यिर्मयाह 30
30
गुलाम्मी तै छुटकारै का वादा
1यहोवा का जो वचन यिर्मयाह के धोरै पोहच्या वो यो सै: 2“इस्राएल का परमेसवर यहोवा तेरै तै न्यू कहवै सै, जो वचन मन्नै तेरै तै कहे सैं उन सारया नै किताब म्ह लिख ले। 3क्यूँके यहोवा की या वाणी सै, इसे दिन आवै सैं के मै अपणी इस्राएली अर यहूदी प्रजा नै गुलाम्मी तै बोहड़ा ल्याऊँगा; अर जो देश मन्नै उनके पितरां ताहीं दिया था उस म्ह उननै फेर ले आऊँगा, अर वे फेर उसके अधिकारी होवैंगें, यहोवा का योए वचन सै।”
4जो वचन यहोवा नै इस्राएलियाँ अर यहूदियाँ कै बारै म्ह कहे थे, वे ये सैं 5यहोवा न्यू कहवै सै: जो थरथरा देण आळा शब्द सुणाई देण लागरया सै#30:5 थरथरा देण आळा शब्द सुणाई देण लागरया सै भविष्यवक्ता अपणे सुणण आळयां नै बाबेल के बीच राखकै कहण लागरया सै अर के वे साइरस की आणआळी सेना की खबर सुणकै किस तरियां काँम्बण लागरे सै, उसका बखान करण लागरया सै।, वो शान्ति का न्ही, भय का ए सै। 6पूच्छो तो भला, अर देक्खो, के माणस कै भी किते जच्चा कै जिसी पीड़ा उठ्ठै सै? फेर के कारण सै कै सारे माणस जच्चा की तरियां अपणी-अपणी कमर अपणे हाथां तै दबाए होए दिखाई देवैं सैं? क्यूँ सारया के मुँह फिक्के रंग के होगे सैं? 7हाय, हाय, वो दिन कितना भारी होवैगा! उसकी तरियां अर कोए दिन न्ही; वो याकूब के संकट का बखत होवैगा; फेर भी वो उसतै छुड़ाया जावैगा। 8सेनाओं के यहोवा की या वाणी सै, के उस दिन मै उसका राख्या होया जूआ थारी गर्दन पै तै तोड़ देऊँगा, अर थारे बन्धनां ताहीं टुकड़े-टुकड़े कर देऊँगा; अर परदेशी फेर उनतै अपणी सेवा ना कराण पावैंगें#30:8 परदेशी फेर उनतै अपणी सेवा ना कराण पावैंगें यानिके उननै मजबूर करकै कोए मेहनत न्ही करवा पावैगा।। 9पर वे अपणे परमेसवर यहोवा अर अपणे राजा दाऊद की सेवा करैंगे जिसनै मै उनपै राज्य करण कै खात्तर ठहराऊँगा।#30:9 लूका. 1:69; प्रेरि. 2:30
10“इस करकै हे मेरे दास याकूब, तेरे खात्तर यहोवा की या वाणी सै, ना डर; हे इस्राएल, अचम्भित ना हो; क्यूँके मै दूर देश तै तेरे ताहीं अर तेरे खानदान ताहीं गुलाम्मी कै देश तै छुड़ाले आऊँगा। फेर याकूब बोहड़कै, चैन अर सुख तै रहवैगा, अर कोए उसनै डराण न्ही पावैगा। 11क्यूँके यहोवा की या वाणी सै, थारा उद्धार करण कै खात्तर मै थारे गैल सूं; इस करकै मै उन सारी जातियाँ का अन्त कर देऊँगा, जिन म्ह मन्नै उन ताहीं आस्सै-पास्सै करया सै, पर थारा अन्त ना करुँगा। थारी ताड़ना मै विचार करकै करुँगा, अर थमनै किसे तरियां तै निर्दोष ना ठहराऊँगा।”
सिय्योन के जख्मां की चंगाई
