व्यवस्थाविवरण 17

1“तू अपणे परमेसवर यहोवा कै खात्तर कोए बळध या भेड़-बकरी बलि ना करिये जिस म्ह दोष या किसे ढाळ का खोट हो; क्यूँके इसा करणा तेरे परमेसवर यहोवा कै धोरै घृणित सै।”

मूर्तिपूजा कै खात्तर न्यायिक प्रक्रिया

2“जो बस्ती तेरा परमेसवर यहोवा तन्‍नै देवै सै, जै उन म्ह तै किसे म्ह कोए आदमी या औरत इसी पाई जावै, जिसनै तेरे परमेसवर यहोवा का करार तोड़कै इसा काम करया हो, जो उसकी निगांह म्ह बुरा सै, 3यानिके मेरे हुकम का उलंघण करकै पराए देवत्यां की, या सूरज, या चाँद, या अकास के कण म्ह तै किसे की आराधना करी हो, या उन ताहीं दण्डवत करया हो, 4अर या बात तेरै ताहीं बताई जावै अर तेरै सुणनै म्ह आवै; फेर आच्छी ढाळ पूछताछ करिये, अर जै या बात सच सै इस्राएल म्ह इसा घृणित काम करया गया सै, 5तो जिस आदमी या जनान्‍नी नै इसा बुरा काम करया हो, उस आदमी या जनान्‍नी नै बाहर अपणे फाटकां पै ले जाकै इसा पथराव करिये के वो मर ज्या। 6जो मौत की सजा कै लायक सै वो एक ए की गवाही तै मारया न्ही जावै, बलके दो या तीन माणसां की गवाही तै मार दिया जावै। 7उसकै मारण कै खात्तर सबतै पैहल्या गवाई देणिया के हाथ, अर उनकै पाच्छै और सारे माणसां के हाथ उठ्ठै। इस्से तरियां तै इसी बुराई नै अपणे बीच म्ह तै दूर करिये।”

8“जै तेरी बस्तियाँ कै भित्तर कोए झगड़े की बात हो, यानिके आप्पस के खून, या विवाद, या मारपीट का कोए मुकद्दमा उठै, अर उसका न्याय करणा तेरै खात्तर ओक्खा जाण पड़ै, तो उस जगहां म्ह जाकै जो तेरा परमेसवर यहोवा छाँट लेवैगा; 9लेवी याजकां कै धोरै अर उन दिनां कै न्यायियाँ कै धोरै जाकै पूच्छताछ करिये, के वों थारै ताहीं न्याय की बात बतावै। 10अर न्याय की जिसी बात उस जगहां के माणस जो यहोवा छाँट लेवैगा तन्‍नै बता दें, उस्से कै मुताबिक करिये; अर जो नियम-कायदे वे तन्‍नै देवैं उस्से कै मुताबिक चाल्‍लण म्ह चौकसी करिये; 11नियम-कायदे की जो बात वे तन्‍नै बतावै, अर न्याय की जो बात वे तेरै तै कहवैं, उस्से कै मुताबिक करिये; जो बात वे तेरै ताहीं बतावै उसतै दाएँ या बाएँ ना मुड़िए। 12अर जो माणस घमण्ड करकै उस याजक की, जो ओड़ै तेरै परमेसवर यहोवा की सेवा-पाणी करण म्ह उपस्थित रहवैगा, ना मान्‍नै, या उस न्यायी की ना सुणै, तो वो माणस मार दिया जावै; इस तरियां तू इस्राएल देश म्ह तै इसी बुराई नै दूर कर दिये। 13इसतै सारे माणस सुणकै डर ज्यांगे, अर फेर घमण्ड न्ही करैंगे।”

राजाओं कै बारै म्ह आदेश

14“जिब तू उस देश म्ह पोहचे जिस ताहीं तेरा परमेसवर यहोवा तन्‍नै देवै सै, अर उसका अधिकारी हो, अर उन म्ह बसकै कहण लाग्गै, के चौगरदे की सारी जात्तां के जिसा मै भी अपणे उप्पर राजा ठहराऊँगा; 15फेर जिस ताहीं तेरा परमेसवर यहोवा छाँट ले जरुर उस्से नै राजा बणाईये। अपणे भाईयाँ ए म्ह तै किसे नै अपणे उप्पर राजा बणाईये; किसे परदेशी ताहीं जो तेरा भाई ना हो तू अपणे उप्पर अधिकारी न्ही ठहरा सकदा। 16अर वो घणे घोड़े न्ही राक्खै, अर ना इस विचार तै अपणी प्रजा के माणसां ताहीं मिस्र देश म्ह भेज्जै के उसकै धोरै घणे घोड़े हो जावै, क्यूँके यहोवा नै थारै तै कह्या सै, के थम उस राह पै फेर कदे ना जाईयो।#17:16 उन दिनां म्ह घोड्या कै बदले राजा माणसां नै मिस्र की गुलामी खात्तर देवै थे 17अर वो घणी बिरबान्‍नी भी ना राक्खै, इसा ना हो के उसका मन यहोवा की ओड़ तै पलट ज्या; अर ना वो अपणा सोन्‍ना-चाँदी घणा बढ़ावै। 18अर जिब वो राजगद्दी पै बेठ्ठै, फेर याए नियम-कायदे की किताब, जो लेवी याजकां कै धोरै रहवैगी, उसकी एक नकल अपणे खात्तर कर ले। 19अर वो उस ताहीं अपणे धोरै राक्खै, अर अपणे जीवन भर उस ताहीं पढ़्या करै, जिसतै वो अपणे परमेसवर यहोवा का भय मान्‍नै, अर इन नियम-कायदे अर इन विधियाँ की सारी बात्तां नै मानण म्ह चौकसी करणा, सीखै; 20जिसतै वो अपणे मन म्ह गर्व करकै अपणे भाईयाँ नै तुच्छ न्ही जाणै, अर इन हुकमां तै ना तो दाएँ मुड़ै अर ना बाएँ; जिसतै के वो अर उसके वंश के माणस इस्राएलियाँ कै बीच म्ह घणे दिनां ताहीं राज करदे रहवैं।”

Currently Selected:

व्यवस्थाविवरण 17: BGC

Highlight

Copy

Compare