Haddoo 4
4
Qohaateenaꞌoyich Icheti Shuunoo
1Doono Yeeri Muusinaa Harooninon ishichiye: 2“Lewi asheenaꞌoochee Qohaateenaꞌon boonoshi gumbi gumboona, boonoshi qaabbechinaꞌo yari yaroona haddibote. 3Boonoshi eeno shaashe natoochee aache natooch beddaahaa beeti, danee duukkaanee shuunooch giyiꞌi maddoyich bedditi anaamo bullin haddibote.
4“Qohaateenaꞌochi shuunoo danee duukkaanee daggooch oogichii yaafeeti qiicoon quyoone. 5Kaamboon waaxxii hamma ittoshi tiyiyooba, Harooninaa bi bushiisheenaꞌona duukkaanooch giyiree qeriibeeti maccillaatoon kindiibeete. Aroona wogee taabootoon kaafeete. 6Aroochee gaawichaa qucheti gooqqoona qeribeete; aree toommooch hullimalle shimaayite qoreddoon yaggibeete; yareenaꞌonoo boonoshi xaaꞌooch giijjibeete.
7“Yaaree kochi madellee toommooch shimaayite qoreddoon yaggibeete. Aree toommooch yalle saaneenaꞌon, ixaano geddeebeeti shaateenaꞌon, quppe saaneenaꞌon, ebiyoommon wotta uyee deejjoon giddiyoyich tunemmi koddeenaꞌon gedeete; kuxeyaanoon bulli aaboon geddeebeeti koshonoo arooch kotiibeete. 8Eboshi toommooch ceelle tahoon yaggibeete; gaawichaa qucheti gooqqoon qeribeete; yareenaꞌon boonoshi xaaꞌooch giijjibeete.
9“Wotta shimaayite qoreddoon daamiree, ceechee maqirajjoon, ceechee qiicoon, qafeteenaꞌon, ciitoo kiceyemmi gafeteenaꞌonaa ebi maddoyich gaacciibeeti zayitee qiico bullinon qeribeete. 10Ebinaa bi qiico bullinon gaawichaa qucheti gooqqoona kaafiree shaaggeebeeti madellee toommooch kotiibeete.
11“Aroochee, aachee deejjee gudee toommooch shimaayite qoreddoon oppebeete; gaawichaa qucheti gooqqoona kaafeete; yareenaꞌonoo boonoshi xaaꞌooch giijjibeete.
12“Yaafe Xaaꞌoochaa maddoyich gaacciibeeti maddee qiiceenaꞌo bullin daamiree shimaayite qoreddoona kaafeete; gaawichaa qucheti gooqqoona qeriree shaaggeebeeti xaawulee toommooch kotiibeete.
13“Deejjee gudoochee tulloon hidi kichiichi, damere tahoon bi toommooch yaggibeete. 14Deejjee gudoyich gaacciibeeti qiico bullin, eboshiyoo qaaqqee buno yecheebeeti qiiceenaꞌon, gomeenaꞌon, tulloo ucheebeeti maankeenaꞌonaa quppe saaneenaꞌonon aree toommooch kotiibeete. Eboshi toommooch gaawichaa qucheti gooqqoon qeribeete; yareenaꞌonoo boonoshi xaaꞌooch giijjibeete.
15“Kaamboon waaxxii hamma ittoshi tiyiyooba, Harooninaa bi bushiisheenaꞌona yaafee duukkaanee qiicoonaa baribare bi qiico bullinon kaappii boonoshi ciichitoyee gubb, ebi qiicoon shaagoyich Qohaateenaꞌo wobeete. Tunebaani boonoshi qitaachemmoyich, ebi yaafeeti qiicoon ciroona yechaayeete. Illa danee duukkaanoo tiyimmi haddoona Qohaati yareenaꞌo#4:15 Qohaati yareenaꞌo yeshaachemmo, qiico kaappeyaan beetenani bi kaappeechaa toonoone. shuunoo ebine.
16“Qeeshoo, Harooni bushoo Elazaari ceechee zayitee toommooch, shaawi cinnechi ixaanee toommooch, kuxeyaanoon bulli aaboon giddeebeeti maayi buuroonaa huutee zayitoonochi toommooch ukkirebe. Wotta danee duukkaanoo bullin, arooch beeti, yaafeeti qiico bullinoo quyebe” iye.
17Doono Yeeri Muusinaa Harooninoyich ishichiye: 18“Qohaatichi gumbeenaꞌon, naxeeree Leweenaꞌo daggoochee boonoshi aallemmoyich tuniyaahote. 19Oogichii yaafeeti qiico beetooch boonoshi giddee beegaata, ebin boonoshich tuniibote. Qitaanoon kashoona boonoshi beeyemmoyich, Harooninaa bi bushiishoona giyiree asho bi ikkikkoyich bi shuunemmonaa bi shaaggemmonon arichiibeete; 20tunebaani yaafeeti qiicoon ikke wottoonona beegoyich giyaayeete. Boonoshi giyigaata, qitemminaꞌone” iye.
