Mikiyaasi 3
3
Mikiyaasi Israꞌeelee Iraasheenaꞌon Ittibato
1Aroochee tawoo ishichiyoye: “Haanoshite, Yaaqobi asheenaꞌochi ukkireenaꞌote, Israꞌeeleenaꞌochi iraasheenaꞌote, elle waayebote: Dayinnetoyich aaxxiya bedaachote? 2Ittoshiyoo deꞌoon shixxiichii gondoon shunniyote; ta asheenaꞌochi gooqqoon gaxxiyote; boonoshi meenon shaawushoochee maaccii kichiyote. 3Ta asheenaꞌochi meenon maahote; boonoshi gooqqoon gaxxii, boonoshi shaawushoon tiichii buricciꞌi qondooch kiijjeyemmi meenochoommon qecciqeccaayiyote. 4Ittoshiyoo Doono Yeer waan ittoshi cookemmi yemeeno woyemmone. Tunebaani bi ittoshi cookoon waayeyaachemmone; gonde shuunoon ittoshi shuunetoyich, bi ittoshi waanee bi aafoon bara wochemmone” iyoye.
5Doono Yeeri bi asheenaꞌon muriciibeeti keemechinaꞌochon ishichiye: “Boonoshich maayoon maanjiti ashich, ‘Mooyo diggoone’ getona gibenikkiyeete; boonoshich maanjaani ashi toommooch ginoon awaajjiyeete. 6Ebich, yaaꞌoo boonoshich bekkeyaachemmi xumo, mooyo boonoshich gaxxeyaachemmi manderoo woyemmone. Ebi keemechinaꞌoyich aabo giyemmone; showoo shitirippimi manderemmone” iye. 7Doono Yeeri boonoshich mooyon gaxxaachemmo bi tunetoyich, yaaꞌechinaꞌo giishemminaꞌone; keemoon keemmechinaꞌoo yeellemminaꞌone. Boonoshi bulliyoo boonoshi noonoon uppemminaꞌone.
8Tunebaani ta, Israꞌeeleenaꞌoyich boonoshi xuꞌoonaa axaaxoonon ta gettemmoyich, Doono Yeeri bi Ayaanoon, giidoon, dayinnetoonaa hakkoonon taach immitone. 9Dayinnetoon shixxiibeeti, kaame mooyo bullin xummiibeeti, hini Yaaqobi asheenaꞌochi ukkireenaꞌote, Israꞌeeleenaꞌochi iraasheenaꞌote, ebin elle waayebote. 10Ittoshi, damoon ukkoona Tsiyoonin, xuꞌee shuunoonoo Yerusaalemin shuuneebeeto ittoshine. 11Ebi katemee ukkireenaꞌo nalliibeeto xuccoon mamonane; qeesheenaꞌo gijjoon deꞌaanoon dojjaacheete; keemechinaꞌo boonoshi keemmiibeeto gijjoonane. Ebin tuniibee, “Doono Yeeri noonna tookkii beetaache? Gonde mooyo amolla no toommooch shagaachemmone” iibee Doono Yeerin gibeneheete. 12Ebich, ittoshi naboona Tsiyooni budo gocheyoommon gocheyemmine; Yerusaalemiyoo xaqqee gutoon tunemmine. Yaafee kexo beeti geppoochoo kubbo collemmone.#Erim. 26:18
Currently Selected:
Mikiyaasi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
