Titoosi 2
2
Gaawe Kittinnittinee Doyoo
1Tunebaani ne, gaawe kittinnittinee doyoyich mashaamiton dojjibe. 2Geene doonjeenaꞌo dagg tateenaꞌo, asho bullina naadeetinaꞌo, boonoshi qellee ariyechinaꞌo, Kiristoosi toommooch mullee tooꞌiyoonaa maneenaꞌon shunona, haaꞌiyoonoo kuppheenaꞌo boonoshi tunemmoyich ciice.
3Ebiyoommon wotta geene genneenaꞌo boonoshi qocoona Yeerich diireetinaꞌo, oonaaneenaꞌo, wodde woyinee uyoon wotaaneenaꞌo, deꞌe mooyon dojjii beetinaꞌo boonoshi tunemmoyich ciice. 4-5Ebin boonoshi tuniigaata, Yeerichi qaaro naakkeyaachemmoyich, gurimaashe genneenaꞌon dojjemminaꞌone; boonoshi dojjemmoo boonoshi keneenaꞌonaa boonoshi bushiisheenaꞌonon shunnii beetinaꞌo, boonoshi qellee ariyechinaꞌo, kiinaalli xalleenaꞌo, boonoshi kexooch shuunee beetinaꞌo, maaci deꞌeenaꞌo, boonoshi keneenaꞌoyich deꞌa ii beetinaꞌo boonoshi tunemmoyichiye.
6Gurimaashe anaaminaꞌo ebiyoommon boonoshi qellee ariyechinaꞌo boonoshi tunemmoyich ciice. 7-8No doyoon shixxiibeeti asho no shigoon bi gondiyemmi mooyon mucceree bi yeellemmoyich, bulli gommona gaaweton shuunebee deꞌe mooyon bekkiyecho tunebe. Ne dojjaabeeti doyoona deꞌe moochecho, asho bullina naadeeto, koniyoona oonon hakkaani iiwe yibbaatecho ne tunoon bekkiibe.
9-10Boonoshi mulloon Kiristoosi toommooch tooꞌiiti guuninaꞌo noon Wodiyechi Yeerichi doyoon bulli gommona galletiyoyich, boonoshi dooninaꞌoyich deꞌa boonoshi gettemmoyich, amee gommonolla boonoshin boonoshi emirikkemmoyich, boonoshich gonde noonoon wochaanoon, gaayaanoon, bulli gommona gibeneetinaꞌo tunoon boonoshi bekkiyemmoyich ciice.
11Ebiyoo, asho bullin wodiyoon hakkemmi Yeerichi wojjoo bi gaxxeetoyichiye. 12Ebi wojjoo axaaxee shuunoonaa hini showeexi mooyon qaatoonon qayiree, and hini yemeenooch no qellee quyoona, cadiqittinoonoo Yeerin oogiibeeti beemon no beeyemmoyich dojjii beetone. 13Ebina diireeti no gibeno tuneti ooge no Nuggishoo, noon Wodiyechi Yesuus Kiristoosi oogee yiiroona bi bekkoon quyaabeeto noone. 14Biyoo axaaxoo bulliichee noon biishiya, wotta deꞌoon shuuneya qaatiibeeti, biich tunemmi asheenaꞌon xalliiya noocha iꞌi bi kashoon beshiiꞌi immitone.#Shod. 130:8; Key. 19:5; Yibba. 4:20; 7:6; 14:2; 1 Pheex. 2:9
15Illa ebi mooyinaꞌon dojjibe; ceeni hakkoona ciici ittibatebe; koniyoona neen hoxaaye.
Currently Selected:
Titoosi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.