Shaahiyoo 28
28
1Gonde asho, koniyoona biin yoohaanoon wocciye;
tunebaani cadiqo daaheroochoommon keqqaalloon beehe.
2Showoo hukkoo shuunegaata, ukkiroo biich meettiye;
tunebaani ariyechonaa gabechona tuneti ashoona
kupphe taatee showoo tune yagemmone.
3Girechon duꞌiibeeti ukkiroo#28:3 woyee “Girecho”,
maayoon aalliibeeti amichi dudoommone.
4Sheeroon qajjiibeeti asheenaꞌo gondeenaꞌon naadiyeete;
tunebaani sheeroon quyee beetinaꞌo gondeenaꞌon shixxiyeete.
5Gonde asheenaꞌo dayinnetoon shalligaacheete;
tunebaani Doono Yeerich goyinnee beetinaꞌo gaawichiꞌi shalligiyeete.
6Bi gommo xummoo tuneti gaannechoyee,
bi gommo xalloo tuneti girecho beshiye.
7Sheeroon quyeebeeto, mullechi bushoone;
tunebaani gaacaalleenaꞌona guupheebeeto, bi nihoon yeelliihe.
8Koyitiyoonaa bogona gaannoon kiciibeeti asho,
bi kiciibeeto, girechinaꞌoyich ariqqee beetoyichiye.
9Sheeroon waayoochee bi waamon badd wochiibeeto
bi corooto ciigeetone.
10Kaameenaꞌon gonde gommooch yaabiibeeto,
bi iijjiti oppooch dihemmone;
tunebaani xalleenaꞌo gaawe mooyon woraashemminaꞌone.
11Gaannechi asho bi qelloon mullecho tuniiꞌi ciinniye;
tunebaani gabechi girecho ebi bi qocoon xalla kichiye.
12Cadiqeenaꞌo wudoon danehooba oogeti emiroo tunehe;
tunebaani gondeenaꞌo ukkirehooba asho aashehe.
13Bi axaaxoon aachiibeeto aafeyaachemmone;
tunebaani bi axaaxoon aanniꞌi,
axaaxee shuunoon qajjiibeeto maareyemmone.
14Bulli aaboon Doono Yeerin shattiibeeto diireetone;
tunebaani mulli manjoo iritee toommooch dihemmone.
15Girechinaꞌon hajjiibeeti maaci manje ukkiroo,
gigeebeeti daaheroommo, woyee capphi yecha ii beeti diiboommone.
16Gabaalli iraashoo xuꞌechi maaci manjoone;
tunebaani tateyaani gommona gaacoon danoon shixxii beetochi eeno genjemmone.
17Ashi damee hiishechi asho
bi qitimmi wottoon yallyallimi beeyemmone;
koniyoona biin gaachaaye.
18Bi shaaddo kaamoo tuneti asho wodemmone;
tunebaani xumme gommecho diqqoona dihemmone.
19Bi showoon gochiibeeto koshon michemmone;
tunebaani gaacaalli mooyon dabbiibeeto oogichi giremmone.
20Gibeneeti asho oogichi diireyemmone;
tunebaani gaannecho tunoyich wotwotiibeeto,
sheeroochee muricaachemmone.
21Ashi aafoon ciinniꞌi heppoo, tato toonoone;
tunebaani ikkikke asho ikke tiishee koshoyicha iꞌi,
gondoon shuunee beetone.
22Hiriggecho gaanneya afaafinehe;
giroo biin yechemmo bi tunoon ariyaache.
23Maanjii beetoyee, ashoon kaaree ciicciibeeto
gubbich gaawe aafoona ciichemmone.
24Bi indeechon woyee bi nihoochon boggiichii,
“Ebi axaaxoo toonoone” ii beeto, aalliyechochi guuphone.
25Hiriggechi asho kaaroon booddiye;
tunebaani Doono Yeerin gibeneebeeto gaannemmone.
26Bi qelloon gibeneebeeti asho mullaalloone;
tunebaani shalligoona shaaddeebeeto wodemmone.
27Girechoyich immiibeeto mucceyaachemmone;
tunebaani bi aafoon badd wochiibeeto, uppeyemmone.
28Gondeenaꞌo ukkirehooba asheenaꞌo aasheheete;
tunebaani ukkirittinoochee boonoshi kindiyooba cadiqeenaꞌo meettiyeete.
Currently Selected:
Shaahiyoo 28: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.