Milikiyaasi 3
3
1“Ebiyoche, gommon ta aafooch qanniyemmi ta wocheyechon daachiyemmo taane. Ittoshi qaawiibeeti Doono diqqoona yaafee kexooch woyemmone. Ittoshi qaatiibeeti wocheyecho waaree ittoshina tookkaa ta giyeti wogoon ittoshich awaajjemmone” iye Beshe Mawe Doono Yeeri.#Maat. 11:10; Maar. 1:2; Luqa. 7:27
2Tunebaani aroo xuuroon wociibeeti qaaqqoommo, tahoon machii xalliibeeti saamunoommo bi tunetoyich, woyemmi aaboon haaꞌiyoon hakkemmo konine? Bi bekkehoobochi neexoon hakkemmo konine?#Yoꞌeel. 2:11; Yaaꞌo. 6:17 3Biyoo birewoon wociiꞌi xalliibeeti ashichoommon kotemmone. Lewichi yareenaꞌon aachoonaa birewoonochoommon wociiree xalliyemmone. Aroochee boonoshiyoo boonoshi giddiiya bede tate deejjoon Doono Yeerich giddiyemminaꞌone. 4Doono Yeeriyoo wonnee yemeenoonaa aafi natinaꞌonochoommon Yihudee asheenaꞌonaa Yerusaalemi asheenaꞌonochi deejjoona emiremmone.
5“Ittoshi toommooch nalliya, ittoshi waan woyemmo taane; iicechinaꞌochi, shunimaayeenaꞌochi, kootoon wogee beetinaꞌochi, shuunechinaꞌochi shumaayoon bajjii beetinaꞌochi, xuumeenaꞌonaa nihaalleenaꞌonon xuqqii beetinaꞌochi, shiqqoon shiqqii beetinaꞌonaa taan shataaneenaꞌonochi toommooch nallemmo taane” iye Beshe Mawe Doono Yeeri.
Asraatoon Doono Yeerich Kichoo
6Beshe Mawe Doono Yeeri ishichiye: “Doono Yeeri ta, shaddeyaachemmo taane. Yaaqobichi yareenaꞌote, ebich aalleyaano ittoshine. 7Ittoshi qaabbechinaꞌochi yemeenoochee tiijjiꞌi ta sheeroochee ikito ittoshine. Aroonoo quyeyaano ittoshine. Ta waan wottebote; tawoo ittoshi waan wottemmo taane.
“Tunebaani ittoshi ‘No wottemmo aabichireeshiye?’ ito ittoshine.
8“Asho Yeerin gaajjiibeetone? Tunebaani ittoshi taan gaajjito ittoshine.
“Ittoshiyoo ‘Aabichireeshiye neen no gaajjemmo?’ ito ittoshine.
“Taan ittoshi gaajjito, asraatoonaa wojjoonon taach giddiyee qayonane. 9Israꞌeelee asho ittoshi bulliyona taan gaajjiibeeto ittoshi tunetoyich uppeto ittoshine. 10Ta kexooch bede maayo bi beeyemmoyich, asraatoon ceenoona gotooch giijjibote. Shimaajji mallee kelloon qechaꞌa beddii echeti diiroon ittoshich ukkoon ta qayigaata, ebina taan beegote.#Lew. 27:30; Had. 18:21-24; Yibba. 14:22-29; Neh. 13:12 11Ittoshi maayoon kashingixeenaꞌo#3:11 Kashingixeenaꞌo, biittiibeeti gishiishi cooxinaꞌone. aalliyemmoyich tuniyaachemmo taane. Ittoshi goyeexi woyinee qomboo gaawichiree aafemmone. 12Ebiyee bekk ittoshi showoo emiree showoo tunemmo bi tunetoyich, aageteenaꞌo bulli ittoshin diireetinaꞌo geti ceeggemminaꞌone” iye Beshe Mawe Doono Yeeri.
Israꞌeeleenaꞌoyich Yeeri Ariqqemmo Tuno
13Doono Yeeri ishichiye: “Ta toommooch kupphe yibbaatoon yibbaateto ittoshine.
“Tunebaani ittoshi ‘Ne toommooch ama iyaꞌa yibbaatehone?’ ito ittoshine.
14“Ta toommooch ittoshi yibbaateto, ‘Doono Yeerich maddoo gaacaalloone; bi getoon waayo woyee no axaaxoyich Beshe Mawe Doono Yeeri aafooch muusheneꞌi shaꞌo amoon nooch gaaccehe? 15Illa and, geecechinaꞌo diireetinaꞌone; gonde shuunechinaꞌoyich mooyo kaamee beetone; Doono Yeerin phiree beetinaꞌo muriccii beetinaꞌone’ ito ittoshine” iye.
16Ebiyooba Doono Yeerin shattii beetinaꞌo boonoshinaa boonoshina yibbaateheete; Doono Yeeriyoo elleꞌi, boonoshi yibbaatoon waayehe. Doono Yeerin shattii beetinaꞌo, bi shigoonoo oogii beetinaꞌo shalligeyemmi macaafo bi aafoochaa kooreehe.
17Beshe Mawe Doono Yeeri ishichiye: “Ta shuunemmi aabooba boonoshi ta hajjee asheenaꞌo tunemminaꞌone. Asho biich maddeebeeti bi bushoyich bi ariqqoommon tawoo boonoshich ariqqemmo taane. 18Ebiyooba cadiqoonaa axaaxechonochi, Doono Yeeri taach maddeebeetonaa maddaanoonochi daggooch beeti barbarittinoon beeggemmo ittoshine” iye.
Currently Selected:
Milikiyaasi 3: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
