1 राजाओं 1

अदोनिय्याह की राजद्रोह की योजना

1इब दाऊद राजा घणा बूढ़ा अर उसकी उम्र घणीए बढ़गी थी; अर उस ताहीं काम्बळ भी ओढ़ाए जावैं थे, फेर भी वो गरम न्ही होया करै था। 2उसके कर्मचारियाँ नै उसतै कह्या, “म्हारे प्रभु राजा कै खात्तर कोए जवान कुँवारी ढूँढ़ी जावै, जो राजा कै स्याम्ही रहकै तेरी सेवा करया करै अर तेरै धोरै लेटै, के म्हारे प्रभु राजा नै गर्मी#1:2 गर्मी या सिर्फ शरीर की गर्मी खात्तर सै पोहचै।” 3फेर उननै सारे इस्राएली देश म्ह सुथरी कुँवारी ढूँढ़दे-ढूँढ़दे शूनेम नगर की रहण आळी अबीशग नाम की एक छोरी ताहीं पाया, अर उस ताहीं राजा कै धोरै ले आए। 4वा छोरी घणीए सुथरी थी; अर वा राजा की दास्सी बणकै उसकी सेवा करदी रही; पर राजा नै उसकै गैल सहवास न्ही करया। 5फेर एक दिन दाऊद की घरआळी हग्गीत का बेट्टा अदोनिय्याह#1:5 अदोनिय्याह यो दाऊद का चौथा बेट्टा था अर उसका जन्म तब होया था जिब दाऊद हेब्रोन तै राज करै था। उसके तीन बड़े भाईयाँ के मरण कै पाच्छै इब वोए सबतै बड़ा था। सिर ऊँच्‍चा करकै कहण लाग्या, “मै राजा बणुगाँ।” फेर उसनै रथ अर घुड़सवार अर अपणे आग्गै-आग्गै दौड़ण खात्तर पचास पहरेदार राख लिये। 6उसके पिता नै तो जन्म तै लेकै उस ताहीं कदे या कहकै उदास न्ही करया था, “तन्‍नै इसा क्यूँ करया।” वो घणा सुथरा था, अर अबशालोम कै बाद उसका जन्म होया था। 7उसनै सरूयाह के बेट्टे योआब तै अर एब्यातार याजक तै बातचीत करी, अर उननै उसकै पाच्छै होकै उसकी मदद करी। 8पर सादोक याजक यहोयादा का बेट्टा बनायाह, नातान नबी, शिमी, रेई, अर दाऊद के शूरवीरां नै अदोनिय्याह का साथ न्ही दिया।

9एक दिन अदोनिय्याह नै जोहेलेत नाम के पत्थर कै धोरै जो एनरोगेल कै धोरै सै, भेड़-बळध अर त्यार करे होए पशु बलि करे, अर अपणे सारे भाई, राजकुमारां अर राजा के सारे यहूदी कर्मचारियाँ ताहीं बुला लिया। 10पर नातान नबी, अर बनायाह अर शूरवीरां ताहीं अर अपणे भाई सुलैमान ताहीं उसनै न्ही बुलाया। 11फेर नातान नै सुलैमान की माँ बतशेबा तै कह्या, “के तन्‍नै सुण्या सै के हग्गीत का बेट्टा अदोनिय्याह राजा बण बैठ्या सै अर म्हारा प्रभु दाऊद ये बात न्ही जाणदा? 12इस करकै इब आ, मै तन्‍नै इसी सलाह देऊँ सूं, जिसतै तू अपणी अर अपणे बेट्टे सुलैमान की जान बचावै। 13तू दाऊद राजा कै धोरै जाकै, उसतै न्यू पूछ, ‘हे मेरे प्रभु! हे राजा! के तन्‍नै कसम खाकै अपणी दास्सी तै न्ही कह्या, के तेरा बेट्टा सुलैमान मेरै बाद राजा होवैगा, अर वो मेरी राजगद्दी पै विराजमान होवैगा? फेर अदोनिय्याह क्यूँ राजा बण बैठ्या सै?’ 14अर जिब तू ओड़ै राजा तै या बात करैगी, फेर मै तेरै पाच्छै आकै, तेरी बात्तां की हाँ भरुगाँ।”

