Shaahiyoo 6
6
Daakkaa Icheti Ciico
1Ta bushoocho, ne giyoyich buushaaroo ne tunegaata, dallaawe ashich, kishoon tappaꞌa ne wogegaata, 2ne getteti qaaroona, ne noonoochee kechiti yibbaatoonoo yechetine getone. 3Ta bushoocho, ne qelloon wodiyoyich ebin tuniibe: Ne giyoo kishooch ne dihitoyich, afaafinoona hami buushaarittinoochee neen bi kichemmoyich qollebe. 4Ebin ne tuniyaanoon tokketoo ne aafooch shaggaaye; ne qillifoonoo maggaaye. 5Xiixxee aaddoo kishoochee, kafee kamboochee bi muricoommon newoo ne qelloon wodiibe.
6Hini beenechocho, akkaashoo waan hambe; bi gommon beegiree mullechon tunebe. 7Ukkiroo, iraashoonaa doonona boonoshich aalloone. 8Tunebaani qaawooba boonoshi maayoon qanniiheete; marehooboo boonoshi maayoon kiciyeete. 9Hini beenechocho, tokkete ne beeyemmo aati wottooniye? Geepphiroochee ne tiyemmo aatane? 10Giishechoon tokkete, giishechoon geepphiri, ne kishoon qodiree giishechoon kashe ne beetaa 11illa giroo bokkoochoommon, mucco goraadoon cuyeti ashichoommon, ne toommooch woyemmone.#Shaah. 24:33-34
12Gaacaalli gonde asho guudiiꞌi mooyon xummii yibbaatehe. 13Bi aafoona xayishiye; bi baatoonoo malletehe; bi kishoonoo kochii bekkiihe. 14Xummittino bi mullooch beetone; gondoon tuniyoyich bulli aaboon gabiye; kaaroon booddiye. 15Ebich aallo diqqoona bi toommooch shaggemmone; diqqoonoo tiishemmone; wodoonoo hakkaachemmoone.
16Doono Yeeri shixxiibeeti shiritte mooyo beete;
shabaatte mooyonoo oogichiꞌi ciigehe; eboshiyoo,
17geecechi aafo,
koottiibeeti heciyoo,
xalle damoon ukkiibeeti kishoo,
18gondoon gabiibeeti mullo,
gondooch afaafinoona wocciibeeti baatoo,
19kootoon yibbaateebeeti koote miixoonaa,
manaamaneenaꞌo daggooch hayoon booddiibeeti ashoononiye.
Yahechi Maachee Waanee Woho
20Ta bushoocho, ne nihoochi getoon waayebe; ne indee neech dojjitonoo batteyaahine. 21Bulli aaboon ne mullooch kotiibe; ne qettoochoo tifebe. 22Eboshiyoo ne hammaa beegaata, neen yaabemminaꞌone; ne qeyaa beegaata neen quyemminaꞌone; ne tiyemmonoo neenna yibbaatemminaꞌone. 23Geto ceechoone; doyoo bekkoone; kaaree sheeroo kashee gommone. 24Ebiyoo gonde maachee waanee, noonoo nooccaabeeti ashi mechee waanee neen quyemmone. 25Bi malletoon ne mulloona qaatiyaahine; aafee xayishoona neen bi yechemmoyich tuniyaahine. 26Ikke kochi gatiyoona asho yahechi ureen danoon hakkiye; tunebaani ashi mecheen qaawoo kashee gatiyoon qochiihe.
27Bi sheenooch qaaqqoon tiqqeechi bi taho micaachemmo konine? 28Qaaqqee bunee toommona hamibee, bi baatoo micaachemmo konine? 29Ashi mecheen qaawiibeeti asho bulli ebiyoommone; aree waan shaggimmo bulli sheeroochee muricaachemmone. 30Gaayo shaaceꞌi bi shaacoon wochoyich bi gaayigaata, asheenaꞌo biin hoxeyaacheete. 31Tunetaa bi yechegaata, shabaatte kishoon qoccemmone. Bi kexooch beeto bullin immemmone. 32Tunebaani shaddiibeeti asho qellaalli ashoone; ebin tuniibeeto bi kashoon aalliyemmone. 33Cooneyoonaa xooppeyoona bi toommooch shaggemmone; bulli aaboon yeelle beeyemmone. 34Qanaato kenoochi kaaroon booddemmone; nichoon bi wochii beehooboo ariqqeyaachemmone. 35Amee nummoonona deꞌon qaawaachemmone; wojjee woddoo bi ippoon aqqaayaachemmone.
Currently Selected:
Shaahiyoo 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.