यिर्मयाह 7
7
मन्दर म्ह यिर्मयाह का प्रचार
1जो वचन यहोवा की ओड़ तै यिर्मयाह कै धोरै पोहच्या वो यो सै: 2“यहोवा कै भवन के फाटक म्ह खड़या हो, अर यो वचन प्रचार कर, अर कह, हे सारे यहूदियों, थम जो यहोवा नै दण्डवत करण कै खात्तर इन फाटकां तै बड़या करो सो, यहोवा का वचन सुणो। 3सेनाओं का यहोवा जो इस्राएल का परमेसवर सै, या कहवै सै, अपणी-अपणी चाल अर काम सुधारो#7:3 अपणी-अपणी चाल अर काम सुधारो जै वे मन फिरावैंगे तो वो गुलामी म्ह न्ही जावैंगे पर उनका राष्ट्रीय अस्तित्व बणाए राक्खैगा।, फेर मै थारे ताहीं इस जगहां म्ह बसे रहण देऊँगा। 4थम या कहकै झूठ्ठी बात्तां पै भरोस्सा ना राक्खो, ‘योए यहोवा का मन्दर सै; योए यहोवा का मन्दर, यहोवा का मन्दर।’”
5“जै थम सचमुच अपणी-अपणी चाल अर काम सुधारो, अर सचमुच माणस-माणस कै बीच न्याय करो, 6परदेशी अर अनाथ अर बिधवा पै अंधेर ना करो; इस जगहां म्ह निर्दोष का खून ना करो, अर दुसरे देवत्यां कै पाच्छै ना चाल्लो जिसतै थारा नुकसान होवै सै, 7तो मै थारे ताहीं इस नगर म्ह, अर इस देश म्ह जो मन्नै थारे बुजुर्गां तै दिया था, युग-युग कै खात्तर रहण देऊँगा।”
8“देक्खो, थम झूठ्ठी बात्तां पै भरोस्सा राक्खो सो जिनतै कुछ फायदा न्ही हो सकदा। 9थम जो चोरी, हत्या अर व्यभिचार करदे, झूठ्ठी कसम खान्दे, बाल देवता कै खात्तर धूप जळान्दे, अर दुसरे देवत्यां कै पाच्छै जिननै थम पैहले न्ही जाण्या करदे चाल्लों सो, 10तो के या सही सै के थम इस भवन म्ह आओ जो मेरा कुहवावै सै, अर मेरे स्याम्ही खड़े होकै या कह्यो ‘हम इसतै छूट गे सैं#7:10 हम इसतै छूट गे सैं यिर्मयाह उननै पवित्र जीवन जीन की उम्मीद मन्दर के अनुष्ठानां म्ह बिश्वास करण खात्तर दोष देवै सै।’ के ये सारे घृणित काम करैं? 11के यो भवन जो मेरा कुहवावै सै, थारी नजर म्ह डाकुआं की गुफा होग्या सै? मन्नै खुद या देख्या सै, यहोवा की या वाणी सै।”
शीलो एक चेतावनी कै रूप म्ह
12“मेरी जो जगहां शीलो म्ह थी, जड़ै मन्नै पैहले अपणे नाम का निवास ठहराया था, ओड़ै जाकै देक्खो के मन्नै अपणी प्रजा इस्राएल की बुराई कै कारण उसकी के हालत कर दी सै? 13इब यहोवा की या वाणी सै, के थम जो ये सारे काम करदे आए सो, अर जै मै थारे तै बड़ी कोशिश तै बात करदा रह्या सूं, तोभी थमनै न्ही सुण्या, अर थमनै बुलान्दा आया फेर भी थम न्ही बोल्ले, 14इस करकै यो भवन जो मेरा कुहवावै सै, जिसपै थम भरोस्सा राक्खो सो, अर या जगहां जो मन्नै थारे ताहीं अर थारे बुजुर्गां ताहीं दिया था, इसकी हालत मै शीलो की तरियां कर देऊँगा। 15अर जिसा मन्नै थारे सारे भाईयाँ ताहीं यानिके सारे एप्रैमियां ताहीं अपणे स्याम्ही तै दूर कर दिया सै, उसाए थारे ताहीं भी दूर कर देऊँगा।”
प्रजा के जरिये हुकम का उलंघण
16यिर्मयाह, “इस प्रजा खात्तर तू प्रार्थना ना कर, ना इन माणसां खात्तर ऊँच्चे आवाज तै पुकार ना मेरे तै बिनती कर, क्यूँके मै तेरी न्ही सुणूँगा। 17के तू न्ही देखदा के ये माणस यहूदा के नगरां अर यरुशलेम की सड़कां म्ह के करै सैं? 18देख, बाल-बच्चे तो लाकड़ी कठ्ठे करदे, बाप आग सुळगान्दे अर जनानियाँ आटा गूँधे सैं, के सुर्ग की राणी कै खात्तर रोट्टी चढ़ावै; अर मेरे ताहीं छो म्ह करण कै खात्तर दुसरे देवत्यां कै खात्तर अर्घ चढ़ा दे। 19यहोवा की या वाणी सै, के वे मेरे ताहीं छो दुवावै सैं? के वे अपणे आप ताहीं ए न्ही जिसतै उनके मुँह पै उदासी छावै? 20अंत म्ह प्रभु यहोवा नै या कह्या सै, के माणस, के पशु, के मैदान के दरखत, के धरती की उपज, उन सारया पै जो इस जगहां म्ह सैं, मेरे छो की आग भड़कण पै सै; वो लगातार जळदी रहवैगी अर कदे न्ही बुझैगी।”
