Mikiyaasi 6
6
Doono Yeeri Israꞌeeleenaꞌon Taggo
1Doono Yeeri yaaqqiibeeti taggoon waayebote!
Doono Yeero, tiyiree ne taggoon yaaꞌe; geppeenaꞌo ne qaaroon waayebeete.
2Guudinaꞌote, bulli aaboon manjiꞌi beeti showee koteenaꞌote, Doono Yeeri taggeebeeti taggoon waayebote! Doono Yeeri bi asheenaꞌona tookkii gajjitee beetone; Israꞌeeleenaꞌonoo taggee beetone.
3Doono Yeeri ishichiye: “Ta asheenaꞌote, ittoshich amooniye ta hallito? Amoonane ittoshin ta taahiito? Eke wochibote! 4Gibitsee ittoshin kichiyoye; guuchittinoochee ittoshin biishehoye; Muusi, Harooninaa Miiriyamina ittoshi aafooch shiichemmoyich tuniihoye.#Key. 4:10-16; 12:50-51; 15:20-21 5Ta asheenaꞌote, Moꞌabee taatoo Balaaqi ittoshi qaabbechinaꞌo toommooch bi gabiti mooyon, wotta Beꞌoori bushoo Balaami ama iꞌi biich bi wochito gaata shalligibote. Shixiimi kaamboochee tiijjiꞌi Galigal beddaahaa tuneti mooyon shalligibote. Ebin shalligoona ittoshin wodiyoyich ta tuniiti mooyon xiishemmo ittoshine” iye.#Had. 22:2–24:25; Yaas. 3:1–4:19
Doono Yeeri Bi Asheenaꞌo Waanee Qaawiibeeti Mooyo
6Amoon yeshi shimaajji Nuggishoo Doono Yeeri aafooch hamiree, biich goyinnebot? Micciibeeti deejjoyich, ikke nati bariyeenaꞌon yeshiree bi aafooch giddebote? 7Doono Yeeri hume bagee baaddoon woyee aashire hume woce aacoommi zayitoon ta giddiitaa ebina emirehe? Ta xuꞌoonaa ta axaaxoonoyich deejjoyich ta gutenee bushoon giddiibote?
8Ashoocho, Doono Yeeri gaaweto tuneti mooyon gettitone! Doono Yeeri ne waanee bi qaawiibeeto, dayinnetoon ne dabiyaachemmoyich, shoodecho ne tunemmoyich, ne qelloon giishiiree ne Nuggishoona tookki ne beeyemmoyichiye.
9Ariyechi asho Doono Yeerin shattii beetone; Doono Yeeri Yerusaalemi asheenaꞌon ceeggiꞌi ishichiye: “Katemooch kiceeti iiteenaꞌote, waayebote! 10Gonde asheenaꞌo kexooch beeti, dawushoona kiceeti gaannoon, uppeto tuneti koote qeellee qiiceenaꞌonoo battehote? 11Qiicoon bi kemmiibeeti qeellee qiicoona woyee machoona dawushiibeeti ashoon maarehote? 12Ittoshi daggooch beeti gaannechinaꞌo girechinaꞌon xuqqii beetinaꞌone; ittoshi bulliyona kootee kexo ittoshine. 13Illa ebi ittoshi axaaxee naboona ittoshin naxoonaa aalliyonoyich tiyeto taane. 14Maayoon maayemmo ittoshine; tunebaani miyaachemmo ittoshine; ittoshi shaacoo tooꞌaachemmone. Kicemmo ittoshine; tunebaani ittoshi kiciton wodiyoon hakkaachemmo ittoshine; ettoon daachiiree, ittoshi kotiiton bi aalliyemmoyich tuniyemmo taane. 15Yaroon shookkemmo ittoshine; tunebaani maayoon maci giijjaachemmo ittoshine. Zayitee michi aafoochee zayitoon hiiccemmo ittoshine; tunebaani ittoshi achooch huuteyaachemmo ittoshine. Woyinoon hiiccemmo ittoshine; tunebaani woyinee uyoon uyaachemmo ittoshine. 16Ebiyoo, taatoo Omiri, bi bushoo Akaabinaa bi yareenaꞌonochi qociyoon dabboona boonoshi shuunetoommi axaaxoon ittoshi shuunetoyichiye. Boonoshi dojjiti doyoon yechito ittoshine. Ebich ittoshin aalliyemmo taane; cooniishoo gettemmo taane. Aagetee asho bulli ittoshin hoxemmone” iye.#1 Taat. 16:23-34; 21:25-26
Currently Selected:
Mikiyaasi 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