Gerishooneenaꞌoyich Icheti Shuunoo
21Doono Yeeri Muusich ishichiye: 22“Wotta Gerishooneenaꞌon boonoshi gumbi gumboona, boonoshi qaabbechinaꞌo yari yaroona haddibe. 23Boonoshi eeno shaashe natoochee aache natooch beddaahaa beeti, danee duukkaanee shuunooch giyiꞌi maddoyich bedditi anaamo bullin haddibe.
24“Gerishooni gumbeenaꞌo shuunemmonaa shaagi maddemmona ebiniye: 25Yaafee duukkaanee maccillaateenaꞌon, danee duukkaanoon bi qeroona tookki, bi toommooch qereebeeti gaawichaa qucheti gooqqoon, danee duukkaanee kellee maccillaatoon, 26yaafee duukkaanoonaa deejjee gudoonochi guudoona beeti addibaabee maccillaatoon, addibaabee kellee maccillaatoon, wodereenaꞌonaa ebi maddooch gaacciibeeti qiico bullinon shaageete; ebina maddebeete. 27Gerishooni asheenaꞌochi maddoo bulli Harooninaa bi bushiisheenaꞌonochi getoona tunebe. Boonoshi shaaggemmi mooyo bullin boonoshich imbe. 28Illa Gerishooni gumbeenaꞌochi shuunoo danee duukkaanee daggooch ebine. Qeeshoo Harooni bushoo Itamaariyee desh tuneree shuunemminaꞌone.
Meraareenaꞌoyich Icheti Shuunoo
29“Meraari bushiisheenaꞌon boonoshi gumbi gumboona, boonoshi qaabbechinaꞌo yari yaroona haddibe. 30Boonoshi eeno shaashe natoochee aache natooch beddaahaa beeti, danee duukkaanee shuunooch giyiꞌi maddoyich bedditi anaamo bullin haddibe. 31Danee duukkaanee daggooch boonoshi maddee beegaata boonoshi tuniyemmo ebiniye: Yaafee duukkaanee shaaqqeenaꞌon, tuggeenaꞌon, tureenaꞌonaa boonoshi neexeebeeti baateenaꞌonon shaageete. 32Wotta addibaabee guudoona beeti giimbeenaꞌon boonoshi neexeebeeti baateenaꞌona tookki, xogoonaa woderoonon, bi qiico bullinaa ebi maddoyich gaacciibeeto bullinon shaageete. Boonoshi shaaggemmi qiico bullin bi shigi shigoon ceegiree boonoshich imbe. 33Meraarichi gumbeenaꞌo qeeshoo Harooni bushoo Itamaariyee desh tuneree boonoshi shuunemmo ebiniye” iye.
Leweenaꞌochi Haddoo
34Muusi, Harooninaa iiteenaꞌochi ukkireenaꞌona Qohaatichi yareenaꞌon boonoshi gumbi gumboona, boonoshi qaabbechinaꞌo yari yaroona haddiyeete. 35Shaashe natoochee aache natooch beddaahaa beeti, danee duukkaanee shuunooch giyiꞌi shuunoon hakkiti anaaminaꞌo bullin haddiyeete. 36Boonoshi gumbi gumboona haddeetinaꞌo gutte humaa shabaatte ballaa aacheenaꞌone. 37Doono Yeeri Muusina gettitoommon, Muusinaa Haroonina hadditi, danee duukkaanee daggooch maddeti Qohaati gumbeenaꞌochi haddoo ebine.
38-40Shaashe natoochee aache natooch beddaahaa beeti, danee duukkaanee shuunooch giyiꞌi shuunoon hakkiti, boonoshi gumbi gumboonaa boonoshi qaabbechinaꞌo yari yaroona haddeeti, Gerishoonichi yareenaꞌo bulli gutte humaa shiritte ballaa shaasheenaꞌone. 41Doono Yeeri gettitoommon, Muusinaa Haroonina hadditi, danee duukkaanee daggooch maddeti, Gerishooni yareenaꞌochi gumbeenaꞌo bullichi haddoo ebine.
42-44Shaashe natoochee aache natooch beddaahaa beeti, danee duukkaanee shuunooch giyiꞌi shuunoon hakkiti, boonoshi gumbi gumboonaa boonoshi qaabbechinaꞌo yari yaroona haddeeti, Meraarichi yareenaꞌo bulli keejje humaa gutte balleenaꞌone. 45Doono Yeeri Muusina gettitoommon, Muusinaa Haroonina hadditi Meraari bushiisheenaꞌochi gumbeenaꞌo haddoo ebine.
46Muusi, Harooninaa Israꞌeelee ukkireenaꞌona Leweenaꞌon boonoshi gumbi gumboona, boonoshi qaabbechinaꞌo yari yaroona haddiyeete. 47-48Shaashe natoochee aache natooch beddaahaa beeti, danee duukkaanee shuunee shuunoonaa qiicee shaagonooch giyiꞌi haddeetinaꞌo bulli shimitte humaa uuche ballaa shinneenaꞌone. 49Doono Yeeri Muusina gettitoommon boonoshi ikkikkoona boonoshi shuunoonaa boonoshi shaagoonooch neexeheete.
Ebina Doono Yeeri Muusina bi gettitoommon, haddeeheete.
Currently Selected:
Haddoo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
