यहेजकेल 23

दो भाण वेश्या

1यहोवा का यो वचन मेरे धोरै पोहच्या 2“हे माणस की सन्तान, दो जनान्‍नी थी, जो एके माँ की बेट्टी थी। 3वे अपणे बचपन म्ह ए वेश्या का काम मिस्र म्ह करण लाग्गी; उनकी छातियाँ कुँवारेपण म्ह पैहल्या ओड़ैए दबाई गई अर उनका मरदन भी होया। 4उन छोरियाँ म्ह तै बड़ी का नाम ओहोला अर उसकी भाण का नाम ओहोलीबा था। वे मेरी होगी, अर उनके बेट्टे-बेटियाँ पैदा होए। उनके नाम्मां म्ह तै ओहोला तो सामरिया, अर ओहोलीबा यरुशलेम सै।”

बड़ी भाण, सामरिया

5“ओहोला जिब मेरी थी, जिब तै ए व्यभिचारिणी होकै अपणे दोस्तां पै मोहित होण लाग्गी जो उसके पड़ोसी अश्शूरी थे। 6वे तो सारे के सारे नीले कपड़े पैहरण आळे मनभावणे जवान, अधिपति अर प्रधान थे, अर घोड़यां पै सवार थे। 7इस करकै उसनै उन्हे कै गैल व्यभिचार करया जो सारे के सारे आच्छे अश्शूरी थे; अर जिस किसे पै वा मोहित होई, उसे की मूरतां तै वो अशुद्ध होई। 8जो व्यभिचार उसनै मिस्र म्ह सिख्या था, उस ताहीं भी उसनै ना छोड्या; क्यूँके बचपन म्ह माणसां नै उसकै गैल कुकर्म करया, अर उसकी छातियाँ मींजी, अर तन-मन तै उसके गैल व्यभिचार करया गया था। 9इस कारण मन्‍नै उस ताहीं उन्हे अश्शूरी दोस्तां के हाथ कर दिया जिनपै वा मोहित होई थी। 10उननै उस ताहीं नंगी करया; उसके बेट्टे-बेटियाँ ताहीं खोसकै उस ताहीं तलवार तै घात करया; इस तरियां उनके हाथ तै सजा पाकै वो जनानियाँ म्ह मशहुर होगी।”

छोट्टी भाण, यरुशलेम

11“उसकी भाण ओहोलीबा नै यो देख्या, फेर भी वो मोहित होकै व्यभिचार करण म्ह अपणी भाण तै भी घणी बढ़गी। 12वो अपणे अश्शूरी पड़ोसियाँ पै मोहित होवै थी, जो सारे के सारे घणे सुथरे कपड़े पैहरण आळे अर घोड़यां के सवार मनभावणे, जवान अधिपति अर सारे ढाळ के प्रधान थे। 13फेर मन्‍नै देख्या के वो भी अशुद्ध होगी; उन दोन्‍नु भाणां की एके चाल थी। 14पर ओहोलीबा घणा व्यभिचार करदी गई; अंत म्ह जिब उसनै दीवार पै सेंदूर तै खींची होई कसदी माणसां की तस्वीर देक्खी, 15जो कमर म्ह फेंटे बाँधे होए, सिर म्ह छोर लटकदी होई रंगीली पगड़ियाँ पैहरे होए, अर सारे के सारे अपणी कसदी जन्म-भूमि यानिके बाबेल के माणसां की रीति पै प्रधानां का रूप धरे होए थे, 16फेर उननै देखदे ए वो उनपै मोहित होई अर उनके धोरै कसदियाँ के देश म्ह दूत भेज्जे। 17इस करकै बाबेली उसके धोरै पलंग पै आए, अर उसके गैल व्यभिचार करकै उस ताहीं अशुद्ध करया; अर जिब वो उनतै अशुद्ध होगी, फेर उसका मन उनतै मुड़ ग्या। 18फेर भी जिब वो देह उघाड़दी अर व्यभिचार करदी गई, फेर मेरा मन जिस तरियां उसकी भाण तै मुड़ ग्या था, उसे तरियां उसतै भी मुड़ ग्या। 19इसपै भी वो मिस्र देश के अपणे बचपन के दिन याद करकै जिब वो वेश्या का काम करै थी, अर घणा व्यभिचार करदी गई; 20अर इसे दोस्तां पै मोहित होई, जिनका अंग गध्यां का जिसा, अर वीर्य घोड़यां का जिसा था। 21तू इस तरियां तै अपणे बचपन के उस बखत के महापाप की याद करावै सै जिब मिस्री माणस तेरी छातियाँ नै मींजै थे।”

