1 राजाओं 20
20
अहाब की अरामियां पै जीत
1उन दिन्नां म्ह अराम के राजा बेन्हदद नै अपणी सारी सेना कठ्ठी करी, अर उसके गैल बत्तीस राजा अर घोड़े अर रथ थे; उननै गैल लेकै उसनै सामरिया पै चढ़ाई करी, अर उसनै घेर कै उसकै खिलाफ लड़या। 2अर उसनै नगर म्ह इस्राएल के राजा अहाब कै धोरै दूत्तां ताहीं न्यू कहण कै खात्तर भेज्या, “बेन्हदद तेरे ताहीं न्यू कहवै सै, 3‘तेरा चाँदी-सोन्ना मेरा सै, अर तेरी बिरबानियाँ अर बाळकां म्ह जो-जो आच्छे सैं वो भी सारे मेरे सैं।’” 4इस्राएल के राजा नै उसकै धोरै कुह्वा भेज्जा, “हे मेरे प्रभु! हे राजा! तेरे वचन कै मुताबिक मै अर मेरा जो किमे सै, सारा तेरा सै।” 5उन दूत्तां नै फेर आकै कह्या, “बेन्हदद तेरै ताहीं न्यू कहवै सै, ‘मन्नै तेरै धोरै यो सन्देसा भेज्या था के तन्नै अपणी चाँदी-सोन्ना अर घरआळियाँ अर बाळक भी मेरै ताहीं देणे पड़ैंगें। 6पर कल इसे बखत मै अपणे कर्मचारियाँ नै तेरै धोरै भेज्जूँगा अर वे तेरे अर तेरे कर्मचारियाँ के घरां की तलास्सी लेवैंगे, अर तेरी जो-जो मनभावणी चीज लिकाड़ै उननै वे अपणे-अपणे अधिकार म्ह कर लेवैगें।’”
7फेर इस्राएल के राजा नै अपणे देश के सारे पुरनियां ताहीं बुलवा के कह्या, “सोच विचार करो, के वो माणस म्हारे नुकसान का ए अभिलाषी सै; उसनै मेरे ताहीं मेरी बिरबानियाँ, बाळकां, चाँदी-सोन्ना मँगवाया सै, अर मन्नै इन्कार न्ही करया।” 8फेर सारे पुरनियां नै अर सारे माणसां नै उसतै कह्या, “उसकी ना सुणिये; अर ना मानिये।” 9फेर राजा नै बेन्हदद के दूत्तां तै उत्तर दिया, “मेरे प्रभु राजा तै मेरी और तै कह्यो, ‘जो कुछ तन्नै पैहल्या अपणे दास तै चाह्या था वो तो मै करुँगा, पर यो मेरे तै ना होवैगा।’” फेर बेन्हदद के दूत्तां नै जाकै उसतै यो उत्तर सुणा दिया। 10फेर बेन्हदद नै अहाब कै धोरै सन्देसा भेज्या, “जै सामरिया म्ह इतणी धूळ लिकड़ै के मेरै पाच्छै चालण आळयां की मुट्ठी भर जावै तो देवता मेरै गैल इसाए बल्के इसतै भी घणा करैं।”#20:10 मत्ती 12:42, लूका 11:31 11इस्राएल के राजा नै जवाब देकै कह्या, “उसतै कह्यो, ‘जो हथियार बाँन्धदा हो वो उसकी तरियां ना फूलै जो उननै उतारदा हो।’” 12यो वचन सुणदे ए बेन्हदद जो दुसरे राजयां सुधा डेरां म्ह पीण लाग रहया था, उसनै अपणे कर्मचारियाँ तै कह्या, “पाँति बाँधो,” फेर उननै नगर कै बिरुध्द पाँति बाँध्धी।
13फेर एक नबी नै इस्राएल के राजा अहाब कै धोरै जाकै कह्या, “यहोवा तेरे तै न्यू कहवै सै, ‘या बड़ी भीड़ जो तन्नै देक्खी सै, उस सारी नै मै आज तेरै हाथ म्ह कर दियुँगा, इसतै तू जाण लेवैगा, के मै यहोवा सूं।’” 14अहाब नै पूच्छया, “किसके जरिये?” उसनै कह्या, “यहोवा न्यू कहवै सै, के परदेसां के हाकिमां के सेवकां के जरिये!” फेर उसनै पूच्छया, “युद्ध नै कौण शरु करै?” उसनै जवाब दिया, “तू ए।” 15फेर उसनै परदेसां के हाकिमां के सेवकां की गिणती ली, अर वे दो सौ बत्तीस लिकड़े; अर उनकै बाद उसनै सारे इस्राएली माणसां की गिणती ली, अर वे सात हजार लिकड़े।
