व्यवस्थाविवरण 13

झूठ्ठे नबी

1“जै तेरै बिचाळै कोए नबी या सपना देखण आळा प्रगट होकै तन्‍नै कोए निशान या चमत्कार दिखावै, 2अर जिस निशान या चमत्कार नै सबूत ठहराकै वो तेरै तै कहवै, ‘आओ आपां पराए देवत्यां के अनुयायी हो कै, जिनतै थम इब ताहीं अनजाण रहे, उनकी उपासना करां,’ 3फेर थम उस नबी या सपना देखणआळे कै वचन पै कदे भी ध्यान ना दियो; क्यूँके थारा परमेसवर यहोवा थारी परीक्षा लेवैगा, जिसतै न्यू जाण ले, के ये मेरै तै अपणे सारे मन अर सारे प्राण कै गेल्या प्यार करै सैं के न्ही? 4थम अपणे परमेसवर यहोवा कै पाच्छै चालियो, अर उसका भय मानियो, अर उसके हुकमां पै चालियो, अर उसका वचन मानियो, अर उसकी सेवा करियो, अर उस्से तै लिपटे रहियो। 5अर इसा नबी या सपना देखण आळा जो थारे ताहीं थारे परमेसवर यहोवा तै बोहड़ा कै, जिसनै थारै ताहीं मिस्र देश तै लिकाड़या अर गुलाम्मी कै घर तै छुड़ाया सै, तेरे उस्से परमेसवर यहोवा कै राह तै बहकाण की बात कहण आळा ठहरैगा, इस कारण वो मार दिया जावै। इस तरियां तै थम अपणे बिचाळै तै इसी बुराई नै दूर कर दियो।”

6“जै तेरा सगा भाई, या बेट्टा, या बेट्टी, या तेरी घरआळी, या जान तै प्यारा तेरा कोए साथी एक्ले म्ह तेरै ताहीं न्यू कहकै फुसलाण लाग्गै, ‘आजा आपां दुसरे देवत्यां की आराधना या पूजा करां,’ जिननै ना तो तू ना तेरे पूर्वज जाणै थे, 7चाहे वे थारै धोरै रहणीये लोवै-धोरै के माणसां के चाहे धरती कै एक छोर तै लेकै दुसरे छोर ताहीं दूर-दूर के रहणीया कै देवता हों, 8तो तू उसकी ना मानिये, अर ना तो उसकी बात सुणिये, अर ना उसपै तरस खाइये, अर ना कोमलता दिखाईये, अर ना उस ताहीं छिपाए राखिये; 9उस ताहीं जरुर मार दिये; उस ताहीं घात करण म्ह पैहल्या तेरा हाथ उठ्ठै, उसकै बाद सारे माणसां कै हाथ उठ्ठै। 10उसपै इसा पथराव करिये के वो मर ज्या, क्यूँके उसनै तेरै ताहीं तेरे उस परमेसवर यहोवा तै, जो तन्‍नै गुलाम्मी कै घर यानिके मिस्र देश तै लिकाड़ ल्याया सै, बहकाण की कोशिश करी सै। 11अर सारे इस्राएली सुणकै भय खावैंगे, अर इसा बुरा काम फेर तेरै बिचाळै न्ही करैगें।”

12“जै तेरे किसे नगर कै बारै म्ह, जिस ताहीं तेरा परमेसवर यहोवा तन्‍नै रहण कै खात्तर देवै सै, इसी बात तेरै सुणनै म्ह आवै, 13के कुछ अधर्मी माणसां नै तेरैए बिचाळै तै लिकड़कै अपणे नगर के रहणीया ताहीं न्यू कहकै बहका दिया सै, ‘आजा आपां दुसरे देवत्यां की जिनतै इब ताहीं अनजाण रहे भक्ति करां,’ 14तो पूछताछ करिये, अर खोजियो, अर आच्छी ढाळ बेरा लगाईये; अर जै या बात सच हो, अर कुछ भी शक ना हो के तेरे बिचाळै इसा घिनोणा काम करया जावै सै, 15जरुर उस नगर के रहणियाँ ताहीं तलवार तै मार दिये, अर पशु आदि उन सारया समेत जो उस म्ह हो उस ताहीं तलवार तै सत्यानाश करिये। 16अर उस म्ह की सारी लूट चौक कै बिचाळै कठ्ठी करकै उस नगर नै लूट समेत अपणे परमेसवर यहोवा कै खात्तर मान्‍नो सर्वांग होम करकै जळाईये; अर वो सदा कै खात्तर खण्डहर रहवै, वो फेर बसाया न्ही जावै। 17अर कोए सत्यानाश की चीज तेरै हाथ न्ही लागण पावै; जिसतै यहोवा अपणे भड़के होए प्रकोप तै शान्त होकै जिसा उसनै तेरे पूर्वजां तै कसम खाई थी उस्से तरियां ए तेरै तै दया का व्यवहार करै, अर दया करकै तन्‍नै आदमियाँ की गिणती म्ह बढ़ावै। 18यो फेर होवैगा जिब तू अपणे परमेसवर यहोवा की जितने हुकम मै आज तन्‍नै सुणाऊँ सूं उन सारया नै मान्‍नैगा, अर जो तेरै परमेसवर यहोवा की निगांह म्ह सही सै वोए करैगा।”

Currently Selected:

व्यवस्थाविवरण 13: BGC

Highlight

Copy

Compare