Naahoomi 1
1
1Nanawi katemeechon Doono Yeer waanee getteeti wocho ebine. Yeeri Eliqooshi gafee asho tuneti Naahoomi ebi mooyon yaaꞌoona bi beeggemmoyich tuniitaa, biyoo ebi aroon hini macaafooch kooritone.
Yeerichi Kaaro Nanawi Toommooch Kindoo
2Doono Yeeri qanaatechonaa nichoon kichechonane;
Doono Yeeri nichoon kichechonaa naxechonane;
Doono Yeeri bi etteenaꞌo toommooch nichoon kichii beetone;
bi etteenaꞌo toommooch naxoon kindii beetone.
3Doono Yeeri kaatee kaareyaanoonaa oogeti giidechonane;
tunebaani amolla tunetaa, gonde shuunechon sheeraanoon cikkii qayaache.
Bi gommoo yubee yongoonaa yuppuppoonochi daggoochiye;
quboo bi baateexi quttoone.
4Biyoo baharoon noggeꞌi bi shuuqqemmoyich tuniihe;
woce aacinaꞌonoo shuuꞌiihe.
Bashaaninaa Qermeloosinooch beeti mocoonaa mixona shuuqqiye;
Libanoosi beeti mocee bungoo oojjiye.
5Bi aafooch guudinaꞌo qeweheete;
geppeenaꞌoo muujjiyeete;
bi aafooch showoo shuuriye;
showoonaa showee toommooch beeto bullina qewehe.
6Bi kaaree aafooch neexoon hakkemmo konine?
Qaaqqoo gaamoommon gaamiibeeti bi kaaroon hakkemmo konine?
Bi kaaree shiixxoo qaaqqoo kindoommon kindiye;
bi aafooch xaqqee guudo tiishee yiikkeehe.
7Doono Yeeri deꞌoone;
duꞌee aabooboo shoobi xaaꞌoone;
biin gibenee beetinaꞌon shiimee yechii beetone.
8Guubbiibeeti ambamboochoommon,
bi etteenaꞌon ciroona aalliyemmone;
bi etteenaꞌon maash daachiyemmone.
9Doono Yeeri toommooch ittoshi koceebeeto amooniye?
Biyoo ittoshin ciroona aalliyemmone;
wochinnoon bi toommooch timon hakkemmo koniyoona aalloone.
10Biinnaa biinna wutireeti angixonaa maayi tulloonochoommon,
qaaqqoo ittoshin michi aalliyemmone.
11Hini Nanawi asheenaꞌote, Doono Yeeri toommooch koceebeeto, gondoon boyeebeetoo, ittoshi daggoochee kechemmone. 12Doono Yeeri bi asheenaꞌoyich ishichiye: “Asooreenaꞌo dofeenaꞌonaa giidechinaꞌona boonoshi tunetaanoona, wuxaa aallemminaꞌone. Ta asheenaꞌote, ittoshin woddoo duꞌiito taane; illa ebiyee damba ittoshin duꞌiyaachemmo taane. 13And illa boonoshi waanjoon ittoshi toommoochee kindiiree tiichemmo taane; ittoshi qoqqaannoon tiichemmo taane” iye.
14Doono Yeeri Asooreenaꞌochon ishichitone: “Boonoshi shigoon ceekkiyemmi shiijjeroo boonoshich daneyaachemmone; qiicaa shuuneetonaa xuuroochee wociitaa shuuneetona tuneti, nuggishoochi misiloon, boonoshi nuggisheenaꞌo kexoochee aalliyemmo taane. Beeyi bedaaneenaꞌo boonoshi tunetoyich, maashoon boonoshich qanniibeeto taane” itone.
15Illa ebiyoche, mishiraachoon gettecho, diggee woroonoo awaajjecho, guudi toommooch shaggitone; Yihudee asheenaꞌote, baaroon baaribote; ittoshi mookketon Yeerich imbote. Gonde asheenaꞌo ciroona hidaa aalletinaꞌone; illa ittoshi showoon kocha wochinnoon waataachemminaꞌone.#Isi. 40:9; 52:7
Currently Selected:
Naahoomi 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
