तै गावैं थे
अर सुर्गदूत जयजयकार करै थे#38:7 अर सुर्गदूत जयजयकार करै थे अर परमेसवर के सारे बेट्टे जयजयकार करै थे?”
8“फेर जिब समुन्दर इसा फूट लिकड़या तो मान्नो वो गर्भ तै फूट लिकड़या,
फेर किसनै दरबाजा बन्द करकै उस ताहीं रोक दिया;
9जिब के मन्नै उस ताहीं बादळ पिहराया
अर घणे अंधेरै म्ह लपेट दिया,
10अर उसके खात्तर हद ठहराई
अर यो कहकै साँकळ अर कुवाड़ लगा दिए,
11‘उरै तक आ, अर आग्गै ना बढ़,
अर तेरी उमडण आळी लहर उरैए थम जावै।’”
12“के तन्नै जिन्दगी म्ह तड़कै ताहीं हुकम दिया,
अर सबेरै तै उसकी जगहां बताई सै,
13ताके वो धरती के कुण्यां नै बस म्ह करै,
अर दुष्ट माणस उस म्ह तै झाड़ दिए जावै?
14वो इसा बदलै सै जिसा मोहर कै नीच्चै चिकणी माट्टी बदलै सै,
अर सारी चीज मान्नो कपड़े पहरे होए दिखाई देवै सै।
15दुष्टां तै उनका चान्दणा रोक लिया जावै सै,
अर उनकी बड़ाई होई बाँह तोड़ी जावै सै।”
16“के तू कदे समुन्दर के चोयां तक पोहच्या सै,
या गहरे समुन्दर की तह म्ह कदे चाल्या फिरया सै?
17के मौत के फाटक तेरे पै प्रगट होए,
के तू घणे अँधेरे के फाटकां नै कदे देक्खण पाया सै?
18के तन्नै धरती की चौड़ाई ताहीं पूरी तरियां समझ लिया सै?
जै तू यो सारा कुछ जाणै सै, तो बता दे।”
19“चाँदणे के रहण का राह कित्त सै,
अर अँधेरे की जगहां कित्त सै?
20के तू उस ताहीं उसकी हद तक हटा सकै सै,
अर उसके घर की राह पिछाण सकै सै?
21बे-शक तू यो सब कुछ जाणदा होवैगा! क्यूँके तू तो उस बखत पैदा होया था,
अर तू भोत घणी उम्र का सै।
22फेर के तू कदे हिम के भण्डार म्ह गया,
या कदे ओळयां के भण्डार ताहीं तन्नै देख्या सै,
23जिस ताहीं मन्नै मुसीबत्त के बखत अर युद्ध
अर लड़ाई के दिन कै खात्तर धर राख्या सै?
24किस राह तै चान्दणा फैलाया जावै सै,
अर पूर्वी हवा धरती पै बहाई जावै सै?”
25“घणी तेज बारिस कै खात्तर किसनै नाळा काट्या,
अर कड़कण आळी बिजळी कै खात्तर राह बणाई सै,
26के सुनसान देश म्ह अर जंगल म्ह जित्त कोए माणस न्ही रहन्दा मिह बरसा कै,
27उजाड़ ए उजाड़ देश नै सींचै, अर हरी घास उगावै?
28के मिह का कोए बाप सै,
अर ओस की बूँद किसनै पैदा करी?
29किसके गर्भ तै बर्फ लिकड़ी सै,
अर आसमान तै गिरे होए पाळे नै कौण पैदा करै सै?
30पाणी पत्थर की तरियां जम ज्या सै,
अर गहरे पाणी कै उप्पर जमावट होवै सै।”
31“के तू कचपचिया का गुच्छा गूँथ सकै
या मृगशिरा के बन्धन खोल सकै सै?
32के तू राशियाँ नै ठीक-ठीक बखत पै काढ सकै,
या सप्तर्षि नै साथियाँ समेत लिए चाल सकै सै?
33के तू अकासमण्डल की विधि जाणै
अर धरती पै उनका हक ठहरा सकै सै?
34के तू बादळां तक अपणी आवाज पोंहचा सकै सै,
ताके घणा पाणी बरस कै तन्नै लुहको ले?
35के तू बिजळी नै हुकम दे सकै सै, के वा जावै,
अर तेरे तै कहवै, ‘मै हाजिर सूं?’
36किसनै अन्तर-आत्मा म्ह बुद्धि पैदा करी,
अर मन म्ह समझण की शक्ति किसनै दी सै?
37कौण बुद्धि तै बादळां नै गिण सकै सै?
अर कौण आसमान के कुप्यां नै उण्डेल सकै सै,
38जिब धूळ जम ज्या सै,
अर ढळे एक-दुसरे तै सट ज्या सै?”
39“के तू शेरणी कै खात्तर निवाळा पकड़ सकै,
अर जवान शेरां का पेट भर सकै सै,
40जिब वे गुफा म्ह बैठ्ठे हो
अर ओट म्ह हमला करण नै दुबक कै बैठ्ठे हों?
41फेर जिब काग के बच्चें परमेसवर की दुहाई देन्दे होए बिना खाये-पीये उड़दे फिरैं सै,
फेर उननै खाणा कौण देवै सै?”
Currently Selected:
अय्यूब 38: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