यरुशलेम पै न्याय

22इस कारण हे ओहोलीबा, परमेसवर यहोवा तेरे तै न्यू कहवै सै: “देख, मै तेरे दोस्तां नै उभार कै जिनतै तेरा मन मुड़ ग्या च्यांरु ओड़ तै तेरै खिलाफ ले आऊँगा। 23यानिके बाबेली अर सारे कसदियाँ नै, अर पकोद, शोया अर कोआ के माणसां नै; अर उनकै गैल सारे अश्शूरियां नै ल्याऊँगा जो सारे के सारे घोड़यां के सवार मनभावणे जवान अधिपति, अर कई ढाळ के प्रतिनिधि, प्रधान अर नाम्मी माणस सैं। 24वे माणस हथियार, रथ, छकड़े अर देश-देश के माणसां का दल लेकै, तेरै पै चढ़ाई करैंगे; अर ढाल अर फरी अर टोप धारण करे होए तेरै खिलाफ च्यांरु ओड़ कतार बाँधैगें; अर मै उन्हे के हाथ न्याय का काम सौंप्पूँगा, अर वे अपणे-अपणे नियम कै मुताबिक तेरा न्याय करैंगे। 25मै तेरे पै जळूंगा, जिसतै वे जळजळाहट कै गैल तेरे तै बरताव करैंगे। वे तेरी नाक अर कान काट लेवैंगे, अर तेरा जो भी बच्या रहवैगा वो तलवार तै मारया जावैगा। वे तेरे बेट्टे-बेटियाँ नै छीन ले जावैंगे, अर तेरा जो भी बच्या रहवैगा, वो आग तै भस्म हो जावैगा। 26वे तेरे कपड़े भी उतारकै तेरे सुन्दर-सुन्दर गहणे छीन ले जावैंगे। 27इस तरियां तै मै तेरा महापाप अर जो वेश्या का काम तन्‍नै मिस्र देश म्ह सिख्या था, उसनै भी तेरे तै छुड़ाऊँगा, उरै ताहीं के तू फेर अपणी आँख उनकी ओड़ ना लगावैगी अर ना मिस्र देश नै फेर याद करैगी। 28क्यूँके प्रभु यहोवा तेरे तै न्यू कहवै सै: देख, मै तेरे ताहीं उनके हाथ सौंप्पूँगा जिनतै तू बैर राक्खै सै अर जिनतै तेरा मन मुड़ ग्या सै; 29अर वे तेरे तै बैर कै गैल बरताव करैंगे, अर तेरी सारी कमाई नै ठा लेवैंगे, अर तेरे ताहीं नंगा करकै छोड़ देवैंगे, अर तेरे देह के उघाड़े जाण तै तेरा व्यभिचार अर महापाप प्रगट हो जावैगा। 30ये काम तेरे तै इस कारण करे जावैंगे क्यूँके तू गैरजात्तां कै पाच्छै व्यभिचारिणी की तरियां होगी, अर उनकी मूरतां नै पूज कै अशुद्ध होगी सै। 31तू अपणी भाण की लीक पै चाल्‍ली सै; इस कारण मै तेरे हाथ म्ह उसका जिसा कटोरा देऊँगा। 32प्रभु यहोवा न्यू कहवै सै, अपणी भाण के कटोरे तै तेरे ताहीं पीणा पड़ैगा जो ढुंघा अर चौड़ा सै; तू हाँस्सी अर मजाक म्ह उड़ाई जावैगी, क्यूँके उस कटोरे म्ह घणा कुछ समावै सै। 33तू मतवाळेपण अर दुःख तै छिक जावैगी। तू अपणी भाण सामरिया के कटोरे नै, यानिके बर्बादी अर उजाड़ नै पीकै छिक जावैगी। 34उस म्ह तै तू तळी-तळी ताहीं पीवैगी, अर उसके ठीकरयां नै भी चबावैगी अर अपणी छातियाँ ताहीं घायल करैगी; क्यूँके मन्‍नै ए इसा कह्या सै, प्रभु यहोवा की याए वाणी सै। 35तन्‍नै जो मेरे ताहीं भूला दिया सै अर अपणा मुँह मेरे तै फेर लिया सै, इस करकै तू आप्पे अपणे महापाप अर व्यभिचार का भार ठा, परमेसवर यहोवा का योए वचन सै।”

