निर्गमन 40

मिलापआळे तम्बू नै स्थापित करण का हुकम

1फेर यहोवा नै मूसा तै कह्या, 2“पैहल्ड़े महिन्‍ने#40:2 पैहल्ड़े महिन्‍ने नये साल का पैहला दिन कै पैहले दिन नै तू मिलापआळे तम्बू नै खड्या कर दिये। 3अर उस म्ह साक्षीपत्र के सन्दूक नै धरकै बीच आळे पड़दे की ओट म्ह कर दिये। 4अर मेज नै भित्तर ले जाकै जो कुछ उसपै सजाणा सै उसपै सजा दिये; फेर दीवट नै भित्तर ले जाकै उसके दीवे नै जळा दिये। 5अर साक्षीपत्र कै सन्दूक कै स्याम्ही सोन्‍ने की वेदी नै जो धूप कै खात्तर सै उस ताहीं धरिये, अर मिलापआळे तम्बू कै दरबाजे के पड़दे नै लगा दिये। 6अर मिलापआळे तम्बू कै दरबाजे कै स्याम्ही होमवेदी नै धरिये। 7अर मिलापआळे तम्बू अर वेदी कै बिचाळै हौदी नै धरकै उस म्ह पाणी भरिये। 8अर चौगरदे नै आँगण की कनात नै खड्या करिये, अर उस आँगण कै दरबाजे पै पड़दे नै लटका दिये। 9अर अभिषेक का तेल लेकै निवास का अर जो कुछ उस म्ह होवैगा सारा किमे का अभिषेक करिये, अर सारी चिज्जां सुधा उसनै पवित्र करिये; फेर वो पवित्र ठहरैगा। 10सारी चिज्जां सुधा होमवेदी का अभिषेक करकै उसनै पवित्र करिये; फेर वो परमपवित्र ठहरैगी। 11पाये सुधा हौदी का भी अभिषेक करकै उसनै पवित्र करिये। 12फेर हारुन अर उसके बेट्याँ नै मिलापआळे तम्बू के दरबाजे पै ले जाकै पाणी तै नुहाईये, 13अर हारुन ताहीं पवित्र पोशाक पिहराईये, अर उसका अभिषेक करकै उसनै पवित्र करिये ताके वो मेरै खात्तर याजक का काम करै। 14अर उसके बेट्याँ नै ले जाकै अंगरखे पिहराईये, 15अर जिस तरियां तू उनके पिता का अभिषेक करै उस्से तरियां ए उनका भी अभिषेक करिये ताके वे मेरै खात्तर याजक का काम करैं; अर उनका अभिषेक उनकी पीढ़ी-पीढ़ी कै खात्तर उनके सदा कै याजक पद का निशान ठहरैगा।”

मिलापआळे तम्बू का खड़या करया जाणा

16अर मूसा ताहीं जो-जो हुकम यहोवा नै उस ताहीं दिये थे उस्से कै मुताबिक करया। 17अर दुसरे साल के पैहले महिन्‍ने कै पैहले दिन नै निवास खड्या करया गया। 18मूसा नै मिलापआळे तम्बू ताहीं खड्या करवाया फेर उसके हरेक पावे उसके तख्तां म्ह लगाकै उन म्ह बेंड़े डाले, अर उसके खम्भ्यां ताहीं खड्या करया; 19फेर उसनै मिलापआळे तम्बू कै उप्पर तम्बू लगाकै ओढ़णा फैलाया, जिस तरियां यहोवा नै मूसा तै हुकम दिया था। 20अर उसनै साक्षीपत्र ताहीं लेकै सन्दूक म्ह धरया, अर सन्दूक म्ह डण्ड्याँ नै लगाकै उसकै उप्पर प्रायश्चित कै ढक्‍कण ताहीं धर दिया; 21अर उसनै सन्दूक ताहीं मिलापआळे तम्बू म्ह पोहचवाया, अर बीच आळे पड़दे नै लटकवा कै साक्षीपत्र कै सन्दूक नै उसकै भित्तर करया; जिस तरियां यहोवा नै मूसा तै हुकम दिया था। 22अर उसनै मिलापआळे तम्बू म्ह उत्तर की ओड़ बिचाळै के पड़दे तै बाहर मेज ताहीं लगवाया, 23अर उसपै उननै यहोवा कै स्याम्ही रोट्टी सजा कै धरी; जिस तरियां यहोवा नै मूसा तै हुकम दिया था। 24अर उसनै मिलापआळे तम्बू म्ह मेज कै स्याम्ही निवास के दक्षिण कान्ही दीवट ताहीं धरया, 25अर उसनै दिवां ताहीं यहोवा कै स्याम्ही जळा दिया; जिस तरियां यहोवा नै मूसा तै हुकम दिया था। 26अर उसनै मिलापआळे तम्बू म्ह बिचाळै के पड़दे कै स्याम्ही सोन्‍ने की वेदी ताहीं धरया, 27अर उसनै उसपै खुशबुदार धूप जळाया; जिस तरियां यहोवा नै मूसा तै हुकम दिया था। 28अर उसनै निवास के दरबाजे पै पड़दे ताहीं लगाया। 29अर मिलापआळे तम्बू कै निवास के दरबाजे पै होमबलि वेदी ताहीं धरकै उसपै होमबलि अर अन्‍नबलि ताहीं चढ़ाया; जिस तरियां यहोवा नै मूसा तै हुकम दिया था। 30अर उसनै मिलापआळे तम्बू अर वेदी कै बीच म्ह हौदी ताहीं धरकै उस म्ह धोण कै खात्तर पाणी भरया, 31अर मूसा अर हारुन अर उसके बेट्याँ नै उस म्ह अपणे-अपणे हाथ-पैर धोए; 32अर जिब-जिब वे मिलापआळे तम्बू म्ह या वेदी कै धोरै जावैं थे; तब-तब वे हाथ-पैर धोवै थे; जिस तरियां यहोवा नै मूसा तै हुकम दिया था। 33अर उसनै निवास के चौगरदे अर वेदी कै लोवै-धोरै आँगण की कनात ताहीं खड्या करवाया, अर आँगण कै दरबाजे के पड़दे ताहीं लटका दिया। इस तरियां मूसा नै सारा काम पूरा करया।

मिलापआळे तम्बू पै यहोवा की महिमा

34फेर बाद्दळ मिलापआळे तम्बू पै छाग्या, अर यहोवा का तेज मिलापआळे तम्बू म्ह भरग्या। 35अर बाद्दळ मिलापआळे तम्बू पै ठैहर ग्या, अर यहोवा का तेज मिलापआळे तम्बू म्ह भरग्या, इस करकै मूसा उस म्ह दाखल न्ही हो सक्या। 36इस्राएलियाँ के सारे सफर म्ह इसाए होवै था, के जिब-जिब वो बाद्दळ मिलापआळे तम्बू कै उप्पर तै उठ जावै तब-तब वे चल्या करैं थे। 37अर जै वो ना उठदा, तो जिस दिन ताहीं वो ना उठै था उस दिन ताहीं वे चल्या न्ही करैं थे। 38इस्राएल कै खानदान के सारे सफर म्ह दिन म्ह तो यहोवा का बाद्दळ निवास पै, अर रात नै उस्से बाद्दळ म्ह आग उन सारया नै दिख्या करै थी।

Currently Selected:

निर्गमन 40: BGC

Highlight

Copy

Compare