यहेजकेल 17

उकाबां का उदाहरण

1यहोवा का यो वचन दोबारा मेरै धोरै पोहच्या, 2“हे माणस की सन्तान, इस्राएल के माणसां तै यो पहेली अर उदाहरण कह; प्रभु यहोवा न्यू कहवै सै, 3एक लाम्बे पंखआळे, परां तै भरे अर रंग-बिरंगे बड़े उकाब पंछी नै लबानोन जाकै एक देवदार की फुनगी नोच ली। 4फेर उसनै उस फुनगी की सबतै उप्पर की पतळी डाळी ताहीं तोड़ लिया, अर उसनै लेण-देण करण आळयां के देश म्ह ले जाकै व्यापारियाँ के एक नगर म्ह लगाया। 5फेर उसनै इस्राएल देश का वो बीज लेकै एक उपजाऊ खेत म्ह बोया, अर उसनै घणे पाणी भरी जगहां म्ह मजनू की तरियां लगाया। 6वो उगकै छोट्टी फैलण आळी अंगूर की बेल होगी जिसकी डाळी उसकी ओड़ झुकी, अर उसकी जड़ उसके नीच्‍चै फैल्‍ली; इस तरियां तै वो अंगूर की बेल होकै कनखा फोड़ण अर पत्यां तै भरण लाग्गी।”

7“फेर एक और लाम्बे पंख आळा अर परां तै भरया होया बड़ा उकाब पंछी#17:7 बड़ा उकाब पंछी यो मिस्र का राजा था जो शक्तिमान तो था पर पैहले आळे की तरियां न्ही। था; अर वो अंगूर की बेल उस जगहां तै जड़ै वो लगाई गई थी, उस दुसरे उकाब की ओड़ अपणी जड़ फैलाण अर अपणी डाळी झुकाण लाग्गी के वो उसनै खींच्या करै। 8पर वो तो इस ताहीं आच्छी धरती म्ह घणे पाणी कै धोरै लगाई गई थी, के कनखाएँ फोड़े, अर फळे, अर बढ़िया अंगूर की बेल बणै। 9इस करकै तू यो कह, के प्रभु यहोवा न्यू पूच्छै सै: के वो फुल्‍लै फळैगी? के वो उस ताहीं जड़ तै ना उखाड़ैगा, अर उसके फळां नै ना झड़वावैगा के वो अपणे सारे हरे नए पत्यां समेत सूख जावै? इसनै जड़ तै उखाड़ण कै खात्तर घणा जोर अर घणे माणसां की जरूरत ना होवैगी। 10चाहे, वो लाग्गी भी रहवै, फेर भी के वो फुल्‍लै फळैगी? जिब पुरवाई उसनै लाग्गै, फेर के वो बिलकुल सूख न्ही जावैगी? वो तो जड़ै उगी सै उसे क्यारी म्ह सूख जावैगी।”

