Haddoo 19
19
Aacona Xallee Doyoo
1Doono Yeeri Muusinaa Harooninoyich ishichiye: 2“Doono Yeeri ta getteti sheeree qociyoo ebine: Shappiti mooyo woyee bache mooyo bi achooch aalli, waanjoo haxxeyaani ceelle gidereen boonoshi deebemmoyich Israꞌeeleenaꞌoyich gete. 3Are gidereenoo qeeshoo Elazaarich immemmo ittoshine. Ebi gideree kaamboyee maach daamaa, Elazaari aafoochaa guureyemmine. 4Qeeshoo Elazaariyoo ebi gideree damoochee giishechoon bi yapheroona daamiree, danee duukkaanee kellaa shabaatte wottoon wucemmone. 5Gidereyoo bi ciini beetaa, bi gooqqo, bi meeno, bi damoonaa bi haamboona tookki miccemmine. 6Qeeshoo yigee mixon, hisoophee michi waamonaa ceelle woshiqoonon gideree miccaabeeti qaaqqooch duppemmone. 7Aroochee qeeshoo bi tahoonaa bi achoonon machemmone. Ebina wotteree kaambooch giyemmone. Qeeshoo xumemmi wottoon eeꞌeto tunemmone. 8Gidereen michiti uro bi tahoonaa bi achoonon machemmone. Biyoo xumemmi wottoon eeꞌeto tunemmone.
9“Xalle asho gidereechi tulloon ushiree kaamboyee maach xalle xaaꞌooch kotiyemmone. Ebiyoo eeꞌoochee xalliibeeti aacon qanniyoyich gaaccemmo tuneree, Israꞌeelee iiteenaꞌoyich beeyemmone. Ebi axaaxoochee xalliyoyich gaaccemmone. 10Gidereechi tulloon uchiti asho bi tahoon machemmone. Xumemmi wottoonoo eeꞌo tunemmone. Ebiyoo Israꞌeeleenaꞌonaa boonoshi daggooch beeti shiqqeenaꞌonoyich bulli yemeenoon qociyoo tunemmone.
11“Ashi dubenoon yechito, shabaatte qemi wottoon eeꞌo tunemmone. 12Keejjinnee qemoobinaa shabaattinnee qemoobina bi ashittinoon ebi aacona xalliyemmone; biyoo xallemmone. Tunebaani keejjinnee qemoobinaa shabaattinnee qemoobina bi ashittinoon xalliyoo bi qayigaata, xalleyaachemmone. 13Ashi dubenoon yechimmo koniyoona bi ashittinoon xalliyoo bi qayigaata, Doono Yeerichi yaafee duukkaanoon eeꞌiyemmone. Ebi asho Israꞌeeleenaꞌo daggoochee kichaa yookkebe. Xalliibeeti aacon bi toommooch wuciyoo bi qajjitoyich eeꞌoone. Bi eeꞌittinoochee xalleyaanoone.
14“Duukkaanee daggoochaa asho qitiyooba tunemmi sheeroo ebine: Duukkaanee daggooch beeto tuneba duukkaanooch giyiibeeto, bulliyona shabaatte qemi wottoon eeꞌo tunemmone. 15Wotta qereyaani aahe qiico bulli eeꞌo tunemmone.
16“Xalle gaddoochaa, goraadoona qititochi dubenoon woyee biiyeꞌi qititochi dubenoon yechimmo, wotta ashi shaawushoon woyee maashee oppoon yechimmo, shabaatte qemi wottoon eeꞌo tunemmone.
17“Eeꞌeti ashich, axaaxoochee xalliyoyich micceti gidereechi tulloochee baaretooch ushaa aree toommooch woce aaco ukkeebe. 18Xalle asho hisoophee michi waamon daami aachi daggooch hace; duukkaanooch, bi daggooch beeti qiico bulliich, arooch beeti asho bulli toommooch, wotta shaawushoon woyee goraadoona qititon woyee biiyee qititon woyee maashee oppoon yechito toommooch wucemmone. 19Xalle asho xalleyaani ashi toommooch keejjinnee qemoobinaa shabaattinnee qemoobinon wucemmone; shabaattinnee qemooboo xalliyemmone. Ebi xalleti asho bi tahoon machemmone; bi achoonoo machemmone; aroobee xumooch xalloo tunemmone. 20Tunebaani eeꞌeti asho bi ashittinoon xalliyoo bi qayigaata, Doono Yeerichi yaafee duukkaanoon bi eeꞌitoyich iiteenaꞌo daggoochee kichaa yookkebe. Xalliibeeti aacon bi toommooch wuciyoo bi qajjitoyich eeꞌoone. 21Ebiyoo bulli aaboon ittoshich qociyoo tunemmone.
“Xalliibeeti aacon wuciibeeti asho bi tahoon machemmone. Xalliibeeti aacon yechiti asho xumemmi wottoon eeꞌo tunemmone. 22Eeꞌe asho yechiti amee mooyolla eeꞌemmone. Ebi qiicoon yechimmi ashoo xumemmi wottoon eeꞌemmone” iye.
Currently Selected:
Haddoo 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
