Mikiyaasi 1
1
1Yihudee taateenaꞌo, eboshiyoo Yotaami, Akaazinaa Hiziqiyaasinochi taatee yemeenooba, Moresheti gafee asho tuneti Mikiyaasich waati Doono Yeerichi qaaro, Shamaarinaa Yerusaalemichonon bi beeggiti yaaꞌoo:#2 Taat. 15:32–16:20; 18:1–20:21; 2 Kiin. 27:1-7; 28:1–32:33
Shamaarinaa Yerusaalemina Tiishemminaꞌo Tuno
2Haanoshite, aageteenaꞌote, ebin waayebote!
Showoonaa bi daggooch beetinaꞌonote, ebin ellebote!
Yeeri yaafe bi kexooch beechii,
Nuggishoo Doono Yeeri ittoshi toommooch miixee beetone.
3Illa ebiyoche, Doono Yeeri bi beeyi xaaꞌoochee waa beetone;
kindiree guudi toommona shaaddemmone.
4Gippoo qaaqqoona wocoommon,
guudinaꞌo bi baataa woccemminaꞌone;
aaco geppoochee dugilla wocoommon,
dugilla wociree bambooch giyemminaꞌone.
5Ebi bullichi naboo, Israꞌeeleenaꞌo shuuneti axaaxoonaa hukkoonane. Israꞌeeleenaꞌo shuuneti hukkoyich echeyemmo konine? Shamaari katemoo toone? Yihudee asheenaꞌo shahalloyich goyinnoona axaaxoon boonoshi shuunemmoyich tuniito konine? Yerusaalem toone?
6Ebich Doono Yeeri ishichiye: “Shamaarin xalle gaddooch beeti xaqqee gutoon tuniyemmo taane; woyino becheebeeti xaaꞌoon tunemmone. Bi xaqqeenaꞌon bambooch gederikkemmo taane; dechi bi hecoonoo happemmo taane. 7Bi shahalleenaꞌo tiisheree buricemminaꞌone. Bi yaafee kechi yahechinaꞌoyich qocheti qiiceenaꞌo bulli qaaqqoona michaa aallemminaꞌone. Shahalleenaꞌochi misileenaꞌo bullin aalliyemmo taane. Shamaaree asheenaꞌo ebi misileenaꞌo bullin boonoshi kicito yahechinaꞌoyich qocoo qocenane; boonoshi etteenaꞌo keci daamiree yahechinaꞌoyich bi qocceyemmoyich tuniyemminaꞌone” iye.
8Ebich shooshaa eeppaabeeto taane; ta muushenetoyich shokke qeddoon, baade baatoonoo tuneto taane. Waangoochoommon, yuyechoommonoo eeppaabeeto taane. 9Shamaari wodaachemmi mayon mayetone; Yihudee showoo ebiyoommon mayeree xuuxemmone. Ta asheenaꞌo beeyi xaaꞌoo tuneti, Yerusaalem beddaahaa bedditone.
Yerusaalemin Kocha Ginee Naayinaꞌo Katino
10Ebi no toommooch shaggiibeeti mooyon Gaat beeti no etteenaꞌoyich gettaahote; ciroona caage eeppaahote! Beet Leꞌafira beeti asheenaꞌote, buttooch gederebote; 11Shafiir beeti asheenaꞌo shokke qeddoon tune yeellebee kecaa hammemminaꞌone. Tsanaan beeti asheenaꞌo katemoyee maach keyon hakkaachemminaꞌone. Beet Etseli katemoo eeppi toommooch bi beetoyich, ittoshi dege wodemmi xaaꞌoo arooch daneyaachemmone. 12Doono Yeeri gonde mooyon Yerusaalemi kellooch beddaahaa bi deebitoyich, Maarooti gafee asheenaꞌo kashe wotteya maaceree beetinaꞌone. 13Lakishi katemee asheenaꞌote, ittoshi gaarinaꞌochi haresheenaꞌon xandibote! Israꞌeeleenaꞌo shuunetoommi gondoon shuuneto ittoshine; Yerusaalemi asheenaꞌo shuunemmoyichoo tuniito ittoshine. 14Yihudee asheenaꞌote, illa Moreshet Gaati asheenaꞌoyich magaayoon imi daachiibote. Akiziibi katemee asheenaꞌo Israꞌeelee taateenaꞌo gibenetoommon tuneyaaneenaꞌone. 15Mareshi katemee asheenaꞌote, Doono Yeeri ittoshi showoon koyi yechemmi ettoyich ittoshin beshiiree immemmone. Aricheti Israꞌeeleenaꞌo tuneti iraasheenaꞌo Adulaami beeti xaqqee gofooch hamiree aashemminaꞌone. 16Yihudee asheenaꞌote, ittoshi bushiisheenaꞌo kecceyemminaꞌo boonoshi tunetoyich, ebi ittoshi shuni bushiisheenaꞌoyich eefoyich ittoshi qelloon maachebote; xooroochoommon ittoshi qelloon hulloo tuniibote!
Currently Selected:
Mikiyaasi 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
