एस्तेर 1

वशती का पटराणी के पद तै उतारया जाणा

1क्षयर्ष नाम के राजा के दिनां म्ह ये बात होई यो वोए क्षयर्ष राजा सै, जो एक सौ सत्ताईस प्रान्तां पै, यानिके भारत तै लेकै कूश#1:1 कूश इथियोपिया देश तक राज करया करदा। 2उन्हे दिनां म्ह जिब क्षयर्ष राजा अपणी उस राजगद्दी पै विराजमान था जो शूशन नाम के राजगढ़ म्ह थी। 3ओड़ै उसनै अपणे राज्य के तीसरे साल म्ह अपणे सारे हाकिमां अर कर्मचारियाँ ताहीं भोज दिया। फारस अर मादै के सेनापति अर जगहां-जगहां के प्रधान अर हाकिम उसकै स्याम्ही आये। 4वो उन ताहीं घणे दिनां बल्के एक सौ अस्सी दिन ताहीं अपणे राज वैभव का धन अर अपणी महानता की अनमोल चीज दिखान्दा रह्या। 5इतणे दिनां कै बीत्तण पै राजा नै के छोट्टे के बड़े उन सारया की भी जो शूशन नाम के राजगढ़ म्ह कठ्ठे होए थे, राजभवन के बाग कै आँगण म्ह सात दिन ताहीं भोज दिया। 6ओड़ै के पड़दे धोळे अर नीले सूत के थे, अर सण अर बैंगणी रंग की डोरियाँ तै चाँदी के छल्यां म्ह, संगमरमर के खम्भ्यां तै लाग्गे होए थे; अर ओड़ै की चौकी सोन्‍ने-चाँदी की थी; अर लाल अर धोळे अर पीळे अर काळे संगमरमर के बणे होए फर्श पै धरी होई थी। 7उस भोज म्ह राजा कै लायक दाखमधु न्यारे-न्यारे ढाळ के सोन्‍ने के बरतनां म्ह घाल कै राजा की उदारता तै जी भरकै पिलाया जाया करदा। 8पीणा तो नियम कै मुताबिक होया करदा, किसे ताहीं मजबूर करकै न्ही पिलाया जाया करदा; क्यूँके राजा नै तो अपणे भवन के सारे भण्डारीयाँ तै हुकम दिया था, के जो मेहमान जिसा चावै उसकै गैल उसाए बरताव करियो। 9राणी वशती नै भी राजा क्षयर्ष के भवन म्ह जनानियाँ ताहीं भोज दिया।

10भोज के सातमै दिन, जिब राजा का मन दाखमधु म्ह मगन था, फेर उसनै महूमान, बिजता, हर्बोना, बिगता, अबगता, जेतेर अर कर्कस नाम के सात्तु खोज्यां ताहीं जो क्षयर्ष राजा कै स्याम्ही सेवा पाणी करया करदे, हुकम दिया, 11के राणी वशती नै राजमुकुट धारण करे होए राजा कै स्याम्ही ले आओ; जिसतै के देश-देश के माणसां अर हाकिमां पै उसकी खूबसूरती दिखाई जावै; क्यूँके वा देखण म्ह सुथरी थी। 12खोज्यां कै जरिये राजा का यो हुकम पाकै राणी वशती नै आण तै मना कर दिया। इसपै राजा बड़े छो तै भरग्या।

13फेर राजा नै बखत-बखत का भेद जाणण आळे पंडितां तै पूच्छया (राजा तो नीति अर न्याय के सारे ज्ञानियाँ तै इसाए करया करदा। 14उसकै धोरै कर्शना, शेतार, अदमाता, तर्शीश, मेरेस, मर्सना, अर ममूकान नाम के फारस, अर मादै के सात प्रधान थे, जो राजा का दर्शन करदे, अर राज्य म्ह खास-खास पदां पै ठैहराये गये थे।) 15राजा नै पूच्छया, “राणी वशती नै राजा क्षयर्ष के खोज्यां कै जरिये दिये गये हुकम का उलंघण करया, तो नीति कै मुताबिक उसकै गैल के करया जावै?” 16फेर ममूकान नै राजा अर हाकिमां की मौजूदगी म्ह जवाब दिया, “राणी वशती नै जो गलत काम करया सै, वो ना सिर्फ राजा तै पर सारे हाकिमां तै अर उन सारे देशां के माणसां तै भी करया सै, जो राजा क्षयर्ष के सारे प्रान्तां म्ह रहवै सैं। 17क्यूँके राणी के इस काम की चर्चा सारी जनानियाँ म्ह होवैगी अर जिब यो कह्या जावैगा, ‘राजा क्षयर्ष नै राणी वशती तै अपणे स्याम्ही ल्याण का हुकम दिया पर वा न्ही आई,’ फेर वे भी अपणे-अपणे पति नै तुच्छ जाणण लाग्गैगीं। 18आज कै दिन फारस अर मादी हाकिमां की जनान्‍नी जिननै राणी की या बात सुणी सै तो वे भी राजा के सारे हाकिमां तै इसाए कहण लाग्गैगीं; इस तरियां घणीए नफरत अर गुस्सा पैदा होवैगा। 19जै राजा नै कबूल हो, तो यो हुकम दे, अर फारसियां अर मादियाँ के कानून म्ह लिख्या भी जावै, जिस ताहीं कदे भी बदल ना सकै, के राणी वशती राजा क्षयर्ष कै स्याम्ही फेर कदे आण न्ही पावै, अर राजा पटराणी का पद किसे दुसरी नै दे दे जो उसतै आच्छी हो। 20आखर जिब राजा का यो हुकम उसके सारे राज म्ह सुणाया जावैगा, फेर सारी जनान्‍नी, अपणे-अपणे पति का चाहे बड़ा हो या छोट्टा, आदर-मान करदी रहवैगी।” 21या बात राजा अर हाकिमां नै पसन्द आई अर राजा नै ममूकान की सलाह मान ली अर अपणे राज्य म्ह, 22यानिके हरेक परदेस के अक्षरां म्ह अर हरेक जात की भाषा म्ह चिट्ठी भेजी, के सारे माणस अपणे-अपणे घर म्ह हुक्म चलावै, अर अपणी जात की भाषा बोल्या करैं।

Currently Selected:

एस्तेर 1: BGC

Highlight

Copy

Compare