Shaahiyoo 30
30
Aguuri Gettiti Shaahiyeenaꞌo
1Masee asho, Yaqeehichi bushoo, Aguuri qaaro.
Ebi uro Itelich,
Itelinaa Ukalinoyich ishichiye:
2“Iberoochaa ta, asho bulliyee beshoon mullaallo taane;
ashich beeti gaboo taach aalloone.
3Shalligoon doyaano taane;
Yaafe Yeerichonoo ciroona ariyaano taane.
4Shimaayooch kechii kindito konine?
Yongoon bi kishooch uppii yechito konine?
Aacon bi tahooch qulleto konine?
Showee tuggeenaꞌo bullin manjiito konine?
Bi shigoonaa bi bushoochi shigoona konine?
Eke ne ariyaabeeto gaata gete.
5Yeerichi qaaro iberoone;
biin gibenee beetinaꞌoyich gaachoone.
6Neen bi kaareyaachemmonaa
koote ashoon ne tuneyaachemmonoyich,
bi qaaree toommooch daakkiyaahine” iye.
Baribare Shaahiyeenaꞌo
7Doono Yeero, gutte mooyon neen qollehoye;
ta qitaan beetaa ebin taach bajjaahine.
8Koote mooyonaa koote yibbaatoonon ta waanee wokkiibe;
girechon woyee gaannechon taan tuniyaahine;
tunebaani taach qaawiibeeti maayoon taach imbe.
9Ebiyoo miyi neen ta nookkeyaachemmoyich,
“Doono Yeeri konine?” ta getaachemmoyich,
woyee gire ta gaayaachemmoyich,
ta Nuggishoo ne shigoon ta naakkiyaachemmoyichiye.
10Neen bi ufaa iritoo ne toommooch bi shagaachemmoyich,
maddechon bi doonoyich oonnaahine.
11Boonoshi niheenaꞌon uppiibeeti,
boonoshi indeenaꞌonoo diiraani shiijjereenaꞌo beetinaꞌone.
12Boonoshi qelloon xalloo shaahii ciinnii beetinaꞌo,
tunebaani boonoshi eeꞌoochee xalleyaaneenaꞌo beetinaꞌone.
13Geecoona coondereebeeti,
boonoshi qillifoonoo ciixxiibeeti, asheenaꞌo beetinaꞌone.
14Girechinaꞌon showee toommoochee,
iritechinaꞌonoo ashi daggoochee aalliyoyich,
boonoshi gasho goraado,
boonoshi gammoo shikkoo tunetinaꞌo, beetinaꞌone.
15“Imbe, imbe” ii cookiibeeti,
gutte maache bushiisheenaꞌo haaraatoyich beeteete.
Miyaani keejje mooyinaꞌo beeteete;
awuddeenaꞌoo beddiye getaaneenaꞌone;
16eboshiyoo maasho, shiyaani maaco,
aaco miyaani showoonaa beddiye getaani qaaqqoonane.
17Bi nihoon cooqqirii, bi indeechi getoonoo hoxeebeeto aafoon,
bambeexi kurecheenaꞌo qoqenemminaꞌone;
aakkeenaꞌo biin maayemminaꞌone.
18Keejje mooyinaꞌo oogichii taan worganikkiyeete;
halla ta shalligoyee damboo awuddoone.
19Eboshiyoo: Aabichiꞌi booyo shimaayoona bi yoobbiibeeto gaata,
dingero xaqqee toommona bi hammiibeeto gaata,
markabo baharee toommona bi hammiibeeto gaatinaa,
asho maacheen bi shunniibeeto gaatinane.
20Shunimaaye gommo ebine:
Biyoo maa bi noonoon hidaachaa,
“Ame gondoonona shuuneyaane taane” iyan.
21Keejje mooyona showoo shuuriye;
halla shaagon bi hakkaani mooyo awuddoone.
22Eboshiyoo: Guuno taatoo tuno,
yeexeroo maa miyo,
23shicheti maachee kenoon danoonaa,
gonnee bi genneen woraashoonane.
24Showee toommooch oogeti mullechi,
awudde gishiishi halleenaꞌo beeteete.
25Eboshiyoo: Akkaasheenaꞌo giidaalli halleenaꞌone;
tunebaani boonoshi maayoon qaawooba kiciyeete.
26Ukkecheenaꞌo hakka guute halleenaꞌone;
tunebaani boonoshi kexon xaqqee googinooch tuniiheete.
27Gecheenaꞌoyich taatoo aalloone;
tunebaani bulliyona shafiroona qaxiriyeete.
28Sholleenaꞌo kishoona yechee beetinaꞌone;
tunebaani taatee kexooch beeheete.
29Boonoshi shaaddo emirikkiibeeti keejje mooyinaꞌo beeteete;
halla gaawichii shaaddee beetinaꞌo awuddeenaꞌone.
30Eboshiyoo: Cooxinaꞌo daggoochee beshe kuppho tuneti
konaakketi aafoochenolla gubb wotteyaani daaheroo,
31bekeekiibeeti baakkee wuro,
emmishee baaddoonaa
bi ginee naayinaꞌona tookkii hammiibeeti taatoonane.
32Mullee muccoona ne qelloon oogiyaabeeto ne tunegaata,
woyee gonde mooyon tuniyoyich gabito ne tunegaata,
ebi mooyon gaawichiree shalligibe:
33Ejjoon qico qefoon kichiye;
muddoon mito damoon kichiye;
kaaree boodo yexoon deebiye.
SIM International, 2020.