Shaahiyoo 16
16
1Asho ikke mooyon bi mulloona gabiye;
tunebaani are gaboo bi ceennemmo Doono Yeerinane.
2Ashich bi gommo bulli xalloo shaahii bekkehe;
tunebaani Doono Yeeri mulloon maqqiye.
3Ne shuunoon Doono Yeerich beshii imbe;
ne gaboo ceennemmone.
4Doono Yeeri halliti mooyo bulli nabechone;
biyoo gondeenaꞌon aallee aaboyich qanniitone.
5Geecii beetinaꞌo bullin Doono Yeeri ciigehe;
iberoochaa boonoshin sheeraanoon qayaachemmone.
6Shunoonaa gibenoona axaaxoo qereehe;
Doono Yeerin shatona asho axaaxoochee wokkiye.
7Asho bi shaaddoona Doono Yeerin emirikkiibeeto bi tunegaata,
bi etteenaꞌo diggoona biinna tookki boonoshi beeyemmoyich tuniihe.
8Dayinnetoon dabiyoona daneebeeti wodde gaannoyee,
tate gommona daneebeeti giishecho beshiye.
9Asho bi mulloona bi gommon gabiye;
tunebaani bi gommon kaachemmo Doono Yeerine.
10Doono Yeerichi nalloo taatoochi noonooch beetone;
ebich bi noonoo nalloochaa muricaache.
11Tate machoonaa qeellee qiicoona Doono Yeerichone;
mollexxeexi qeellee qiiceenaꞌo bulli bi shuuneenaꞌone.
12Gonde mooyon shuuno taateenaꞌo waanaa ciigeetone;
ebiyoo taatee qeeno manjiibeeto, cadiqoona bi tunetoyichiye.
13Cadiqe ashi yibbaatoo taateenaꞌon emirikkiye;
iberoon yibbaatee beetonoo shunniyeete.
14Taatoochi kaaro qitee wochee bushoommone;
tunebaani mullechi asho ebi kaaroon aqqiihe.
15Taatoochi aafee birooch kasho beetone;
biinna shuchoo naawoobee amiyon deebiibeeti quboommone.
16Aachoon danoyee shalligoon dano beshiye;
birewoon danoyee goommii deꞌon dano gaawiye.
17Kaameenaꞌochi boocho gondoochee wokkitone;
tachii shaaddeebeeto bi kashoon wodiihe.
18Geecoo aallooch bechiye;
bi qelloon yeephoo dihooch yaabiye.
19Geecechinaꞌona tookkii kecoon qoodeyoyee,
girechinaꞌona tookkii qelloon giishiiꞌi beemo gaawiye.
20Ciicoon deqqii beetoyich mooyo kaamehe;
Doono Yeerin gibeneebeeto diireetone.
21Mullechi asho shalligecho getteyemmone;
shaawi yibbaatoo ariyoon daakkiye.
22Shalligoo, hajjitoyich kashee tunoone;
tunebaani tuusheenaꞌo boonoshi tuushoona sheereeheete.
23Mullechochi mullo, bi noonoon quyehe;
bi noonoochoo ariyoon daakkiye.
24Shaawi yibbaatoo, kookkooch noocciibeeti,
ashittinoonoo wodiibeeti, eechi woolloommone.
25Ashich kaamoo shaahiibeeti boocho beete;
tunebaani ciiroochaa qitooch daammii beetone.#Shaah. 14:12
26Shaacoo, shuunechon kupphe bi shuunemmoyich tuniihe;
bi qettoo, bi shuunemmoyich biin shuurikkiye.
27Gaacaalli asho ashich gondoon gabiye;
bi yibbaatoo qaaqqee aaxxoochoommon michii beetone.
28Xumme asho, ashoonaa ashoonon kaariihe;
tippecho shunechonaa shunechonon kuxxiye.
29Xuꞌechi asho bi giyoon dawushiye;
gonde gommoochoo daammiye.
30Aafoona xayishiibeeto, xumme gaboon gabiye;
bi noonoon shaacciibeeto gonde mooyon tuniihe.
31Bukkoo oogee gubbichoone;
bi daneebeeto, cadiqo tunoonane.
32Ginee anaamoyee haaꞌiyechi asho gaawiye;
katemoon kochii yechitoyee bi qelloon hajjito beshiye.
33Ixoo kuchee beetone;
tunebaani mooyon kuxxiibeeto Doono Yeerine.
SIM International, 2020.