16ये दोपहर नै लिकड़गे, उस बखत बेन्हदद अपणे मददगार बत्तीस राजयां सुधा डेरा म्ह शराब पी कै मतवाळा हो रह्या था। 17परदेसां के हाकिमां के सेवक पैहल्या लिकड़े। फेर बेन्हदद नै दूत भेज्जे, अर उननै उसतै कह्या, “सामरिया तै कुछ माणस लिकड़े आवैं सैं।” 18बेन्हदद नै हुक्म दिया, “चाए वे मेल करण नै लिकड़े हों, चाए लड़ण नै, फेर भी उननै जिन्दा ए पकड़ ल्याओ।” 19फेर परदेसां के हाकिमां के सेवक अर उनकै पाच्छै की सेना के सिपाही नगर तै लिकड़े। 20अर वे अपणे-अपणे स्याम्ही के दुश्मनां नै मारण लाग्गे; अर अरामी भाज्जे, अर इस्राएल नै उनका पिच्छा करया, अर अराम का राजा बेन्हदद, सवारां कै गैल घोड़े पै चढ़या, अर भाजकै बच ग्या। 21फेर इस्राएल के राजा नै भी लिकड़कै घोड़यां अर रथां ताहीं मारया, अर अरामियां ताहीं बड़ी मार तै मारया।
22फेर उस नबी नै इस्राएल के राजा कै धोरै जाकै कह्या, “जाकै लड़ाई कै खात्तर अपणे ताहीं मजबूत कर, अर सचेत होकै सोच के, करणा के सै, क्यूँके नये साल के लाग्दे अराम का राजा फेर तेरे पै चढ़ाई करैगा।” 23फेर अराम के राजा के कर्मचारियाँ नै उसतै कह्या, “उन माणसां का देवता पहाड़ी देवता सै, इस करकै वे म्हारे पै हावी होए; ज्यांतै हम उनतै चौरस धरती पै लड़ां तो जरुर हम उनपै हावी हो जावांगे। 24अर यो भी काम कर, यानिके सारे राजयां का पद ले ले, अर उनकी जगहां पै सेनापतियाँ नै ठहरा दे। 25फेर एक और सेना जो तेरी उस सेना के बराबर हो जो नाश होगी सै, घोड़े के बदलै घोड़ा, अर रथ के बदलै रथ, अपणे खात्तर गिण ले; फेर हम चौरस धरती पै उनतै लड़ां, अर जरुर उनपै हावी हो जावांगे।” उनकी यो सम्मति मानकै बेन्हदद नै उसाए करया।
26अर नये साल के लाग्दे बेन्हदद नै अरामियां ताहीं कठ्ठा करया, अर इस्राएल तै लड़ण खात्तर अपेक म्ह गया। 27अर इस्राएली भी कठ्ठे करये गए, अर उनके भोजन#20:27 भोजन राजा अहाब नै अपणे सिपाहियाँ ताहीं कठ्ठा करया अर जरूरत आळी चिज्जां दी की त्यारी होई; फेर वे उनका सामना करण नै गए, अर इस्राएली उनकै स्याम्ही डेरे डालकै बकरियाँ के दो छोट्टे झुण्ड जिसे दिखाई पड़े, पर अरामियां तै देश भरग्या। 28फेर परमेसवर के उसे जन नै इस्राएल के राजा कै धोरै जाकै कह्या, “यहोवा न्यू कहवै सै, ‘अरामियां नै यो कह्या सै, के यहोवा पहाड़ी देवता सै, पर निच्ची धरती का न्ही सै; इस करकै मै उस बड़ी भीड़ नै तेरे हाथ म्ह कर दियुँगा, फेर थम जाण ल्योगे के मै यहोवा सूं।’” 29अर वे सात दिन आम्ही-स्याम्ही डेरे डाले पड़े रहे; फेर सातमै दिन युद्ध छिड़ ग्या; अर एक दिन म्ह इस्राएलियाँ नै एक लाख अरामी प्यादे मार गेरे। 30जो बचगे, वो अपेक म्ह भाजकै नगर म्ह घुसे, अर ओड़ै उन बचे होए माणसां म्ह तै सताईस हजार माणस शहरपनाह की दीवार कै गिरण तै दबकै मरगे। बेन्हदद भी भाज ग्या अर नगर की एक भीत्तरी कोठड़ी म्ह गया।
