Titoosi 3
3
Yaafeeti Qoco
1Ne waan beeti kittinneenaꞌon, iraasheenaꞌonaa ukkireenaꞌonoyich hajjee beetinaꞌonaa deꞌa ii beetinaꞌona, deꞌe shuunoo bullichoo qannitinaꞌo, 2koninolla oonaaneenaꞌo, hayoochee wokkitinaꞌo, shiimechinaꞌo, asho bulli aafooch boonoshi qelloon giishii beetinaꞌo boonoshi tunemmoyich shalligichibe.
3Ebiyee aaf no wotta mullaallo, deꞌa getaano, muriccaabeeto, baribare meechi qaatoonaa meenon emirikkoonoyich guunochoommon hajjeebeeto, gonde moochecho, ashi wodoon shixxaabeeto, ashoona shichaa beeto, noonnaa noonna mateebeeto noone. 4Tunebaani noon Wodiyechi Yeeri bi deꞌittinoona ashoon bi shunonon bi gaxxiyooba, 5noon bi wodiito bi maaree beshoonalli, no shuuneti cadiqee shuunoona toonoone; noon bi wodiito guttinnee shiijjoon no daneti machoonaa Yaafe Ayaanee andiriyoonane. 6Are Ayaanoon noon Wodiyechi Yesuus Kiristoos waanaa no toommooch ceenoona kindiihe; 7ebin bi tuniito, bi wojjoona cadiqiree gibenoona no quyeebeeti bulli yemeenee kashoon no woraashemmoyichiye. 8Ebi bullich bi qaaro gibeneetone; mulloon Yeeri toommooch tooꞌiiti asheenaꞌo deꞌe shuunoon shuunoona boonoshi kupphemmoyich, eboshin gaawichiree gete. Ebi mooyo deꞌoone; asho bullichoo gaaccemmone.
9Tunebaani gaacaalli gajjiteyoochee, qaabbechinaꞌochi shigee haddoochee, hayoochee, sheeree naboona tiyiibeeti kaaroocheenoo wohe; eboshi bulli gaacaani duubeenaꞌone. 10Barbarittinoon halliibeeti ashoon ikke wottoon woyee gutte wottoon ne ittibatetaa bi mawigaata, biyee wohe. 11Ebiyoommi asho xummoonaa axaaxechonane. Biyoo bi toommooch wochii nallito bi tunoon ariibe.
Ciireexi Yibbaatoonaa Diggiyoona
12Hini yooyon Niqopooli katemoochaa kichiya ta gabaa beetoyich, Arixemaasin woyee Tikiqoosin#Mish. 20:4; Efes. 6:21-22; Qola. 4:7-8; 2 Ximo. 4:12 ne waan ta daachiigaata, kaateree ta waan wobe. 13Wottoo sheeree ariyechi Zenaasinaa Aphiloosinon#Mish. 18:24-28; 1 Qoro. 16:12 gommoochaa boonoshi iriteyaachemmoyich ne hakkimmo bullin tuniibe; boonoshich qaawiibeeti mooyo bullin boonoshich ceechibe. 14No macceenaꞌo wotta aafaalloon tuneree boonoshi echeyaachemmoyich, boonoshich qaawiibeeti mooyo beeyemmoyich buushaarechi shuunee yeshon doyibeete.
15Taanna tookkii beetinaꞌo bulli neen diggii beetinaꞌone. Shucheti kittinnee no maneenaꞌoyich no diggiyoon bechibe.
Yeerichi wojjoo ittoshi bullina tookki tunebe.
SIM International, 2020.