Roomi 8

Yeerichi Ayaanoona Yaabeeꞌi Beemo

1Illa Kiristoos Yesuusina beetinaꞌo toommooch and Yeerichi naxo kindaache. 2Kiristoos Yesuusina ta daneti, kashoon immiibeeti Ayaanee sheeroo axaaxoonaa qitoonooch shakkiibeeti sheeroochee taan kichitone. 3Meeno hakkaano bi tunetoyich, sheeroo tuniyoon hakkaani mooyon Yeeri hakkiye; Yeeri axaaxoon wokkiiya, bi hajjee Bushoon axaaxechi meechi shaahoona wocheꞌi, meenon hajjiibeeti axaaxee toommooch naxoon kindiihe. 4Ebin bi tuniito, bi Ayaanee daaggoonalli, meechi daaggoona beetaani noonna sheeroo gettiibeeti mooyo ceennemmoyichiye.

5Meechi daaggoona beetinaꞌo meechi mooyon gabiyeete; tunebaani Yeerichi Ayaanee daaggoona beetinaꞌo Yeerichi Ayaanee mooyon gabiyeete. 6Meechi mooyon gabiibeeti asho qitoochiye bi shaggemmo; tunebaani Yeerichi Ayaaneechon gabiibeeti asho kashoonaa diggoonon danemmone. 7Meechi gaboo Yeerichi sheeroyich hajjeyaano bi tunetoyich, hajjeyoonoo hakkaano bi tunetoyich, meechi gaboyich hajjeebeeti asho Yeerina kaarecho tunetone. 8Meenoyich hajjeeꞌi beetinaꞌo Yeerin emirikkoon hakkaacheete.

9Tunebaani ittoshi, Yeerichi Ayaano ittoshi mullooch bi beegaata, Yeerichi Ayaanoyich hajjeeꞌi beehotalli, meenoyich hajjeeꞌi beetaachote. Illa Kiristoosichi Ayaano biich aallo bi tunegaata, aroo Kiristoosicho toonoone. 10Kiristoosi ittoshi mullooch bi beegaata, ittoshi meeno axaaxee naboona qitito bi tunetaanoona, Yeeri aafoochaa cadiqito ittoshi tunetoyich, Yeerichi Ayaano ittoshich kashoon immitone. 11Ebiyoommon wotta Yesuusin qitoochee tiijjiti Yeeri immiibeeti bi Ayaano ittoshi mullooch bi beegaata, Kiristoos Yesuusin qitoochee tiijjito, ittoshi mullooch beeti bi Ayaanoona qitemmi ittoshi ashittinoyich wotta kashoon immemmone.

12Illa ta maneenaꞌote! Hiishoo no toommooch beetone; hini hiishoo meechi daaggoona no beeyemmoyich toonoone. 13Meechi daaggoona ittoshi beegaata, qitemmo ittoshine; tunebaani Yeerichi Ayaanee giidoona meechi shuunoon ittoshi wuxigaata, kashoona beeyemmo ittoshine. 14Yeerichi Ayaano boonoshin yaabii beetinaꞌo bulli eboshi Yeerichi bushiisheenaꞌone. 15Ittoshin bi bushoo tuniiti Ayaanoon ittoshich immiyalli, wochinnoon ittoshi shattemmoyich guuchittinee ayaanoon ittoshich imaanoone; ebich ebi are Ayaano noon yaabaa, Yeerin “Taabbo, ta Nihoocho!” iyaꞌa ceeggaabeeto noone.#Gala. 4:6 16Are Ayaano bi qelloona Yeerichi bushiishoo no tunoon no ayaanoona tookkii miixee beetone. 17Illa Yeerichi bushiishoo no tunegaata, Yeerichon woraashemmo noone; bi oogee yiiroochee no qoodeyemmoyich, biinna tookkaa iritoon qoodeebeeto no tunegaata, Kiristoosina tookkiree woraashemmo noone.

Gubb Yeeri Nooch Immemmi Oogee Yiiroo

18Gubb nooch bekkemmi oogee yiiroona tookkii bi tacheegaata, andi hini yemeeneexi xuuxo amolla shaahiꞌi taach bekkeyaache. 19Halleenaꞌo bulli Yeerichi bushiisheenaꞌo bekkoon sharaateebee quyee beetinaꞌone. 20Ebiyoo halleenaꞌon Yeeri “Duube mooyoyich hajjeebeete” iꞌi bi daaggitoyichalli, halleenaꞌochi daaggoo bi tunetoyich toonoone; tunetaa Yeeri gubbichon gabiꞌi gibenoona hajjiihe. 21Ebi gibenoo halleenaꞌolla qitee guuchittinoyich hajjeyoochee keyiree, Yeerichi bushiisheenaꞌo qitee guuchittinoochee keyiree boonoshi danemmi oogee yiiroochee boonoshi qoodeyemmoyichiye.

