यहेजकेल 21

बाबेल, परमेसवर की तलवार

1यहोवा का यो वचन मेरे धोरै पोहच्या 2“हे माणस की सन्तान, अपणा मुँह यरुशलेम की ओड़ कर अर पवित्रस्‍थानां की ओड़ वचन सुणा; इस्राएल देश कै बारै म्ह भविष्यवाणी कर अर उसतै कह, 3प्रभु यहोवा न्यू कहवै सै, देख, मै तेरै खिलाफ सूं, अर अपणी तलवार म्यान म्ह तै खींचकै तेरे म्ह तै धर्मी अर अधर्मी दोनुआं नै नाश करुँगा। 4इस करकै के मै तेरे म्ह तै धर्मी अर अधर्मी सारया नै नाश करण आळा सूं, इस कारण मेरी तलवार म्यान तै लिकड़कै दक्षिण तै उत्तर ताहीं सारे प्राणियाँ कै खिलाफ चाल्‍लैगी; 5फेर सारे प्राणी जाण लेवैंगे के यहोवा नै म्यान म्ह तै अपणी तलवार खींची सै; अर वो उस म्ह फेर धरी ना जावैगी। 6इस करकै हे माणस की सन्तान, तू आह मार, भारी दुख कर, अर टूटी कमर लेकै माणसां कै स्याम्ही आह मार। 7जिब वे तेरै तै पूछै, ‘तू क्यूँ आह मारै सै,’ फेर कहणा, ‘खबर कै कारण। क्यूँके इसी बात आणआळी सै के सारया के मन टूट जावैंगे अर सारया के हाथ ढील्‍ले पड़ैंगे, सारया की आत्मा बेबस अर सारया के घुटने कमजोर हो जावैंगे। देक्खो, इसीए बात आणआळी सै, अर वो जरुर पूरी होवैगी,’” परमेसवर यहोवा की याए वाणी सै।

8फेर यहोवा का यो वचन मेरे धोरै पोहच्या, 9“हे माणस की सन्तान, भविष्यवाणी करकै कह, परमेसवर यहोवा न्यू कहवै सै, देख, धार लगाई होई तलवार, अर झलकाई होई तलवार! 10वो इस करकै धार लगाई गई के उसतै घात करया जावै, अर इस ताहीं झलकाई गई के बिजळी की तरियां चमकै! तो के हम खुश होवां? वो तो यहोवा के बेट्टे का राजदण्ड सै अर सारे दरखतां नै निकम्मा जाणण आळा सै। 11वो झलकाण नै इस करकै देई गई के हाथ म्ह ली जावै; वो इस करकै धार लगाई अर झलकाई गई के घात करण आळयां के हाथ म्ह दी जावै। 12हे माणस की सन्तान चिल्‍ला, अर हाय, हाय, कर! क्यूँके वो मेरी प्रजा पै चालण आळी सै, वो इस्राएल के सारे प्रधानां पै चालण आळी सै; मेरी प्रजा कै गैल वे भी तलवार के बस म्ह आगे। इस कारण तू अपणी छात्ती पीट। 13क्यूँके सचमुच उसकी जाँच होई सै, अर जै उसनै निकम्मा जाणण आळा राजदण्ड भी ना रहे, तो के? परमेसवर यहोवा की याए वाणी सै।”

14“इस करकै हे माणस की सन्तान, भविष्यवाणी कर, अर हाथ पै हाथ दे मार, अर तीन बार तलवार का बल दुगणा करया जावै; वो तो घात करण की तलवार बलके बड़े तै बड़े के घात करण की तलवार सै, जिसतै कोठड़ियाँ म्ह भी कोए न्ही बच सकदा। 15मन्‍नै घात करण आळी तलवार ताहीं उनके सारे फाटकां के खिलाफ इस करकै चलाया सै के माणसां के मन टूट जावैं, अर वे घणी ठोक्‍कर#21:15 घणी ठोक्‍कर यानिके उनके गिरण कै कारण घणा अनगिणत हो सकै। खावैं। हाय, हाय! वो तो बिजळी की तरियां बणाई गई, अर घात करण नै धार लगाई गई सै। 16सिकुड़कै ओळी ओड़ जा, फेर त्यार होकै ओळी ओड़ मुड़, जितोड़ भी तेरा मुँह हो। 17मै भी ताड़ी बजाऊँगा अर अपणी जळजळाहट नै ठण्डा करुँगा, मन्‍नै यहोवा नै इसा कह्या सै।”

