निर्गमन 22

चोरी कै बारै म्ह नियम

1“जै कोए माणस बळध, या भेड़, या बकरी चुराकै उसका घात करै, या बेच दे, तो वो बळध कै बदलै पाँच बळध, अर भेड़-बकरी कै बदलै च्यार भेड़-बकरी भर दे। 2जै चोर चोरी करदा पकड्या जावै, अर उसपै इसी मार पड़ै के वो मर ज्या, तो उसकै खून का दोष ना लाग्गै; 3जै सूरज लिकड़ज्या, तो उसकै खून का दोष लाग्गै; जरूरी सै के वो नुकसान नै भर दे, अर जै उसकै धोरै कुछ ना हो, तो वो चोरी की रकम खुद नै बेचकै उस हरजान्‍ने नै भर दे। 4जै चुराया होया बळध, या गधा, या भेड़ या बकरी उसकै हाथ म्ह जिन्दा पाए जावै, तो वो उसका दुगणा भर दे।”

फसल की हिफाजत कै बारै म्ह नियम

5“जै कोए अपणे पशु तै किसे का खेत या अंगूर के बाग चरावै, यानिके अपणे पशु नै इसा छोड़ दे के वो पराए खेत नै चर ले, तो वो अपणे खेत की अर अपणे अंगूर के बाग की आच्छी तै आच्छी उपज म्ह तै उस नुकसान नै भर दे।”

6“जै कोए आग जळावै, अर वो काण्डयाँ म्ह लाग ज्या अर फूल्‍लां के ढेर या नाज या खड्या खेत जळ ज्या, तो जिसनै आग जळाई हो, वो नुकसान नै जरुर भर दे।”

खुद की सम्पत्ति कै बारै म्ह नियम

7“जै कोए दुसरे कै धोरै रपिये या सामग्री की धरोहर धरै, अर वो उसके घर तै चुराई जावै, तो जै चोर पकड्या जावै, तो दुगणा उस्से नै भर देणा पड़ैगा। 8अर जै चोर न्ही पकड्या जावै, तो घर का माल्‍लिक परमेसवर#22:8 परमेसवर न्यायी कै धोरै ल्याया जावै के पक्‍का हो जावै के उसनै अपणे भाई-बन्धु की सम्पत्ति पै हाथ लगाया सै के न्ही। 9चाहे बळध, चाहे गधे, चाहे भेड़ या बकरी, चाहे कपड़े, चाहे किसे ढाळ की इसी खोई होई चीज कै बारै अपराध क्यूँ न्ही लगाया जावै, जिसनै दो जणे अपणी-अपणी कहन्दे हों, तो दोनुआ का मुकद्दमा परमेसवर कै धोरै आवै; अर जिस ताहीं#22:9 न्यायी परमेसवर दोषी ठहरावै वो दूसरा नै दुगणा भर दे।”

10“जै कोए दुसरयां नै गधा या बळध या भेड़-बकरी या कोए और पशु राक्खण कै खात्तर सौंपै, अर किसे कै बिना देक्खे वो मर जावै, या चोट खावै, या हाँक दिया जावै, 11तो उन दोनुआ कै बिचाळै यहोवा की कसम खुवाई जावै, ‘मन्‍नै इसकी सम्पत्ति पै हाथ कोनी लगाया;’ फेर सम्पत्ति का माल्‍लिक इसनै साच्‍ची मान्‍नै, अर दुसरे नै उस ताहीं कुछ भी हरजान्‍ना न्ही देणा पड़ैगा। 12जै वो सच म्ह ए उसकै धोरै तै चुराया गया हो, तो वो उसकै माल्‍लिक नै उस ताहीं भर दे। 13अर जै वो पाड़ दिया गया हो, तो वो पाड़े होए नै सबूत कै खात्तर ले आवै, फेर उसनै उस ताहीं भी भर देणा न्ही पड़ैगा।”

14“जै कोए दुसरे तै पशु माँग ल्यावै, अर उसकै माल्‍लिक कै गैल ना रहंदे उस ताहीं चोट लाग्गै, या वो मर जावै, तो वो जरुर उसका नुकसान भर दे। 15जै उसका माल्‍लिक गैल हो, तो दुसरे नै उसका नुकसान भरणा ना पड़ै; अर जै वो भाड़े का हो, तो उसका नुकसान उसकै भाड़े म्ह आ ग्या।”

नैतिक अर धार्मिक नियम

16“जै कोए माणस किसे कुवारी नै जिसका उसकै गैल ब्याह न्ही होया हो अर उसनै फुसळा कै उसकै गैल कुकर्म करै, तो वो जरुर उसका मोल देकै उसनै ब्याह ले। 17पर जै उसका पिता उसनै देण तै बिल्कुल इन्कार करै, तो कुकर्म करण आळा कुवारियाँ कै मोल की रीति कै मुताबिक रपिये तौल दे।”

18“तू जादू-टोणा करण आळी नै जिन्दा ना रहण दिये।”

19“जो कोए पशुगमन#22:19 पशुगमन पशु कै साथ शारीरिक सम्बन्ध बणाणा करै वो जरुर मार दिया जावै।”

20“जो कोए यहोवा नै छोड़ किसे और देवत्यां कै खात्तर बलि करै वो सत्यानाश करया जावै।”

21“थम परदेशी नै ना सताईयो अर ना उसपै अंधेर करियो क्यूँके मिस्र देश म्ह थम भी परदेशी थे। 22किसे बिधवा या अनाथ बाळक नै दुख न्ही दियो। 23जै थम इस्यां का किसे ढाळ तै भी फायदा ठाओ, अर वे मन्‍नै पुकारै, तो मै जरुर उनकी पुकार सुणूँगा; 24फेर मेरा छो भड़कैगा, अर मै थमनै तलवार तै मरवाऊँगा, अर थारी घरआळी बिधवा अर थारे बाळक अनाथ हो जावैंगे।”

25“जै तू मेरी प्रजा म्ह तै किसे दीन नै जो तेरे धोरै रहंदा हो रपिये का कर्ज दे, तो उसतै साहूकार की तरियां ब्याज ना लिये। 26जै तू कदे अपणे भाई-बन्धु कै कपड़े नै बन्धक करकै राक्ख भी ले, तो सूरज छिपण तक उसनै बोहड़ा दिये; 27क्यूँके वो उसका एक ए ओढ़णा सै, उसकी देह का वोए एक्ला कपड़ा होगा; फेर वो के ओढ़कै सोवैगा? अर जिब वो मेरे नाम की दुहाई देवैगा, फेर मै उसकी सुणूँगा, क्यूँके मै तो करुणामय सूं।”

28“परमेसवर नै श्राप ना दिये, अर ना अपणे माणसां के प्रधान नै श्राप दिये।”

29“अपणे खेत्तां की पैदावार अर फळां के रस म्ह तै कुछ मन्‍नै देण म्ह देर ना करिये। अपणे बेट्याँ म्ह तै जेठ्ठा नै मेरै ताहीं दिये। 30उस्से तरियां ए अपणी गां अर भेड़-बकरियाँ के जेठ्ठे भी दिये; सात दिन ताहीं तो बच्‍चा अपणी माँ कै गैल रहवै, अर आठवे दिन तू उस ताहीं मन्‍नै दे दिये।”

31“थम मेरै खात्तर पवित्र माणस बणे रहियो; इस करकै जो पशु मदानां म्ह पाड़या होया पड्या मिलै उसका माँस ना खाईयों, उस ताहीं कुत्याँ कै आग्गै बगा दियो।”

Currently Selected:

निर्गमन 22: BGC

Highlight

Copy

Compare