15फेर बतशेबा राजा कै धोरै कोठड़ी म्ह गई; राजा तो घणा बूढ़ा होग्या था, अर उसकी सेवा पाणी शूनेमिन अबीशग करै थी। 16बतशेबा नै झुककै राजा ताहीं दण्डवत करया, अर राजा नै पूच्छया, “तू के चाहवै सै?” 17उसनै जवाब दिया, “हे मेरे प्रभु, तन्‍नै तो अपणे परमेसवर यहोवा की कसम खाकै अपणी दास्सी तै कह्या था, ‘तेरा बेट्टा सुलैमान मेरै बाद राजा होवैगा अर वो मेरी गद्दी पै विराजैगा।’ 18इब देख अदोनिय्याह राजा बण बैठ्या सै, अर इब ताहीं मेरा प्रभु राजा इस बात नै न्ही जाणदा। 19उसनै भोत-से बळध त्यार करे, पशु अर भेड़ बलि करी, अर सारे राजकुमारां ताहीं अर एब्यातार याजक अर योआब सेनापति ताहीं बुलाया सै, पर तेरे दास सुलैमान ताहीं न्ही बुलाया। 20अर हे मेरे प्रभु! हे राजा! सारे इस्राएलियाँ की आँख तन्‍नै देखण लागरी सैं के तू उनतै कहवै, के म्हारे प्रभु राजा की गद्दी पै उसकै बाद कौण बैठैगा। 21ना तो जिब म्हारा प्रभु राजा, अपणे पुरखां कै गैल सोवैगा, फेर मै अर मेरा बेट्टा सुलैमान दोन्‍नु अपराधी गिणे जावांगे।”

22जिब बतशेबा राजा तै बात करै थी, के नातान नबी भी आ ग्या। 23अर राजा तै कह्या गया, “नातान नबी हाजिर सै;” फेर वो राजा कै स्याम्ही आया, अर मुँह के बळ गिरकै राजा ताहीं दण्डवत करया। 24फेर नातान कहण लाग्या, “हे मेरे प्रभु, हे राजा! तन्‍नै के घोषणा करी सै, ‘अदोनिय्याह मेरै बाद राजा होवैगा अर वो मेरी गद्दी पै विराजैगा?’ 25देख उसनै आज नीच्‍चै जाकै भोत-से बळध, त्यार करे होए पशु अर भेड़ बलि करी सैं, अर सारे राजकुमारां अर सेनापतियाँ ताहीं अर एब्यातार याजक ताहीं भी बुला लिया सै; अर वे उसके स्याम्ही खान्दे-पीन्दे होए कहवैं सैं, ‘अदोनिय्याह राजा जिन्दा रहवै।’ 26पर मन्‍नै तेरे दास नै, अर सादोक याजक अर यहोयादा के बेट्टे बनायाह, अर तेरे दास सुलैमान ताहीं उसनै न्ही बुलाया। 27के यो मेरे प्रभु राजा की और तै होया? तन्‍नै तो अपणे दास ताहीं यो न्ही जताया सै, के प्रभु राजा की गद्दी पै कौण उसकै बाद विराजैगा।”

28दाऊद राजा नै कह्या, “बतशेबा ताहीं मेरै धोरै बुला ल्याओ।” फेर वा राजा कै धोरै आकै उसकै स्याम्ही खड़ी होई। 29राजा नै कसम खाकै कह्या, “यहोवा जो मेरी जान सारे जोखिमां तै बचान्दा आया सै, 30उसकै जीवन की कसम, जिसा मन्‍नै तेरे तै इस्राएल के परमेसवर यहोवा की कसम खाकै कह्या था, ‘तेरा बेट्टा सुलैमान मेरै बाद राजा होवैगा, अर वो मेरै बदलै मेरी गद्दी पै विराजैगा,’ उस्से तरियां मै जरुर आज कै दिन करुँगा।” 31फेर बतशेबा नै धरती पै मुँह कै बळ गिरकै राजा तै दण्डवत करकै कह्या, “मेरा प्रभु राजा दाऊद सदा ताहीं जिन्दा रहवै!”

32फेर दाऊद राजा नै कह्या, “मेरै धोरै सादोक याजक, नातान नबी, यहोयादा के बेट्टे बनायाह ताहीं बुला ल्याओ।” आखर म्ह वे राजा कै स्याम्ही आए। 33राजा नै उनतै कह्या, “अपणे प्रभु के कर्मचारियाँ नै गैल लेकै मेरे बेट्टे सुलैमान नै मेरे अपणे खच्‍चर पै चढ़ाओ; अर गीहोन ताहीं ले जाओ; 34अर ओड़ै सादोक याजक अर नातान नबी इस्राएल का राजा होण कै खात्तर उसका अभिषेक करै; फेर थम सारे नरसिंगा फूँक कै कहियो, ‘राजा सुलैमान जिन्दा रहवै।’ 35अर थम उसकै पाच्छै-पाच्छै उरै आईयो, अर वो आकै मेरे सिंहासन पै विराजै, क्यूँके मेरै बदलै म्ह वोए राजा होवैगा; अर उसे ताहीं मन्‍नै इस्राएल अर यहूदा का प्रधान होण खात्तर ठैहराया सै।” 36फेर यहोयादा के बेट्टे बनायाह नै कह्या, “आमीन! मेरे प्रभु राजा का परमेसवर यहोवा भी इसाए कहवै। 37जिस तरियां यहोवा मेरे प्रभु राजा कै गैल रह्या, उस्से तरियां वो सुलैमान कै भी गैल रहवै, अर उसका राज्य मेरे प्रभु दाऊद राजा के राज्य तै भी घणा बढ़ावै।”