12“यहोवा न्यू कहवै सै: तेरे दुःख की कोए दवाई न्ही, अर तेरी चोट गहरी अर दुखदाई सै। 13तेरा मुकद्दमा लड़ण कै खात्तर कोए न्ही, तेरा जख्म बाँधण कै खात्तर ना पट्टी, ना मलहम सै। 14तेरे सारे दोस्त तेरे ताहीं भूलगे; वे थारी खबर न्ही लेन्दे; क्यूँके तेरे बड़े अधर्म अर भारी पापां कै कारण, मन्नै दुश्मन बणकै तेरे ताहीं मारया सै; मन्नै जुल्मी बणकै ताड़ना दी सै। 15तू अपणे जख्म कै मारे क्यूँ चिल्लावै सै? तेरी पीड़ा की कोए दवाई न्ही। तेरे बड़े अधर्म अर भारी पापां कै कारण मन्नै तेरै से इसा बरताव करया सै। 16पर जितने तेरे ताहीं इब खावै सैं, वे आप भी दुसरयां कै जरिये खाए जावैंगे, अर तेरे बैरी आप सारे के सारे गुलाम्मी म्ह जावैंगे; अर तेरे लूटण आळे आप लूटैंगे अर जितने तेरा धन खोस्सै सैं, उनका धन मै खुसवाऊँगा। 17मै तेरा ईलाज करकै तेरे जख्मां नै चंगा करुँगा, यहोवा की या वाणी सै; क्यूँके तेरा नाम ठुकराई होई पड़या सै: वो तो सिय्योन सै, उसकी चिन्ता कौण करै सै?”
18“यहोवा कहवै सै: मै याकूब के तम्बू नै गुलाम्मी तै बोहड़ा ल्याऊँगा अर उसके घरां पै दया करुँगा; अर नगर अपणे ए खण्डहर पै फेर बसैगा, अर राजभवन पैहले की तरियां फेर बण जावैगा।#30:18 यरुशलेम नगर 19फेर उड़ै रहण आळयां म्ह तै धन्य कहण, अर आनन्द करण का शब्द सुणाई देगा। 20मै उनका वैभव बढ़ाऊँगा, अर वे थोड़े ना होवैंगे। उनके बच्चे पुराणे बखत की तरियां होवैगें, अर उनकी मण्डळी मेरे स्याम्ही स्थिर रहवैगी; अर जितने उनपै अंधेर करै सैं उन ताहीं मै दण्ड देऊँगा। 21उनका अगुवा उन्हे म्ह तै होवैगा, अर जो उनपै प्रभुता करैगा, वो उन्हे म्ह तै पैदा होवैगा; मै उसनै अपणे धोरै बुलाऊँगा, अर वो मेरे धोरै आ भी जावैगा, क्यूँके कौण सै जो अपणे आप मेरे धोरै आ सकै सै? यहोवा की योए वाणी सै। 22उस बखत थम मेरी प्रजा ठहरोगे#30:22 उस बखत थम मेरी प्रजा ठहरोगे माणस परमेसवर न्ही हो सकदे जिब ताहीं के उन म्ह तै एक प्रगट ना हो एक माणस जो परमेसवर के धोरै आवै, परमेसवर ए होकै नाशवान अर अविनाशी के बीच जो खाई सै उसनै पाट ना दे।, अर मै थारा परमेसवर ठहरूँगा।”
23देक्खो, यहोवा की जळजळाहट की आँधी चालण लाग्गी सै! वा घणी भयानक आँधी सै; दुष्टां के सिर पै वो जोर तै लाग्गैगी। 24जिब तक यहोवा अपणा काम ना कर लेवै अर अपणी तरकिबां ताहीं पूरी ना कर लेवै, जिब ताहीं उसका भड़का होया छो शान्त ना होवैगा। अन्त कै दिनां म्ह थम इस बात नै समझ सकोगे।
Currently Selected:
यिर्मयाह 30: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