बलिदान अर आज्ञाकारिता
21सेनाओं का यहोवा जो इस्राएल का परमेसवर सै, या कहवै सै, “अपणी मेलबलियां कै गैल अपणी होमबलि भी चढ़ाओ अर माँस खाओ। 22क्यूँके जिस बखत मन्नै थारे बुजुर्गां ताहीं मिस्र देश म्ह तै लिकाड़या, उस बखत मन्नै उन ताहीं होमबलि अर मेलबलि के बारै म्ह कुछ हुकम ना दिया था। 23फेर भी मन्नै तो उन ताहीं यो हुकम दिया के मेरे वचन ताहीं मान्नो#7:23 मेरे वचन ताहीं मान्नो बलि चढ़ाणा करार का अंतिम कारण न्ही सै, सदाकालीन आज्ञापालन सै।, फेर मै थारा परमेसवर होऊँगा, अर थम मेरी प्रजा ठहरोगे; अर जिस राह का मै थमनै हुकम दियुँ उसे म्ह चाल्लो, फेर थारा भला होवैगा। 24पर उननै मेरी ना सुणी अर ना मेरी बात्तां पै कान लगाया; वे अपणी ए युक्तियाँ अर अपणे बुरे मन कै हठ पै चाल्दे रहे अर पाच्छै हटगे पर आगै ना बढ़े। 25जिस दिन थारे पुरखा मिस्र देश तै लिकड़े, उस दिन तै आज ताहीं मै तो अपणे सारे दास्सां, नबियाँ ताहीं, थारे धोरै बड़ी कोशिश तै लगातार भेजदा रह्या; 26फेर भी उननै मेरी न्ही सुणी, ना अपणा कान लगाया; उननै हठ करया, अर अपणे पुरखां तै बढ़कै बुराईयाँ करी सैं।”
हुकम ना मानण आळे यहूदा खात्तर विलाप
27“तू सारी बात उनतै कहवैगा पर वे तेरी ना सुणैगें; तू उननै बुलावैगा, पर वे ना बोलैगें। 28फेर तू उनतै कह देन्दा, ‘या वोए जात्ति सै जो अपणे परमेसवर यहोवा की न्ही सुणदी, अर फटकार तै भी न्ही मान्दी; सच्चाई नाश होगी, अर उनके मुँह तै दूर होगी सै।’”
29“‘अपणे बाळ मुँण्डवाकै फेंक दे; मुँण्ड़े टील्यां पै चढ़कै विलाप का गीत गा, क्यूँके यहोवा नै इस बखत कै बासिन्दया पै छो करया अर उननै निकम्मा जाणकै छोड़ दिया सै।’”
30“यहोवा की या वाणी सै, इसका कारण यो सै के यहूदियाँ नै वो काम करया सै, जो मेरी नजर म्ह बुरा सै; उननै उस भवन म्ह जो मेरा कुहवावै सै, अपणी घृणित मूर्ति धरकै उस ताहीं अशुद्ध कर दिया सै।” 31अर उननै हिन्नोमवंशियाँ की तराई म्ह तोपेत नाम की ऊँच्ची जगहां बणाकै, अपणे बेट्टे-बेटियाँ ताहीं आग म्ह जळाया सै; जिसका हुकम मन्नै कदे भी न्ही दिया अर ना मेरे मन म्ह वो कदे आया। 32यहोवा की या वाणी सै, इस करकै इसे दिन आवै सैं के वो तराई फेर ना तो तोपेत की अर ना हिन्नोमवंशियाँ की कुह्वावैगी, बलके घात की तराई कुह्वावैगी; अर तोपेत म्ह इतणी कब्रां होवैगी के और जगहां ना रहवैगी। 33इस करकै इन माणसां की लाश अकास के पंछियाँ अर धरती के पशुआं का भोजन होवैगी, अर उननै भगाण आळा कोए ना रहवैगा। 34उस बखत मै इसा करुँगा के यहूदा के नगरां अर यरुशलेम की सड़कां म्ह ना तो खुशी अर आनन्द का शब्द सुणाई पड़ैगा, अर ना बन्दड़े अर ना बन्दड़ी का; क्यूँके देश उजाड़ ए उजाड़ हो जावैगा।#7:34 होशे. 2:11; यिर्म. 16:9
Currently Selected:
यिर्मयाह 7: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