अधर्म का याद करया जाणा

18फेर यहोवा का यो वचन मेरे धोरै पोहच्या: 19“हे माणस की सन्तान, दो राह ठहरा ले के बाबेल के राजा की तलवार आवै; दोन्‍नु राह एके देश तै लिकड़ै! फेर एक निशान्‍नी कर, यानिके नगर के राह के सिर पै एक निशान्‍नी कर; 20एक राह ठहराकै तलवार अम्मोनियाँ के रब्‍बाह नगर पै, अर यहूदा देश के गढ़आळे नगर यरुशलेम पै भी चाल्‍लै। 21क्यूँके बाबेल का राजा चौराहे यानिके दोन्‍नु राह के लिकड़ण की जगहां पै भावी बुझण नै खड़या होया सै, उसनै तीरां ताहीं हिला दिया, अर गृहदेवत्यां तै सवाल करया, अर कळेजे ताहीं भी देख्या। 22उसके ओळी हाथ म्ह यरुशलेम का नाम सै के वो उसकी ओड़ युद्ध के यन्त्र लगावै, अर गळा पाड़कै घात करण के हुकम देवै अर ऊँच्‍चे शब्द तै ललकारै, फाटकां की ओड़ युद्ध के यन्त्र लगावै अर दमदमा बाँधे अर कोट बणावै। 23पर माणस तो उस भावी कहण नै झूठ समझैगें#21:23 समझैगें यहूदी अपणे बेकार के आत्मबिश्वास बाबेल के भावी कहण आळयां की झूठ्ठी अर निराधार उम्मीद पै निर्भर करैंगे।; उननै जो उनकी कसम खाई सै; इस कारण वो उनके अधर्म की याद कराकै उननै पकड़ लेवैगा।”

24“इस कारण प्रभु यहोवा न्यू कहवै सै: इस कारण के थारा अधर्म जो याद करया गया सै, अर थारे अपराध जो खुलगे सैं, क्यूँके थारे सारे काम्मां म्ह पाप ए पाप दिखाई पड़या सै, अर थारी याद म्ह आए हो, इस करकै थम उनतै पकड़े जाओगे। 25हे इस्राएल दुष्ट प्रधान, तेरा दिन आ ग्या सै; अधर्म के अन्त का बखत पोहच ग्या सै। 26तेरे बारे म्ह परमेसवर यहोवा न्यू कहवै सै: पगड़ी उतार, अर मुकुट भी उतार दे; वो ज्यों का त्यों न्ही रहण का; जो नीच्‍चा सै उसनै ऊँच्‍चा कर अर जो ऊँच्‍चा सै उसनै नीच्‍चा कर। 27मै इसनै उलट दियुँगा अर उलट-पुलट कर देऊँगा; हाँ उलट दियुँगा अर जिब ताहीं उसका अधिकारी ना आवै तब ताहीं वो उलटा होया रहवैगा; फेर मै उसनै दे देऊँगा।”

अम्मोनियाँ की बेजती का बदला

28“फेर हे माणस की सन्तान, भविष्यवाणी करकै कह के प्रभु यहोवा अम्मोनियाँ अर उनकी करी होई बदनाम्मी कै बारै म्ह न्यू कहवै सै; तू कह, खींची होई तलवार सै, वो तलवार घात कै खात्तर झलकाई होई सै के नाश करै अर बिजळी की तरियां हो 29जिब ताहीं के वे तेरे बारे म्ह झूठ्ठे दर्शन पावै, अर झूठ्ठे भावी तेरे ताहीं बतावै सैं के तू उन दुष्ट लाईलाज घायलां की गर्दनां पै पड़ै जिनका दिन आ ग्या, अर जिनके अधर्म के अन्त का बखत आण पोहच्या सै। 30उस ताहीं म्यान म्ह फेर धर। जिस जगहां म्ह तू सिरजी गई अर जिस देश म्ह तेरी उत्पत्ति होई, उसे म्ह मै तेरा न्याय करुँगा। 31मै तेरे पै अपणा छो भड़काऊँगा अर तेरे पै अपणी जळजळाहट की आग फूँक दियुँगा; अर तेरे ताहीं पशु सरीखे माणस के हाथ कर देऊँगा जो नाश करण म्ह माहिर सैं। 32तू आग का निवाळा होवैगी; तेरा खून देश म्ह बण्या रहवैगा; तू याद म्ह ना रहवैगी क्यूँके मन्‍नै यहोवा ए नै इसा कह्या सै।”

Currently Selected:

यहेजकेल 21: BGC

Highlight

Copy

Compare