यहेजकेल 39

गोग की सेनाओं का नाश करया जाणा

1“फेर हे माणस की सन्तान, गोग कै बिरुध्द भविष्यवाणी करकै न्यू कह, हे गोग, हे रोश, मेशेक अर तूबल के प्रधान, परमेसवर यहोवा न्यू कहवै सै: मै तेरै खिलाफ सूं। 2मै तेरे ताहीं घुमा ले आऊँगा, अर उत्तर दिशा के दूर-दूर देशां तै चढ़ा ले आऊँगा, अर इस्राएल के पहाड़ां पै पोहचाऊँगा। 3ओड़ै मै तेरा धनुष तेरे ओळे हाथ तै गिराऊँगा, अर तेरे तीरां नै तेरे सोळे हाथ तै गिरा देऊँगा। 4तू अपणे सारे दलां अर अपणे गैल की सारी जात्तां समेत इस्राएल के पहाड़ां पै मार गेरया जावैगा; मै तेरै ताहीं ढाळ-ढाळ के माँसाहारी पंछियाँ अर जंगळी-पशुआं का भोजन कर दियुँगा। 5तू खेत म्ह गिरैगा, क्यूँके मन्‍नै ए इसा कह्या सै, परमेसवर यहोवा की याए वाणी सै। 6मै मागोग म्ह अर द्वीपां के निडर रहण आळयां#39:6 द्वीपां के निडर रहण आळयां सजा किनारे आळे परदेसां ताहीं यो दिखाण कै खात्तर बढ़ाया गया के यो ना सिर्फ गोग अर उसकी धरती पै पड़णा चाहिए, बल्कि उन माणसां पै जो परमेसवर के राज्य के प्रति घृणा अर बिरोध म्ह गोग के सहभागी सैं। कै बीच आग लगाऊँगा; अर वे जाण लेवैंगे के मै यहोवा सूं।”

7“मै अपणी प्रजा इस्राएल कै बिचाळै अपणा नाम प्रगट करुँगा; अर अपणा पवित्र नाम फेर अपवित्र न्ही होण देऊँगा; फेर जात-जात के माणस भी जाण लेवैंगे के मै यहोवा, इस्राएल का पवित्र सूं। 8यो घटना होण आळी सै अर वो हो जावैगी, परमेसवर यहोवा की याए वाणी सै। यो वोए दिन सै जिसका जिक्र मन्‍नै करया सै।”

9“फेर इस्राएल के नगरां के रहण आळे लिकड़ैंगे अर हथियारां म्ह आग लगाकै जळा देवैंगे, ढाल, अर फरी, धनुष, अर तीर, लाठ्ठी, बर्छे, सारे नै वे सात साल ताहीं जळान्दे रहवैंगे। 10इस कारण वे मैदान म्ह लाकड़ी ना चुगैंगे, ना जंगळ म्ह काटैगें, क्यूँके वे हथियारां ए नै जळाया करैंगे; वे अपणे लूटण आळयां नै लूटैंगे, अर अपणे छीनण आळयां पै तै छीनैंगे, परमेसवर यहोवा की याए वाणी सै।”

गोग का कब्रिस्तान

11“उस बखत मै गोग नै इस्राएल के देश म्ह कब्रिस्तान देऊँगा, वो ताल की पूर्व ओड़ होवैगा; वो आण-जाण आळयां की तराई कुह्वावैगी, अर आण-जाण आळयां नै ओड़ै रुकणा पड़ैगा; ओड़ै सारी भीड़ समेत गोग ताहीं माट्टी दी जावैगी अर उस जगहां का नाम गोग की भीड़ की तराई पड़ैगा। 12इस्राएल का घरान्‍नां उननै सात महिन्‍ने ताहीं माट्टी देन्दा रहवैगा ताके अपणे देश नै शुद्ध करै। 13देश के सारे माणस मिलकै उननै माट्टी देंवैंगे; अर जिस बखत मेरी महिमा होवैगी, उस बखत उनका भी नाम बड़ा होवैगा, परमेसवर यहोवा की याए वाणी सै। 14फेर वे माणसां नै ठहराया करैंगे, जो लगातार इसे काम म्ह लाग्गे रहवैंगे, यानिके देश म्ह घूम-घूमकै आण-जाण आळयां कै गैल होकै देश नै शुद्ध करण कै खात्तर उन ताहीं जो धरती कै उप्पर पड़े हों, माट्टी देंवैंगे; अर सातवें महिन्‍ने के बीतण तक वे ढूँढ़-ढूँढ़ कै यो काम करदे रहवैंगे। 15देश म्ह आण-जाण आळयां म्ह तै जिब कोए माणस की हाड्डी देक्खै, फेर उसके धोरै एक निशान खड़या करैगा, यो उस बखत ताहीं बण्या रहवैगा जिब ताहीं माट्टी देण आळे उसनै गोग की भीड़ की तराई म्ह गाड़ ना दें। 16ओड़ै के नगर का नाम भी ‘हमोना’ सै। इस तरियां देश शुद्ध करया जावैगा।”