38फेर सादोक याजक अर नातान नबी अर यहोयादा का बेट्टा बनायाह अर करेतियां अर पलेतियां ताहीं गैल लिए होए नीच्‍चै गए, अर सुलैमान ताहीं राजा दाऊद के खच्‍चर पै चढ़ाकै गीहोन झरणे नै ले चाल्‍ले। 39फेर सादोक याजक नै यहोवा के तम्बू म्ह तै तेल भरया होया सींग लिया, अर सुलैमान का राज्याभिषेक करया। अर वे नरसिंगे फूँकण लाग्गे; अर सारे माणस बोल्‍लण लाग्गे, “राजा सुलैमान जिन्दा रहवै।” 40फेर सारे माणस उसकै पाच्छै-पाच्छै बाँसुरी बजान्दे अर इतणा बड़ा आनन्द करदे होए उप्पर गए, के उनकी आवाज तै धरती डोल उठी।

41जिब अदोनिय्याह अर उसके सारे मेहमान खाणा खा चुके थे, फेर या आवाज उननै भी सुणाई पड़ी। योआब नै नरसिंगे का शब्द सुणकै पूच्छया, “नगर म्ह भगदड़ अर चिल्‍लाहट का शब्द क्यूँ होण लाग रहया सै?” 42वो न्यू कहवैए था, के एब्यातार याजक का बेट्टा योनातान आया अर अदोनिय्याह नै उसतै कह्या, “भित्तर आ; तू तो भला माणस सै, अर भली खबर भी ल्याया होवैगा।” 43योनातान नै अदोनिय्याह तै कह्या, “सचमुच म्हारे प्रभु राजा दाऊद नै सुलैमान ताहीं राजा बणा दिया। 44अर राजा नै सादोक याजक, नातान नबी अर यहोयादा के बेट्टे बनायाह अर करेतियां अर पलेतियां ताहीं उसकै गैल भेज दिया, अर उननै उस ताहीं राजा के खच्‍चर पै चढ़ाया सै। 45अर सादोक याजक, अर नातान नबी नै गीहोन म्ह उसका राज्याभिषेक करया सै; अर वे ओड़ै तै इसा आनन्द करदे होए उप्पर गए सैं के नगर म्ह भगदड़ माचगी, अर जो आवाज थमनै सुणाई पड़ै सै वोए सै। 46सुलैमान राजगद्दी पै विराज भी रह्या सै। 47फेर राजा के कर्मचारी म्हारे प्रभु दाऊद राजा नै यो कहकै धन्य कहण आए, ‘तेरा परमेसवर, सुलैमान का नाम, तेरे नाम तै भी महान करै, अर उसका राज्य तेरे राज्य तै भी घणा बढ़ावै;’ अर राजा नै अपणे पलंग पै दण्डवत करया। 48फेर राजा नै यो भी बिनती करी, ‘इस्राएल का परमेसवर यहोवा धन्य सै, जिसनै आज मेरे देखदे एक ताहीं मेरी गद्दी पै बिठाया सै।’”

49फेर जितने मेहमान अदोनिय्याह कै गैल थे वे सारे थरथरा उठे, अर उठकै अपणा-अपणा राह लिया। 50अर अदोनिय्याह सुलैमान तै डरकै उठ्या, अर जाकै वेदी के सींग पकड़ लिये#1:50 वेदी के सींग पकड़ लिये जो कोए भी उन सींगां नै पकड़ लेवै था वो बच्या रहवै था (निर्गमन 21:13-14)। 51फेर सुलैमान ताहीं यो समाचार मिल्या, “अदोनिय्याह सुलैमान राजा तै इसा डर ग्या सै के उसनै वेदी के सींगां ताहीं यो कहकै पकड़ लिया सै, ‘आज राजा सुलैमान कसम खावै के अपणे दास नै तलवार तै न्ही मारैगा।’” 52सुलैमान नै कह्या, “जै वो अपणे आचरण तै भला माणस बणकै दिखावै तो उसका एक बाळ भी धरती पै गिरण न्ही पावैगा, पर जै उस म्ह दुष्टता पाई जावै, तो वो मारया जावैगा।” 53फेर राजा सुलैमान नै कुछ माणसां ताहीं भेज दिया ताके उस नै वेदी कै धोरै तै उतार ले आवै फेर उसनै आकै राजा सुलैमान ताहीं दण्डवत करया अर सुलैमान नै उसतै कह्या, “अपणे घर चल्या जा।”

Currently Selected:

1 राजाओं 1: BGC

Highlight

Copy

Compare