22Halleenaꞌo bulli and beddaahaa ikkittinoona maaxoo manjeebeeti ureechoommon gaashillii beetinaꞌo boonoshi tunoon ariibeeto noone. 23Halleenaꞌo ikkeetinaꞌo baach tooneenaꞌone; shiichiti wojjoon tuniiꞌi nooch Yeeri immiti Yaafe Ayaano nooch beeti no, no qelloona wotta no ashittinee biicheyoon, ebi getoo Yeeri bi bushoo no tunoon bi bekkiyoon quyaabee, no maacoona gaashillaabeeto noone. 24Gibenoonane no wodito; tunebaani no gibenaabeeti mooyo bekkeebeeto bi tunegaata, ibere gibeno toonoone. Bi beeggiibeeti mooyon gibenemmo konine? 25No beegaani mooyon no gibenegaata, haaꞌiyoona quyemmo noone.

26Ebiyoommon wotta Yeerichi Ayaano no maraatoon gaachee beetone; aabichiree no corootemmo gaata ariyaano noone; tunebaani Yeerichi Ayaano bi qelloona ebine getaa getteyoo hakkeyaani qaaroona gaashilliibee no qoodoon Yeerin nooch qollee beetone. 27Yeerichi daaggoommon, Yeerich yaafeeti asheenaꞌochi qoodoon bi qollee beetoyich, ashi mulleexi gaboon maqqiꞌi ariibeeti Yeeri bi Ayaanee gaboo amo gaata arii beetone.

28Yeerin shunnii beetinaꞌoyich, bi gaboommona Yeeri ceeggitinaꞌoyich tuneebeeti mooyo bulli gaaweto bi tunemmoyich Yeeri tuniyoon ariibeeto noone. 29Bi Bushoo Yesuus Kiristoosi meeti bi maneenaꞌo daggoochee qaabboo bi tunemmoyich, qaawiꞌi, Yeeri aafi bi ariyoona bi kaaccitinaꞌo bi Bushoon boonoshi shaahemmoyich shiichiꞌi maaccitone. 30Yeeri shiichiꞌi bi maaccitinaꞌon eboshin wotta ceeggiye; bi ceeggitinaꞌon eboshin wotta cadiqiihe; bi cadiqiitinaꞌon eboshin wotta oogiihe.

Bi Shunoon Yesuus Kiristoosichi Gommona Yeeri Bekkiyoo

31Illa ebi mooyichon ama gettehone? Yeeri noonna tookkii bi tunegaata, noon koyi wochemmo konine? 32Yeeri bi hajjee Bushoyich ariqqeyaanoon no bullicha iꞌi beshii immiye; ebich wotta biinna tookki bulli mooyon nooch wojjemmone. 33Yeeri kaaccitinaꞌon taggemmo konine? Yeeri bi qelloona cadiqiihe. 34Boonoshi toommooch nallemmo konine? Qitito, ebiyeenoo qitoochee tiyito, Yeerichi qanne badd koteꞌi beeti Kiristoos Yesuusi no qoodoon Yeerin nooch qollee beetone. 35Kiristoosichi shunoochee noon bariyemmo konine? Iritoo woyee xuuxo woyee duꞌo woyee shaacoo woyee tahoon mucceꞌi tubbo woyee qaaꞌi mooyo woyee qitoone? 36Ebiyoo,

“Ne naboyich heeyi xumoon wuxee miichoon

no toommooch miicheheete;

guureyemmi bagoon shaahiiꞌi noon haddiyeete”#Shod. 44:22

getaa bi kooreetoommoniye. 37Illa noon shunniti Kiristoosina ebi mooyinaꞌo bulli toommooch wudoon danoona, kochii wochii beetinaꞌoyee beshoo noone. 38Qitoo bi tunetaa, kasho bi tunetaa, maraakeenaꞌoo boonoshi tunetaa, shimaajji iraasheenaꞌoo boonoshi tunetaa, and beeto bi tunetaa, gubb woyemmo bi tunetaa, shimaajji giideenaꞌo boonoshi tunetaa, 39shimaayoyee damba beeto bi tunetaa, showoyee dech beetoo bi tunetaa, bare hallolla bi tunetaa, Kiristoos Yesuusi no Doonona Yeerinaa noonna daggooch beeti shunoochee noon bariyemmi ikke mooyolla aallo bi tunoon xiishaa ariito taane.

Currently Selected:

Roomi 8: KBRC

Highlight

Copy