यिर्मयाह 9
9
1भला होन्दा, के मेरा सिर पाणी ए पाणी, अर मेरी आँख्यां आँसुआँ का चोवा होन्दी, के मै रात-दिन अपणे मारे गए माणसां खात्तर रोन्दा रहन्दा। 2भला होन्दा के मेरे ताहीं जंगळ म्ह मुसाफिरां का कोए ठिकाणा मिलदा के मै अपणे माणसां ताहीं छोड़कै ओड़ैए चल्या जान्दा! क्यूँके वे सारे व्यभिचारी सैं, वे धोक्खेबाजां का समाज सैं। 3अपणी-अपणी जीभ नै वे धनुष की तरियां झूठ बोलण कै खात्तर त्यार करै सैं, अर देश म्ह ताकतवर तो हो गये, फेर भी सच्चाई कै खात्तर न्ही; वे बुराई पै बुराई बढ़ान्दे जावै सैं, अर वे मेरे ताहीं जाण्दे ए न्ही, यहोवा की योए वाणी सै।
4अपणे-अपणे साथी तै चौक्कस रहो, अपणे भाई#9:4 भाई रिश्तेदार पै भी भरोस्सा ना राक्खो; क्यूँके सारे भाई पक्का अड़ंगा मारैंगे, अर हर एक पड़ोसी बुराई करदे फिरैंगे। 5वे एक दुसरे ताहीं ठगैगें अर सच न्ही बोलैगें; उननै झूठ ए बोलणा सिख्या सै; अर बुराई ए म्ह मेहनत करै सैं। 6तेरा निवास छळ कै बीच सै; छळ ए कै कारण वे मेरा ज्ञान न्ही चाहन्दे, यहोवा की योए वाणी सै।
7इस ताहीं सेनाओं का यहोवा न्यू कहवै सै, “देख, मै उननै तपाकै परखूँगा#9:7 उननै तपाकै परखूँगा परमेसवर उस राष्ट्र नै क्ळेशां की कसौटी पै धरैगा ताके जो भी बुरा हो वो आग म्ह जळ जावै अर उनकी भलाई शुद्ध होकै लिकड़े। , क्यूँके अपणी प्रजा कै कारण मै उनतै और के कर सकूँ सूं? 8उनकी जीभ काळ के तीर की तरियां बेधण आळी सै, उसतै छळ की बात लिकड़ी सैं; वे मुँह तै तो एक दुसरे तै मेल की बात बोल्लै सैं पर मन ए मन एक दुसरे की घात म्ह लाग्गे रहवै सैं। 9के मै इसी बात्तां की सजा ना दियुँ? यहोवा की या वाणी सै, के मै इसी जात तै अपणा पलट्या ना लूँ?”
10“मै पहाड़ां कै खात्तर रो उठूँगा अर शोक का गीत गाऊँगा, अर बियाबान की चराईयाँ कै खात्तर विलाप का गीत गाऊँगा, क्यूँके वे इसे जळ ग्ये सैं के कोए उन म्ह तै होकै न्ही चालदा, अर उन म्ह पशुआं का शब्द भी न्ही सुणाई पड़दा; पशु-पक्षी सारे भाजगे सैं। 11मै यरुशलेम ताहीं खण्डहर बणाकै गादड़ां की जगहां बणाऊँगा; अर यहूदा के नगरां नै इसा उजाड़ दियुँगा के उन म्ह कोए ना बसैगा।”#9:11 यशा. 25:2
12जो बुद्धिमान माणस हो वो इसका भेद समझ ले, अर जिसनै यहोवा के मुँह तै इसका कारण सुण्या हो वो बता दे। देश का नाश क्यूँ होया? क्यूँ वो जंगळ की तरियां इसा जळग्या के उस म्ह तै होकै कोए न्ही चालदा? 13अर यहोवा नै कह्या, “क्यूँके उननै मेरे नियम-कायदे ताहीं जो मन्नै उनकै आगै राक्खी थी छोड़ दिया; अर ना मेरी बात मान्नी अर ना उसकै मुताबिक चाल्ले सैं, 14बलके वे अपणे हठ पै बाल नाम के देवत्यां कै पाच्छै चाल्ले, जिसा उनके पुरखां नै उन ताहीं सिखाया#9:14 जिसा उनके पुरखां नै उन ताहीं सिखाया एक ए पीढ़ी के पाप कै कारण न्ही था के उननै सजा मिली उनका पाप पीढ़ियाँ तै चल्या आण लागरया था।। 