Maatiyoosi Gimo
Gimo
Maatiyoosi Kooriti Mishiraachoo nooch bi gettiibeeto, meeti yemeenoyee aaf Ayihudeenaꞌonaa Aageteenaꞌo bullinon wodiyoyich, “Woyemmone” getaa quyeeti Kiristoosichi mishiraachooniye. Hini macaafoon koorito, “Yesuusichi aaraa gutte dabbeenaꞌo daggoochee ikkoo tuneti Maatiyoosine” immi gaboone beeto. Bi kooreeti yemeenoo Roomi ginechinaꞌo Yerusaalem beeti yaafee kexon boonoshi happoyee shiichiꞌiniye; ebi geto 63 Maaree Natoobane.
Maariqoosinaa Luqaasina wotta Yesuusi mooyon kooritinaꞌo boonoshi tunetaanoona, Maatiyoosichi mishiraachoo ebi boonoshi kooritoyee bariti meeti mooyon yechitone. Maatiyoosi hini macaafooch wodde xaaꞌoochaa bi gettiibeeto, Yesuusi Wonnee Wogee Macaafoochaa “Woyemmone” getaa gibeneeti Kiristoosi bi tunooniye. Ebi are Wonnee Wogee Macaafooch kooreeti mooyinaꞌoochee meeti mooyon hini macaafooch kooritone; aree daggoochee beshoon wochii wochii bi koorito, “Shimaajji taatittine” ii beetoniye; ebiichee tiyitona meeti asheenaꞌo “Hini mishiraachoon bi koorito, Ayihudeenaꞌoyichiye” ii gabii beetinaꞌone.
Maatiyoosi gettiibeeto, Kiristoosi Yeerichi sheeroon no shalligemmoyich noon gaacheebeeto, wotta shimaajji taatittine amoommi gaata asheenaꞌoyich gettiibeeti, aricheti dojjecho bi tunooniye. Kiristoosi dojjiti dojjoochee beshoon arichetinaꞌo: Geppee toommoochaa bi dojjiti dojjoo (5:2–7:27), bi dabbeenaꞌoyich bi dojjiti dojjoo (10:5-42), shaahiyoona bi dojjiti dojjoo (13:3-52), “Kiristoosin dabboo” geto ama geto gaata bi dojjiti dojjoonaa (18:1-35) yemeenee ciireechonaa woyemmi shimaajji taatittineechonon bi dojjiti dojjoonane (24:4–25:46).
Inde Moochi Sheqqo
Shiichiꞌi tuneti mooyonaa Yesuusichi qannoona (1:1–4:25)
Galiilee showooch bi shuuneti shuunoo (5:1–18:35)
Geppee toommoochaa bi dojjoo (5:1–7:29)
Gaakkechi mooyinaꞌon bi shuuno (8:1–10:42)
Shaahiyoona bi dojjoo (11:1–13:52)
Yesuusin asheenaꞌo shixonaa boonoshi daggoochee bi keyona (13:53–16:12)
Yesuusi Yeerichi Bushoo bi tuno (16:13–18:35)
Ciireexi mooyinaꞌo (19:1–28:20)
Yerusaalem bi hamo (19:1–20:34)
Oogoona Yerusaalem bi gimo (21:1-17)
Kiristoosi dojjecho bi tuno (21:18–25:46)
Nallee gabberooch bi giddo, bi qitoonaa duukkoona (26:1–27:66)
Qitoochee bi timonaa bi dabbeenaꞌon bi wochoona (28:1-20)
Currently Selected:
Maatiyoosi Gimo: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.