दोन्‍नु भाणां नै परमेसवर की सजा

36यहोवा नै मेरे ताहीं कह्या, “हे माणस की सन्तान, के तू ओहोला अर ओहोलीबा का न्याय करैगा? तो फेर उनके घिनोणे काम उनतै बता दे। 37क्यूँके उननै व्यभिचार करया सै, अर उनके हाथां म्ह खून लाग्या सै; उननै अपणी मूरतां कै गैल व्यभिचार करया, अर अपणे बाळकां ताहीं जो मेरे तै पैदा होए थे, उन मूरतां कै आगै भस्म होण कै खात्तर चढ़ाए सैं। 38फेर उननै मेरे तै इसा बरताव भी करया के उसे कै गैल मेरे पवित्रस्‍थान ताहीं भी अशुद्ध करया अर मेरे विश्रामदिनां ताहीं अपवित्र करया सै। 39वे अपणे बच्‍चे अपणी मूरतां कै स्याम्ही बलि चढ़ाकै उसे दिन मेरा पवित्रस्‍थान अपवित्र करण नै उस म्ह घुसी#23:39 मेरा पवित्रस्‍थान अपवित्र करण नै उस म्ह घुसी यहोवा नै देवत्यां की सूची म्ह धरया गया था, उसनै एकमात्र परमेसवर न्ही मान्या गया। परमेसवर के भवन के गैल म्ह मूरत अर मूरतां के मन्दर बणाए गये थे पर गैल ए यहोवा के मन्दर म्ह आराधना करी जा रही थी यिर्म. 32:34.। देख, उननै इस तरियां का काम मेरे भवन के भित्तर करया सै। 40उननै दूर तै माणसां ताहीं बुलवा भेज्या, अर वे चाल्‍ले भी आए। उनके खात्तर तू नहा धो, आँख्यां म्ह सुरमा लगा, गहणे पैहरकै; 41सुन्दर पलंग पै बैठी रही; अर तेरे स्याम्ही एक मेज बिछी होई थी, जिसपै तन्‍नै मेरा धूप अर मेरा तेल धरया था। 42फेर उसके गैल बेफिकर माणसां की भीड़ का शोर-सराबा सुणाई पड़या, अर उन आम माणसां के धोरै जंगळ तै बुलाए होए पियक्‍कड़ माणस भी थे; उननै उन दोन्‍नु भाणां के हाथां म्ह चूड़ियाँ पिराई, अर उनके सिर पै शोभायमान मुकुट धरे।”

43“फेर जो व्यभिचार करदे-करदे बुढ़िया होगी थी, उसके बारै म्ह बोल उठ्या, इब तो वे उसे कै गैल व्यभिचार करैंगे। 44क्यूँके वे उसके धोरै इसे गये जिस तरियां माणस वेश्या कै धोरै जावै सैं। उसे तरियां वे ओहोला अर ओहोलीबा नाम की महापापण जनानियाँ के धोरै गये। 45अंत म्ह धर्मी माणस व्यभिचारिणियाँ अर हत्यारां के लायक उसका न्याय करैं; क्यूँके वे व्यभिचारिणियाँ अर हत्यारां की तरियां उसका न्याय करैं; क्यूँके वे व्यभिचारिणी सै, अर उनके हाथां म्ह खून लाग्या सै।”

46इस कारण परमेसवर यहोवा न्यू कहवै सै: “मै एक भीड़ तै उनपै चढ़ाई कराकै उननै इसा करुँगा के वे मारी-मारी फिरैगी अर लूट्टी जावैंगी। 47उस भीड़ के माणस उननै पत्थर मारकै उन ताहीं अपणी तलवारां तै काट डालैंगे, फेर वे उनके बेट्टे-बेटियाँ नै घात करकै उनके घर भी आग लगाकै फूँक देवैंगे। 48इस तरियां मै महापाप नै देश म्ह तै दूर करुँगा, अर सारी जनान्‍नी शिक्षा पाकै थारे जिसा महापाप करण तै बची रहवैगी। 49थारा महापाप थारे ए सिर पड़ैगा; अर थम पक्‍का अपणी मूरतां की पूजा के पापां का भार ठाओगे; अर फेर थम जाण ल्योगे के मै परमेसवर यहोवा सूं।”

Currently Selected:

यहेजकेल 23: BGC

Highlight

Copy

Compare