Haddoo 30
30
Mookkee Mookko
1Muusi Israꞌeelee yoodeenaꞌochi ukkireenaꞌoyich ishichiye: “Doono Yeeri gettiti mooyo ebine: 2Asho Doono Yeerich mookkoon bi mookkegaata woyee wogoon bi giyigaata, bi heciyoon shaddaaye. Bi noonoochee kechitoommon bullin tuniibe.#Yibba. 23:21-23
3“Maache bushee bi bushittinoona bi nihoo kexooch beechaa Doono Yeerich mookkoon bi mookkegaata woyee wogoon bi giyigaata, 4bi nihoo bi mookkoon woyee wogoon bi gimon waayeechii amoonolla getaanoon cikkii bi qayigaata, bi mookko bullin woyee bi wogeti wogo bullin ceechoo biich qaawiihe. 5Tunebaani bi nihoo waayeꞌi bi bayigaata, bi mookkoon woyee wogoon ceechoo biich qaawiyaachemmone. Bi nihoo bajjitoyich Doono Yeeri biin maaremmone.
6“Ebiyoommon wotta ikke ure mookkaachaa woyee bi noonoochee muricaa wogoon giyaachaa kenoon bi shaagigaata, 7bi kenoo ebin waayeechii amoonolla getaanoon cikkii bi qayigaata, bi mookkoon woyee bi wogoon ceechoo biich qaawiihe. 8Tunebaani bi keno waayeꞌi bi bayigaata, tuniyoyich bi mookketi mookkoon woyee bi noonoochee muricaa bi wogeti wogoon ure toommoochee kindiyemmone. Doono Yeeriyoo ureen maaremmone.
9“Tunebaani bi keno qititi woyee gawukkeeti ure, bi mookketi mookkoon woyee bi wogeti wogoon ceechoo biich qaawiihe.
10“Maachee bi keno kexooch beechaa bi mookkegaata woyee bi wogegaata, 11bi keno waayeechii bayaanoon cikkii bi qayigaata, bi mookko bullin woyee bi wogeti wogo bullin ceechoo biich qaawiihe. 12Tunebaani bi keno ebin bi waayehooba bi bayigaata, bi mookkoon woyee bi noonoochee muricaa bi wogeti wogoon ceechoo biich qaawiyaache. Bi keno bajjitoyich Doono Yeeri biin maaremmone. 13Bi keno bi mookketi mookkoon woyee bi qelloon giishiyoyich bi wogeti wogo bullin echiyoon woyee manjiyoon hakkiye. 14Tunebaani bi keno ebi mooyon amoonolla getaanoon qemoochee qemooch cikkii bi qayigaata, ebi bi mookko bullin woyee bi toommooch beeti, bi wogeti wogo bullin manjiitone getone. Ebi mooyon waayeꞌi, amoonolla getaanoon cikkii bi qajjitoyich, manjiitone. 15Tunebaani ebi mooyon waayee yagiichii bi echiigaata, ebi ureechi axaaxoon shaaggemmo biine” iye.
16Illa Doono Yeeri Muusich immiti, kenoonaa mecheenochi daggooch, wotta nihoonaa kexooch tookkii beeti busheenochi daggooch beeti, mookkee qociyoo ebine.
Currently Selected:
Haddoo 30: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