31फेर उसके कर्मचारियाँ नै उसतै कह्या, “सुण, हमनै तो सुण्या सै, के इस्राएल के घरान्ने के राजा दयालु राजा होवै सैं, ज्यांतै हमनै कमर म्ह टाट अर सिर पै रस्सी बाँधे होए इस्राएल के राजा कै धोरै जाण दे, सम्भव सै के वो तेरा प्राण बचाले।” 32फेर वे कमर म्ह टाट अर सिर पै रस्सी बाँधकै इस्राएल के राजा कै धोरै जाकै कहण लाग्गे, “तेरा दास बेन्हदद तेरे तै कहवै सै, ‘दया करकै मन्नै जिन्दा रहण दे।’” राजा नै जवाब दिया, “के वो इब ताहीं जिन्दा सै? वो तो मेरा भाई सै।” 33उन माणसां नै इस ताहीं शुभ शकुन जाणकै, फुर्ती तै बूझ लेण का यत्न करया के यो उसके मन की बात सै के न्ही, अर कह्या, “हाँ तेरा भाई बेन्हदद।” राजा नै कह्या, “जाकै उसनै ले आओ।” फेर बेन्हदद उसकै धोरै लिकड़ आया, अर उसनै अपणे रथ पै चढ़ा लिया। 34फेर बेन्हदद नै उसतै कह्या, “जो नगर मेरे पिता नै तेरे पिता तै ले लिए थे, उननै मै मोड़ दियुँगा; अर जिस तरियां मेरे पिता नै सामरिया म्ह अपणे खात्तर बजार बणवाया, उसे तरियां ए तू दमिश्क म्ह सड़क बणवाईये।” अहाब नै कह्या, “मै इसे करार पै तन्नै छोड़ देऊँ सूं,” फेर उसनै बेन्हदद तै करार बाँधकै, उस ताहीं आजाद कर दिया। 35इसकै बाद नबियाँ के दल म्ह तै एक जन नै यहोवा तै वचन पाकै अपणे संगी तै हुक्म दिया, “मन्नै मार,” जिब उस माणस नै उस ताहीं मारण तै इन्कार करया, 36फेर पैहले नबी नै अपणे साथी तै कह्या, “तन्नै यहोवा का वचन न्ही मान्या, इस करकै सुण, जिब तू मेरै धोरै तै चल्या जावैगा, शेर तन्नै मार गेरैगा।” फेर जिब वो उसके धोरै तै चल्या गया, उसे बखत उसनै एक शेर मिल्या, अर शेर नै उस ताहीं मार गेरया। 37फेर उसनै दूसरा माणस मिल्या, अर उसतै भी उसनै कह्या, “मन्नै मार।” अर उसनै उस ताहीं इसा मारया के वो घायल होग्या। 38फेर वो नबी चल्या गया, अर आँखां नै पगड़ी तै ढक कै राजा की बाट देखदा होया राह म्ह खड्या रह्या। 39जिब राजा धोरै होकै जाण लाग रहया था, फेर उसनै उसकी दुहाई देकै कह्या, “जिब तेरा दास युद्ध क्षेत्र म्ह गया था फेर कोए माणस मेरी और मुड़कै किसे माणस नै मेरै धोरै ले आया, अर मेरै तै कह्या, ‘इस माणस की चौकसी कर; जै यो किसे तरियां छूट जावै, तो उसकी जान कै बदलै तन्नै अपणा प्राण देणा होवैगा; न्ही तो किक्कार#20:39 किक्कार लगभग 34 किलोग्राम चाँदी भर चाँदी देणी पड़ैगी।’ 40उसकै बाद तेरा दास इधर-उधर काम म्ह फँस ग्या, फेर वो न्ही मिल्या।” इस्राएल के राजा नै उसतै उत्तर दिया, “तेरा इसाए न्याय होवैगा; तन्नै आप अपणा न्याय करया सै।” 41नबी नै झट अपणी आँखां तै पगड़ी ठाई, फेर इस्राएल के राजा नै उसतै पिछाण लिया, के वो कोए नबी सै। 42फेर नबी नै राजा तै कह्या, “यहोवा तेरे तै न्यू कहवै सै, ‘ज्यांतै के तन्नै अपणे हाथ तै इसे एक माणस ताहीं जाण दिया, जिस ताहीं मन्नै सत्यानाश हो जाण नै ठैहराया था, तन्नै उसकी जान कै बदलै अपणी जान अर उसकी प्रजा के बदलै, अपणी प्रजा देणी पड़ैगी।’” 43फेर इस्राएल का राजा उदास अर नाराज होकै घर की और चाल्या, अर सामरिया नगर म्ह आया।
Currently Selected:
1 राजाओं 20: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
