2 राजाओं 21
21
मनश्शे का राज
1जिब मनश्शे राज करण लाग्या, तब वो बारहा साल का था, अर यरुशलेम म्ह पचपन साल तक राज करदा रहया; अर उसकी माँ का नाम हेप्सीबा था। 2उसनै उन जात्तां के घिनोणे काम्मां कै मुताबिक, जिन ताहीं यहोवा नै इस्राएलियाँ कै स्याम्ही देश म्ह तै लिकाड़ दिया था, वो करया, जो यहोवा की नजर म्ह बुरा था।#21:2 यहोवा की नजर म्ह बुरा था। मनश्शे के राज्यकाल म्ह जो पाप करे गए वे यहूदा राज्य के गुन्हेगारां का घड़ा भर देते सै अर चुणे होया के आखरी बाकी भाग खात्तर विनाश का आखरी दण्ड ले आवै सै। 3उसनै उन ऊँच्ची जगहां जिन ताहीं उसके पिता हिजकिय्याह नै नाश करया था, फेर बणाया, अर इस्राएल के राजा अहाब कै बराबर बाल कै खात्तर वेदी अर एक अशेरा बणवाई, अर अकास के सारे तारयां कै गणां ताहीं दण्डवत अर उनकी उपासना करदा रहया। 4उसनै यहोवा के उस भवन म्ह वेदी बणाई जिसके बारै म्ह यहोवा नै कह्या था, “यरुशलेम म्ह मै अपणा नाम राक्खूँगा।” 5बलके यहोवा के भवन के दोन्नु आँगणां म्ह भी उसनै अकास के सारे गणां कै खात्तर वेदी बणाई। 6फेर उसनै अपणे बेट्टे ताहीं आग म्ह होम करकै चढ़ाया; अर शुभ-अशुभ मुहूर्तां नै मानदा, अर टोणा करदा, अर ओझां अर भूत-सिद्धि आळयां तै बरताव करया करै था; उसनै इसे घणे से काम करे जो यहोवा की नजर म्ह बुरे सैं, अर जिनतै वो क्रोधित होवै सै। 7अशेरा की जो मूर्ति उसनै खुदवाई, उस ताहीं उसनै उस भवन म्ह स्थापित करया, जिसकै बारै म्ह यहोवा नै दाऊद अर उसके बेट्टे सुलैमान तै कह्या था, “इस भवन म्ह अर यरुशलेम म्ह, जिस ताहीं मन्नै इस्राएल के सारे गोत्रां म्ह तै चुण लिया सै, मै सदा अपणा नाम राक्खूँगा। 8अर जै वे मेरे सारे हुकमां के अर मेरे दास मूसा की दी होई पूरी व्यवस्था कै मुताबिक करण की चौकसी करैं, तो मै इसा न्ही करुँगा के जो देश मन्नै इस्राएल के पुरखां तै दिया था, उसतै वे फेर लिकड़कै मारे-मारे फिरैं।” 9पर उननै ना मान्या, बलके मनश्शे नै उन ताहीं उरै तक भटका दिया#21:9 भटका दिया मनश्शे के लम्बे बखत राज्य म्ह अनेक ढाळ की मूर्तिपूजा नै यहूदियाँ ताहीं इसा वश म्ह कर लिया था जिसा पैहले कदे न्ही होया था। के उननै उन जात्तां तै भी बढ़कै बुराई करी जिनका यहोवा नै इस्राएलियाँ के स्याम्ही तै विनाश करया था।
10ज्यांतै यहोवा नै अपणे दास नबियाँ के जरिये कह्या, 11“यहूदा के राजा मनश्शे नै जो ये घृणित काम करे, अर जितनी बुराई एमोरियां नै जो उसतै पैहल्या थे करी थी, उनतै भी घणी बुराई करी; अर यहूदियाँ तै अपणी बणाई होई मूरतां की पूजा करवा कै उन ताहीं पाप म्ह फँसाया सै। 12इस कारण इस्राएल का परमेसवर यहोवा न्यू कहवै सै के सुणो, मै यरुशलेम अर यहूदा पै इसी विपत्ति गेरणा चाऊँ हूँ के जो कोए उसकी खबर सुणैगा वो बड़े सन्नाटे म्ह आ जावैगा। 13अर जो नाप्पण की डोरी मन्नै सामरिया पै गेरी सै अर जो साहुल मन्नै इस्राएल के राजा अहाब के घरान्ने पै लटकाया सै वोए यरुशलेम पै गेरूँगा। अर मै यरुशलेम नै इसा पोछूँगा जिसा कोए थाळी नै पोंछदा हो अर उसनै पोंछ कै उलट देवै सै। 14मै अपणे निज हिस्सा के बचे होया नै त्याग कै दुश्मनां के हाथ कर दियुँगा अर वे अपणे सारे दुश्मनां कै खात्तर लूट अर धन बण जावैंगे। 15इसका कारण यो सै, के जिब तै उनके पुरखा मिस्र तै लिकड़े जद तै आज कै दिन ताहीं वे वो काम करकै जो मेरी नजर म्ह बुरा सै, मन्नै छो म्ह ल्यान्दे आ रहे सैं।”
16मनश्शे नै ना सिर्फ वो काम कराकै यहूदियाँ तै पाप कराया, जो यहोवा की नजर म्ह बुरा सै, बलके बेकसूरां का खून घणा बहाया, उरै तक के उसनै यरुशलेम ताहीं एक सिरे तै दुसरे सिरे ताहीं खून तै भर दिया।
17मनश्शे के और सारे काम जो उसनै करे, अर जो पाप उसनै करे, वो सबके यहूदा के राजयां कै इतिहास की किताब म्ह न्ही लिख्या सै? 18अन्त म्ह मनश्शे मरकै अपणे पुरखां कै गैल जा मिल्या अर उसतै उसके भवन के बाग म्ह जो उज्जा का बाग कुह्वावै था माट्टी दी गई; अर उसका बेट्टा आमोन उसकी जगहां पै राजा होया।
आमोन का राज
19जिब आमोन राज करण लाग्या, तब वो बाईस साल का था, अर यरुशलेम म्ह दो साल ताहीं राज करदा रहया; अर उसकी माँ का नाम मशुल्लेमेत था जो योत्बावासी हारूस की बेट्टी थी। 20अर उसनै अपणे पिता मनश्शे कै बराबर वो करया, जो यहोवा की नजर म्ह बुरा सै। 21वो पूरी तरियां अपणे पिता कै बराबर चाल चाल्या, अर जिन मूरतां की उपासना उसका पिता करया करै था, वो भी उनकी उपासना करै, अर उननै दण्डवत करया करै था। 22उसनै अपणे पितरां के परमेसवर यहोवा ताहीं त्याग दिया, अर यहोवा के राह पै ना चाल्या। 23राजा आमोन के कर्मचारियाँ नै विद्रोह की योजना करकै राजा ताहीं उसे के भवन म्ह मार गेरया। 24फेर साधारण माणसां नै उन सारया ताहीं मार गेरया, जिननै राजा आमोन कै खिलाफ विद्रोह की साजिस करी थी, अर माणसां नै उसके बेट्टे योशिय्याह ताहीं उसकी जगहां पै राजा बणाया। 25आमोन के और काम जो उसनै करे, के वो यहूदा के राजयां कै इतिहास की किताब म्ह न्ही लिक्खे सैं। 26उस ताहीं भी उज्जा के बाग म्ह उसकी अपणी कब्र म्ह माट्टी दी गई; अर उसका बेट्टा योशिय्याह उसकी जगहां पै राज करण लाग्या।
Currently Selected:
2 राजाओं 21: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
