यहेजकेल 12

यहूदा की गुलाम्मी का दिखाया जाणा

1फेर यहोवा का यो वचन मेरे दोबारा मेरे धोरै पोहच्या, 2“हे माणस की सन्तान, तू धोक्खा देण आळे घरान्‍ने कै बिचाळै रहवै सै, जिनके देखण कै खात्तर आँख तो सैं, पर न्ही देखदे; अर सुणण खात्तर कान तो सैं पर न्ही सुणदे; क्यूँके वे धोक्खा देण आळे घरान्‍ने के सैं।#12:2 मर. 8:18; रोम. 11:8 3इस करकै हे माणस की सन्तान, दिन म्ह गुलाम्मी का सामान त्यार करकै उनके देखदे होए उठ जाणा, उनके देखदे होए अपणी जगहां छोड़कै दुसरी जगहां पै जाणा। फेर वे धोक्खा देण आळे घरान्‍ने के सैं, तोभी हो सकै सै के वे ध्यान देवैं। 4इस करकै तू दिन म्ह उनके देखदे होए गुलाम्मी के सामान नै लिकाड़णा, अर फेर तू साँझ नै गुलाम्मी म्ह जाण आळे की तरियां उनके देखदे होए उठ जाणा। 5उनके देखदे होए दीवार नै फोड़कै उसे तै अपणा सामान लिकाड़णा। 6उनके देखदे होए उसनै अपणे कंधे पै ठाकै अंधेरै म्ह लिकाड़णा, अर अपणा मुँह ढके रहणा#12:6 अपणा मुँह ढके रहणा यो विलाप की निशान्‍नी सै, सिदकिय्याह के अंधेपण की भी (यहे. 12:12) निशान्‍नी सै। के धरती तेरे ताहीं ना दिखाई पड़ै; क्यूँके मन्‍नै तेरे ताहीं इस्राएल के घरान्‍ने कै खात्तर एक निशान्‍नी ठहराया सै।”

7जिसा मेरे परमेसवर ताहीं हुकम दिया उस हुकम कै मुताबिक मन्‍नै उसाए करया। दिन म्ह मन्‍नै अपणा सामान गुलाम्मी के सामान की तरियां लिकाड़या, अर साँझ नै अपणे हाथ तै दीवार ताहीं फोड़यां; फेर अंधेरै म्ह सामान नै लिकाड़कै, उनके देखदे होए अपणे कंधे पै ठाए होए चल्या गया।

8आगले दिन सबेरै यहोवा का यो वचन मेरे धोरै पोहच्या, 9“हे माणस की सन्तान, के इस्राएल के घरान्‍ने नै यानिके उस धोक्खा देण आळे घरान्‍ने नै तेरे तै यो न्ही पूच्छया, ‘यो तू के करै सै?’ 10तू उनतै कह, ‘प्रभु यहोवा न्यू कहवै सै: यो प्रभावशाली वचन यरुशलेम के प्रधान माणस अर इस्राएल के सारे घरान्‍ने कै बारै म्ह सै जिसकै बिचाळै वे रहवैं सैं।’ 11तू उनतै कह, ‘मै थारे खात्तर निशान्‍नी सूं#12:11 मै थारे खात्तर निशान्‍नी सूंयहेजकेल कै जरिये अपणे कंधे पै सामान ठाए रहणा उनके राजा अर प्रजा पै आणआळी आपदा की निशान्‍नी थी। ; जिसा मन्‍नै करया सै, उसाए इस्राएली माणसां तै भी करया जावैगा; उननै उठकै गुलाम्मी म्ह जाणा पड़ैगा।’ 12उनके बीच म्ह जो प्रधान सै, वो अन्धेरै म्ह अपणे कंधे पै बोझ ठाए होए लिकड़ैगा; वो अपणा सामान लिकाड़ण कै खात्तर दीवार नै फोड़ैगा, अर अपणा मुँह ढके रहवैगा के उस ताहीं धरती ना दिखाई पड़ै। 13अर मै उसपै अपणा जाळ फैलाऊँगा, अर वो मेरे फंदे म्ह फँसैगा; अर मै उसनै कसदियाँ के देश के बाबेल म्ह पोंहचा दियुँगा; फेर भी वो उस नगर म्ह मर जावैगा, तोभी उस ताहीं ना देक्खैगा। 14जितने उसके साथ देणीये उसके लोवै-धोरै होवैंगे, उननै अर उसकी सारी टोळियां नै मै सारी दिशा म्ह तित्तर-बितर कर दियुँगा; अर तलवार खींचकै उनकै पाच्छै चलवाऊँगा। 15जिब मै यरुशलेम म्ह रहण आळे बाकी माणसां नै जात्ति-जात्ति म्ह तित्तर-बितर कर देऊँगा, अर देश-देश म्ह बिखेर दियुँगा, फेर वे जाण लेवैंगे के मै यहोवा सूं। 16पर मै उन म्ह तै थोड़े-से माणसां नै तलवार, भूख अर मरी तै बचा राखूँगा; अर वे अपणे घृणित काम उन जात्तां म्ह बखान करैंगे जिनकै बिचाळै वे पोहचैंगें; फेर वे जाण लेवैंगे के मै यहोवा सूं।”