15इस कारण, सेनाओं का यहोवा, इस्राएल का परमेसवर या कहवै सै, सुण, मै अपणी इस प्रजा ताहीं कड़वी चीज खुवाऊँगा अर जहर पिलाऊँगा।#9:15 भजन. 69:21; यिर्म. 23:15 16मै उन माणसां ताहीं इसी जात्तां म्ह तित्तर-बितर करुँगा जिननै ना तो वे ना उनके पुरखा जाणै थे; अर जिब ताहीं उनका अन्त ना हो जावै तब ताहीं मेरी ओड़ तै तलवार उनकै पाच्छै पड़ी रहवैगी।”
यरुशलेम खात्तर विलाप
17सेनाओं का यहोवा यो कहवै सै, “सोच्चो, अर विलाप करण आळियाँ ताहीं बुलाओ; बुद्धिमान जनानियाँ ताहीं बुलावा भेज्जो; 18वे फुर्ती करकै म्हारे खात्तर शोक का गीत गावैं के म्हारी आँख्यां तै आँसू बह लिकड़ै अर म्हारी पलकां ताहीं पाणी बहावै। 19सिय्योन तै शोक का या गीत सुणाई देवै सै, ‘हम किस तरियां नाश होगे! हम क्यूँ शर्म म्ह पड़गे सां, क्यूँके हमनै अपणा देश छोड़णा पड़या अर बैरियाँ नै म्हारे घर गिरा दिए सैं।’”
20इस करकै, हे जनानियों, यहोवा का यो वचन सुणो, अर उसका यो हुकम मानो; थम अपणी-अपणी बेट्टियाँ नै शोक का गीत, अर अपणी-अपणी पड़ोसणां नै विलाप का गीत सिखाओ। 21क्यूँके मौत म्हारी खिड़कियाँ तै होकै म्हारे महल्लां म्ह घुस आई सै, के म्हारी सड़कां म्ह बाळकां नै अर चौकां म्ह जवान्नां ताहीं मिटा दे। 22तू कह, “यहोवा न्यू कहवै सै, ‘माणसां की लाश इसी पड़ी रहवैंगी जिस तरियां खाद खेत कै उप्पर, अर पूळी काटण आळे के पाच्छै पड़ी रहवै सैं, अर उनका कोए ठाण आळा ना होवैगा।’”
परमेसवर म्ह घमण्ड
23यहोवा न्यू कहवै सै, “बुद्धिमान अपणी बुद्धि पै घमण्ड ना करै, ना वीर अपणी वीरता पै, ना धनी अपणे धन पै घमण्ड करै; 24पर जै जो घमण्ड करै वो इस्से बात पै घमण्ड करै, कै वो मेरे ताहीं जाण अर समझै सै, के मै ए वो यहोवा सूं, जो धरती पै करुणा, न्याय अर धार्मिकता के काम करै सै; क्यूँके मै इन्हे बात्तां तै खुश रहूँ सूं।”#9:24 1 कुरि. 1:31; 2 कुरि. 10:17
25“देक्खो, यहोवा की या वाणी सै के इसे दिन आण आळे सैं के उनका शारीरिक खतना तो होया था पर उनके मन पवित्र कोनी थे। हो, उननै बिना खतना आळयां की तरियां सजा देऊँगा,#9:25 रोम. 2:25 26यानिके मिस्रियाँ, यहूदियाँ, एदोमियां, अम्मोनियाँ, मोआबियाँ ताहीं, अर उन रेगिस्तान के बासिन्दया की तरियां जो अपणे गाल के बाळां ताहीं मुँण्डा देवै सैं; क्यूँके ये सारी जात्तां तो बिना खतना आळी सैं, अर इस्राएल का सारा घराना भी मन म्ह बिना खतना आळा सै।#9:26 प्रेरि. 7:51”
Currently Selected:
यिर्मयाह 9: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