एक जीत का जशन

17“फेर हे माणस की सन्तान, परमेसवर यहोवा न्यू कहवै सै: ढाळ-ढाळ के सारे पंछियाँ अर सारे जंगळी-पशुआं नै हुकम दे, कठ्ठे होकै आओ, मेरे इस बड़े यज्ञ म्ह जो मै थारे खात्तर इस्राएल के पहाड़ां पै करुँ सूं, हर एक दिशा तै कठ्ठे हो के थम माँस खाओ अर लहू पीओ। 18थम शूरवीरां का माँस खाओगे, अर धरती के प्रधानां का लहू पीओगे अर मिंढयाँ, मेमन्याँ, बकरयां अर बळधां का भी जो सारे के सारे बाशान के त्यार करे होए होवैंगे। 19मेरे उस भोज की चर्बी तै जो मै थारे खात्तर करुँ सूं, थम खान्दे-खान्दे अक जाओगे, अर उसका लहू पीन्दे-पीन्दे छिक जाओगे। 20थम मेरी मेज पै घोड़यां, सवारां, शूरवीरां, अर सारे ढाळ के योद्धयां तै छिक जाओगे, परमेसवर यहोवा की याए वाणी सै।”

इस्राएल का दोबारा बणाया जाणा

21“मै जात-जात कै बिचाळै अपणी महिमा प्रगट करुँगा, अर जात्ति-जात्ति के सारे माणस मेरे न्याय के काम जो मै करुँगा, अर मेरा हाथ जो उनपै पड़ैगा, देख लेवैंगे। 22उस दिन तै आगै इस्राएल का घरान्‍नां जाण लेवैगा के यहोवा म्हारा परमेसवर सै। 23जात्ति-जात्ति के माणस भी जाण लेवैंगे के इस्राएल का घरान्‍नां अपणे अधर्म कै कारण गुलाम्मी म्ह गया था; क्यूँके उननै मेरे ताहीं इसा धोक्खा दिया के मन्‍नै अपणा मुँह उनतै मोड़ लिया अर उन ताहीं उनके बैरियाँ के बस म्ह कर दिया, अर वे सारे तलवार तै मारे गये। 24मन्‍नै उनकी अशुद्धता अर अपराध्धां कै मुताबिक उनतै बरताव करकै उनतै अपणा मुँह मोड़ लिया था।”

25“इस करकै परमेसवर यहोवा न्यू कहवै सै: इब मै याकूब नै गुलाम्मी तै बोहड़ा ल्याऊँगा, अर इस्राएल के सारे घरान्‍ने पै दया करुँगा; अर अपणे पवित्र नाम कै खात्तर मन्‍नै जळण होवैगी। 26फेर उस सारी धोक्खेबाजी कै कारण जो उननै मेरे खिलाफ करी वे शर्मिन्दा होवैंगे; अर अपणे देश म्ह निडर रहैवैंगे; अर कोए उननै ना डरावैगा। 27जिब मै उननै जात-जात कै बिचाळै तै बोहड़ा ल्याऊँगा, अर उन दुश्मनां के देशां तै कठ्ठा करुँगा, फेर घणी जात्तां की नजर म्ह उनके जरिये पवित्र ठहरूँगा। 28फेर वे जान लेवैंगे के यहोवा म्हारा परमेसवर सै, क्यूँके मन्‍नै उन ताहीं जात्ति-जात्ति म्ह गुलाम करकै फेर उनके खास देश म्ह कठ्ठा करया सै। मै उन म्ह तै किसे नै फेर परदेस म्ह ना छोड़ूँगा, 29अर उनतै अपणा मुँह फेर कदे ना मोडुगां, क्यूँके मन्‍नै इस्राएल के घरान्‍ने पै अपणा आत्मा उण्डेल्या सै, परमेसवर यहोवा की याए वाणी सै।”

Currently Selected:

यहेजकेल 39: BGC

Highlight

Copy

Compare