Zakaariyaasi 12
12
Yerusaalemich Gibenikkeeti Gibeno
1Israꞌeeleenaꞌochon Doono Yeeri gettiti qaaro: Shimaayoon yaggiti, showoon halliti, ashich kashee hiinnoon immiti Doono Yeeri ishichiye: 2“Yerusaalemin bi guudoona beeti aageteenaꞌo bullich, dadeddiibeeti woyinee uyee xoofoommon tuniyemmo taane. Yerusaalemi giicheehooba Yihudee showeexi katemeenaꞌoo giicheyemminaꞌone. 3Ebiyooba Yerusaalemi aageteenaꞌo bullich xaqqo maggoommon bi maggemmoyich tuniyemmo taane. Biin tiijjiya qiiccemmo bulli mayemmone; showee toommeexi aageteenaꞌo bulli biin kocha woyemminaꞌone. 4Ebiyooba hareshoo bullin keqqichemmo taane; hareshecho bullinoo geyiyemmo taane. Tunebaani Yihudee asheenaꞌon manjii ciini quyemmo taane. Aageteenaꞌochi haresheenaꞌon wolliyemmo taane. 5Ebiyooba Yihudee iraasheenaꞌo boonoshi mulloona, ‘Beshe Mawe Nuggishoo Doono Yeeri Yerusaalem beeti bi asheenaꞌoyich hakkoon immii beetone’ gettemminaꞌone.
6“Ebiyooba Yihudichi iraasheenaꞌon michi gutee daggooch beeti qaaqqee bunoommon, wotta maayi qiree daggooch conjiibeeti qaaqqee aaxxoommon tuniyemmo taane. Yoochinaa qanninooch guudiree boonoshi guudoona beeti aageteenaꞌo bullin aalliyemminaꞌone. Ebiyee gubb, Yerusaalemi asheenaꞌo diggoona boonoshi xaaꞌooch beeyemminaꞌone.
7“Daawitichi kechi asheenaꞌonaa Yerusaalemi asheenaꞌonochi oogo, Yihudee asheenaꞌochoyee bi beshaachemmoyich, Doono Yeeri ta, Yihudee ginee naayinaꞌo shiichiree wudoon danemmoyich tuniyemmo taane. 8Ebiyooba Doono Yeeri ta, Yerusaalemi beetinaꞌoyich deebo tunemmo taane; boonoshi daggoochee hakka guutoo Daawitiyoommi kupphoon tunemmone. Daawitichi kechi asheenaꞌo Nuggishoommon woyee ta maraakoommon tuneree asheenaꞌon yaabi qeejjemminaꞌone. 9Ebiyooba Yerusaalemi toommooch etto tuneꞌi waabeeti aageteenaꞌo bullin aalliyoyich tiyemmo taane.
10“Daawitichi yareenaꞌonaa Yerusaalem beetinaꞌonochi toommooch ariqqee ayaanoonaa corootee ayaanoonon ta ukkaa, boonoshi kochiton boonoshi beegiyooba, ikke mixxe bi bushoyich asho eefoommon biich eeppemminaꞌone. Bi gutenee bushoyich asho tiittee eefoommon biich eeppemminaꞌone.#Yowa. 19:37; Yaaꞌo. 1:7 11Megidi gaddoochaa Hadaad Rimoonich bi eeppeyoommon ebiyooba Yerusaalemaa ooge eefo eeppeyemmone. 12-14Showee eeppemmine; asheenaꞌo boonoshi gumbi gumb tuneree eeppemminaꞌone; Daawitichi gumbee asheenaꞌo boonoshi qell tuneree, Naataanichi gumbee asheenaꞌo boonoshi qell tuneree, Lewichi gumbee asheenaꞌo boonoshi qell tuneree, Shimeꞌichi gumbee asheenaꞌo boonoshi qell tuneree, echeti gumbee asheenaꞌo bulli boonoshi qelli qell tuneree, eeppemminaꞌone. Gumbee asheenaꞌo boonoshi qelli qell tuneree, gennoonaa doonjoonoo boonoshi qelli qell tuneree eeppemminaꞌone.#Maat. 24:30
Currently Selected:
Zakaariyaasi 12: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