काँम्बदे होए भविष्यवक्ता की निशान्‍नी

17फेर यहोवा का यो वचन मेरै दोबारा मेरे धोरै पोहच्या, 18“हे माणस की सन्तान, काँम्बदे होए अपणी रोट्टी खाणा अर थरथरान्दे अर चिन्ता करदे होए अपणा पाणी पीणा; 19अर इस देश के माणसां तै न्यू कहणा, के प्रभु यहोवा यरुशलेम अर इस्राएल के देश के बासिन्दया कै बारे म्ह न्यू कहवै सै, वे अपणी रोट्टी चिन्ता कै गैल खावैंगे, अर अपणा पाणी उदास्सी कै गैल पीवैंगे; क्यूँके देश अपणे सारे रहण आळयां के हुड़दंग कै कारण अपणी सारी भरपूरी कै बिना हो जावैगा। 20यहूदा के नगर और ग्रामीण इलाके उजड़ जावैंगे, अर देश भी उजाड़ हो जावैगा; फेर थम माणस जाण ल्योगे के मै यहोवा सूं।”

मशहुर कहावत बदनाम सन्देस

21फेर यहोवा का यो वचन दोबारा मेरै धोरै पोहच्या, 22“हे माणस की सन्तान यो के कहावत सै जो थम इस्राएल के देश म्ह कह्या करो सो, ‘दिन घणे होगे सैं, अर दर्शन की कोए बात पूरी न्ही होई?’ 23इस करकै माणसां तै कह, ‘प्रभु यहोवा न्यू कहवै सै: मै इस कहावत नै बन्द करुँगा; अर या कहावत इस्राएल म्ह फेर न्ही चाल्‍लैगी।’ अर तू उनतै कह के वो दिन धोरै आ ग्या सै, अर दर्शन की सारी बात पूरी होण पै सैं। 24क्यूँके इस्राएल के घरान्‍ने म्ह ना तो और घणे झूठ्ठे दर्शन की कोए बात अर ना कोए चिकणी-चुपड़ी बात फेर कही जावैगी। 25क्यूँके मै यहोवा सूं; जिब मै बोल्‍लूँ, फेर जो वचन मै कहूँ, वो पूरा हो जावैगा। उस म्ह देर न्ही होवैगी, पर, हे धोक्खा देण आळे घरान्‍ने थारे ए दिनां म्ह मै वचन कहूँगा, अर वो पूरा हो जावैगा, प्रभु यहोवा की याए वाणी सै।”

26फेर यहोवा का यो वचन दोबारा मेरै धोरै पोहच्या, 27“हे माणस की सन्तान, देख, इस्राएल के माणस न्यू कह रहे सैं के जो दर्शन वो देक्खै सै, वो घणे दिन कै बाद पूरा होण आळा सै; अर वो दूर के बखत कै बारें म्ह भविष्यवाणी करै सै। 28इस करकै तू उनतै कह, प्रभु यहोवा न्यू कहवै सै: मेरे किसे भी वचन के पूरा होण म्ह फेर देर ना होवैगी, बलके जो वचन मै कहूँ, वो पक्‍का पूरा होवैगा, प्रभु यहोवा की याए वाणी सै।”

Currently Selected:

यहेजकेल 12: BGC

Highlight

Copy

Compare