Haddoo 9
9
Beshee Baaroo Wochinnoon Baareyoo
1Gibitsee boonoshi kechiti guttinnee natooba, ikkinnee agenooch Doono Yeeri Muusich Siini barahoochaa ishichiye: 2“Israꞌeeleenaꞌo Beshee Baaroon maacheeti baaree aabooba boonoshi baaremmoyich tuniibe. 3Hini agenee aaraa awuddinnee qemooba showee shimmishimmooch maacheeti baaree aabooba baaribeete. Qociyoo bulliyoommona, geto bulliyoommonoo baaribeete” iye.
4Muusiyoo Beshee Baaroon boonoshi baaremmoyich, Israꞌeeleenaꞌoyich gettiye. 5Batti batti agenee aaraa awuddinnee qemooba, showee shimmishimmooch Beshee Baaroon Siini barahoochaa baariyeete. Israꞌeeleenaꞌo Doono Yeeri Muusich gettitoommon bulli mooyon tuniiheete.#Key. 12:1-13
6Tunebaani boonoshi daggoochee ikkikkeenaꞌo dubenoon yeshona eeꞌetinaꞌo boonoshi tunetoyich, arooba Beshee Baaroon baaroo hakkaaneenaꞌone. Boonoshiyoo Muusinaa Haroonina waan hammiyeete. 7Muusichoo “Dubenoon yeshona eeꞌeto noone; tunebaani maacheeti aabooba Israꞌeeleenaꞌona tookki Doono Yeerich deejjoon no giddiyaachemmoyich no bachaa beeto, amoyichiye?” iyeete.
8Muusiyoo boonoshich “Doono Yeeri ittoshichon amoon bi gettemmo gaata ta waayemmi wottoon quyebote” iye.
9Doono Yeeri Muusich ishichiye: 10“Israꞌeeleenaꞌoyich ishichi gete: ‘Ittoshi daggoochee woyee ittoshi shiijjereenaꞌo daggoochee, asho koniyoona dubenoon yeshona bi eeꞌegaata woyee wohi gommooch hammito bi tunegaata, Doono Yeeri taach Beshee Baaroon baaroo hakkiye. 11Ebinoo guttinnee agenee aaraa awuddinnee qemooba showee shimmishimmooch baaribeete; baaree bagoon shittoo giyaani koshonaa caammiibeeti michi waamona tookki mameete. 12Deco harimmi wottoon amoonolla echiyaanoon mameete; bi shaawushoon tiichaayeete; Beshee Baaree qociyoommona bulli mooyon tuniibeete.#Key. 12:46 13Tunebaani ikke asho, xalloo tuneebee, wotta wohi gommooch hamaanoon Beshee Baaroon baaroo bi qayigaata, ebi asho bi asheenaꞌo daggoochee kichaa yookkebe; ebiyoo maacheeti baaree aabooba Doono Yeeri taach deejjoon giddiyoo bi qajjitoyichiye. Ebi uro bi axaaxoyich sheereyemmone.
14“ ‘Ittoshi daggooch koteti shiqqoo Beshee Baaroon Doono Yeeri taach baariya bi qaawigaata, Beshee Baaree qociyoommonaa doyoommonon tuniibe; ittoshi daggooch beeti shiqqoyichoo tuneba showee bushoyich barbaraani ikke qociyoo tunebe’ gete” iye.
Yaafee Duukkaanee Tookkaa Qubo Bekko
(Keyo 40:34-38)
15Yaafee duukkaanoo xogeehooba, qubo yaafee duukkaanoon qeriye; xumoochee harooch beddaahaa yaafee duukkaanee tookkaa qaaqqoon shaahii aaxxee beehe. 16Eechiꞌi kuxaanoon qerii beehe; qubo xumoon qaaqqoon shaahi beehe. 17Qubo duukkaanee toommoochee bi tiyiyooba, Israꞌeeleenaꞌo qaxirii beeheete. Qubo hammii neexeti xaaꞌooch Israꞌeeleenaꞌo kaamboon geddii kotee beeheete. 18Doono Yeerichi getoona Israꞌeeleenaꞌo qaxirii beeheete; Doono Yeerichi getoona kaamboon geddii kotee beeheete. Qubo yaafee duukkaanee toommooch bi beeti yemeeno bulliich boonoshi kaambooch kotee beeheete. 19Qubo meeti aaboon yaafee duukkaanee toommooch bi yagitaanona, Israꞌeeleenaꞌo Doono Yeerichi getoon quyeheetani, qaxiraaneenaꞌone. 20Ikkikkoochaa qubo yaafee duukkaanee toommooch giisheche aaboon yagii beehe. Arooba Doono Yeerichi getoommona are kaambooch yagii beeheete; wotta Doono Yeerichi getoommonoo qaxirii beeheete. 21Ikkikkoochaa qubo xumoochee harooch beddaahaa baach yagii beehe. Harooch qubo tiyimmona qaxirii beeheete; xumoonoo tuneba areddoon, qubo tiyimmona qaxirii beeheete. 22Qubo gutte qemon tuneba ikke agenoon, woyee ikke naton duukkaanee toommooch bi yagigaata, Israꞌeeleenaꞌo qaxiraanoon boonoshi kaambooch kotee beeheete; tunebaani bi tiyiyooba, qaxirii beeheete. 23Doono Yeerichi getoona kaamboon geddii kotee beeheete; Doono Yeerichi getoonoo qaxirii beeheete; Doono Yeeri Muusina bi gettitoommon, Yeerichi getoon quyee beeheete.
Currently Selected:
Haddoo 9: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