उदाहरण का मतलब

11फेर यहोवा का यो वचन दोबारा मेरे धोरै पोहच्या “उस धोक्खा देण आळे घरान्‍ने तै कह, 12इन बिद्रोही माणसां तै पूछो के थम इन बात्तां का मतलब न्ही समझदे? फेर उनतै कह, बाबेल के राजा नै यरुशलेम जाकै उसके राजा अर प्रधानां ताहीं लेकै अपणे उरै बाबेल म्ह पोहचाया। 13फेर राजवंश म्ह तै एक माणस नै लेकै उसतै करार करया, अर उस ताहीं वश म्ह रहण की कसम खुवाई, अर देश के ताकतवर माणसां नै लेग्या।#17:13 नबूकदनेस्सर नै सिदकिय्याह ताहीं चुण्या, जो यहूदा के राजा यहोयाकीन का चाचा था। 14के वो यहूदा का राज्य कमजोर रहवै अर सिर ना ठा सकै, बलके करार करण तै स्थिर रहवै। 15तोभी यहूदा के इस नए राजा सिदकिय्याह नै घोड़े अर बड़ी सेना माँगण ताहीं अपणे दूत मिस्र म्ह भेजकै बेबीलोन के राजा तै बिद्रोह करया। के वो फूल्‍लैगा फळैगा? के इसे काम्मां का करण आळा बचैगा? के वो अपणा करार तोड़ण पै भी बच जावैगा? 16प्रभु यहोवा न्यू कहवै सै, मेरे जीवन की कसम, जिस राजा की खुवाई होई कसम उसनै निकम्मी जाणी, अर जिसका करार उसनै ताेड़या, उसके उरै जिसनै उस ताहीं राजा बणाया था, यानिके बाबेल म्ह ए वो उसके धोरै ए मर जावैगा। 17जिब वे घणे प्राणियाँ नै नाश करण कै खात्तर मोर्चा बाँधै, अर गढ़ बणावै, फेर फिरौन अपणी बड़ी सेना अर घणखरयां की मण्डळी होन्दे भी युद्ध म्ह उसकी मदद ना करैगा। 18क्यूँके यहूदा के राजा नै कसम ताहीं निकम्मा जाण्या, अर करार ताहीं ताेड़या; देक्खो, उसनै वचन देण पै भी इसे-इसे काम करे सैं, इस करकै वो बचण न्ही पावैगा। 19प्रभु यहोवा न्यू कहवै सै: मेरे जीवन की कसम, उसनै मेरी कसम ताहीं निकम्मा जाण्या, अर मेरा करार ताेड़या सै; यो पाप मै सिदकिय्याह के सिर पर गेरूँगा। 20मै अपणा जाळ सिदकिय्याह पै फैलाऊँगा अर वो मेरे फंदे म्ह फँसैगा; अर मै उस ताहीं बाबेल म्ह पोंहचाकै उस धोक्खेबाज का मुकद्दमा उसतै लड़ूँगा, जो उसनै मेरे तै करया सै। 21उसके सारे बढ़िया सैनिकां म्ह तै जितने भाजगे वे सारे तलवार तै मारे जावैंगे, अर जो रह जावै वे च्यांरु दिशा म्ह तित्तर-बितर हो जावैंगे। फेर थम माणस जाण ल्योगे के मन्‍नै यहोवा ए नै इसा कह्या सै।”

परमेसवर की प्रतिज्ञा

22फेर प्रभु यहोवा न्यू कहवै सै: “मै भी देवदार की ऊँच्‍ची फुंगळ म्ह तै कुछ लेकै लगाऊँगा#17:22 मै भी देवदार की ऊँच्‍ची फुंगळ म्ह तै कुछ लेकै लगाऊँगा दाऊद के राजसी घरान्‍ने का अधिकार राक्खण आळा प्रतिनिधि, मसीह।, अर उसकी सबतै उप्पर आळी फुंगळ म्ह तै एक कोमल फुंगळ तोड़कै एक घणी ऊँच्‍चे पहाड़ पै लगाऊँगा, 23यानिके इस्राएल के ऊँच्‍चे पहाड़ पै लगाऊँगा; फेर वो डाळी फोड़कै ताकतवर अर बढ़िया देवदार बण जावैगा, अर उसके नीच्‍चै यानिके उसकी डाळियाँ की छाया म्ह ढाळ-ढाळ के सारे पंछी बसेरा करैंगे।#17:23 भजन. 92:12 24फेर मैदान के सारे दरखत जाण लेवैंगे के मन्‍नै यहोवा ए नै ऊँच्‍चे दरखत ताहीं नीच्‍चा अर नीच्‍चै दरखत ताहीं ऊँच्‍चा करया, हरे दरखत ताहीं सूखा दिया, अर सूखे दरखत ताहीं हरा भरया कर दिया। मन्‍नै यहोवा ए नै न्यू कह्या अर उसाए कर भी दिया सै।”

Currently Selected:

यहेजकेल 17: BGC

Highlight

Copy

Compare