Leweenaꞌo 6
6
1Doono Yeeri Muusich ishichiye: 2“Ikke asho bi waan koteti aderoon mamona woyee biich yechiyoo icheti qiicoon nookkeꞌi biinoommi bi manoon dawushoona Doono Yeeri ta toommooch axaaxoon bi shuunegaata woyee biinoommi bi manoon bi bogigaata woyee bi dawushigaata, 3woyee aalleti qiicoon danee aachiichii kootoon bi wogegaata, asheenaꞌo tuniibeeti mooyoochee ikkoon tuniyoona bi xuꞌigaata, 4axaaxoon shuunoona xuꞌecho bi tunegaata, boggii bi deqqiton, dawushii bi deqqiton woyee adero bi maaton, aalletaa bi daneti qiicoon, 5woyee kootoon wogeꞌi bi deqqiti qiico aabinona wochibe. Xuꞌee deejjoon bi giddiihooba, ebi qiico bullin, wotta bi toommooch qiicee uuche kishoochee ikkoon daakkiree, qiicee doonoyich wochibe. 6Bi gijjoochee bachaalli bagee baaddoon xuꞌee deejjoon tunii Doono Yeeri taach imiree, qeeshoo waan deebe; bi gatiyoo machoona qoccetoommon tunebe. 7Qeeshoo Doono Yeeri ta aafooch deejjoon bi giddiitaa, uro bi xuqqiti xuꞌo amoyichona maaroon danemmone” iye.#Had. 5:5-8
Micciibeeti Deejjoon Giddiyoo
8Doono Yeeri Muusich ishichiye: 9“Harooninaa bi anaami bushiishoonoyich ishichi gete: ‘Micciibeeti deejjoon giddiyee qocoo ebine: Micciibeeti deejjoo xumo bullin harimmi wottoon, deejjee gudee toommooch beeti gudee xaaꞌooch beebe. Qaaqqoo deejjee gudee toommooch tahaanoon aaxxebe. 10Qeeshoo muttee tuppoochee shippeti qamisoonaa shuroonon tahe eddebe. Aroochee ebi deejjee gudee toommoochaa qaaqqooch gokketi deejjeechi tulloon ushiree deejjee gudee gaꞌooch gede. 11Ebi bi taheti tahoon shootiree bare tahoon tahebe. Tulloon shaagi kaamboochee kichiree yaafe xaaꞌooch daambe. 12Deejjee gudee toommooch beeti qaaqqoo kuxeyaanoon aaxxe beebe; ciroona tahaaye. Qeeshoo maaddi maaddoona mixon are qaaqqooch shoohe; ebi qaaqqee toommooch micciibeeti deejjoon qanniibe; ikkittinee deejjee awuyon ebi aroochaa goge. 13Qaaqqoo kuxeyaanoon deejjee gudee toommooch aaxxe beebe; ciroona tahaaye.
Maayi Buuroon Giddiyoo
14“ ‘Maayi buuroon giddiyee qocoo ebine: Harooni anaami bushiisheenaꞌo maayi buuroon deejjee gudee ciinooch, Doono Yeeri ta aafooch giddiibeete. 15Qeeshoo qacini buddinoonaa zayitoonoochee ixaano bullina tookki ikke ushon tiijjibe; Doono Yeeri taach gaawe cinnoon cinneebeeti deejjoon tuniiree shalligichoyich deejjee gudee toommoochaa michibe. 16Echeton Harooninaa bi anaami bushiishoona mameete; shittoo giyaanoon kachiti koshon yaafoo tuneti xaaꞌoochaa, danee duukkaanee addibaaboochaa mameete. 17Ebi kosho shittoo gedaa kachaaye; tawoo ebin qaaqqooch michaa taach giddeebeeti buuroochee boonoshi qoodoo tuniyaꞌa immeto taane. Ebiyoo axaaxee deejjoonaa xuꞌee deejjoonochoommon oogeti yaafeeti mooyone. 18Doono Yeeri taach qaaqqoona micciibeeti buuroochee, gubbi boonoshi shiijjeroo bullich icheti qoodoo bi tunetoyich, Harooni yaroochee shiijjeti anaamo bulli ebi aroochee mame. Ebi buuro yaafoo bi tunoochee tiyitona bi achooch shaggimmo bi toommooch magge mooyo kindemmone’ gete” iye.
19Doono Yeeri Muusich ishichiye: 20“Harooni tuneba bi anaami bushiishoochee ikkoo zayito bi shimbooch ukkeehooba, Doono Yeeri taach bi giddiyemmo ebiniye: Bulli aaboon giddeebeeti maayi buuroyich giddee beetoommon tuniiree, gutte kobbaye qacini buddinoon, qaton maaddoona, wotta qaton womikka giddiibe. 21Zayitoona xiriꞌaa midaadooch kachito tunebe. Ebi maayi buuro buricaa Doono Yeeri taach gaawe cinnechi deejjoon tuniitaa giddebe. 22Harooni anaami bushiisheenaꞌo daggoochee qeeshoo tuneree biin keriya huutteto ebin giddiibe. Ebiyoo bulli yemeenoon Doono Yeeri taach doyoon tuneree bi beeyemmoyich bullin michibe. 23Qeeshoo giddiibeeti maayi buuro bulla ikkot micishalli bi gettemmo, aroochee ciroona manjeyaachemmone” iye.
Axaaxoyich Giddeebeeti Deejjoo
24Doono Yeeri Muusich ishichiye: 25“Harooninaa bi anaami bushiishoonoyich ishichi gete: ‘Axaaxee deejjoon giddiyee qocoo ebine: Micciibeeti deejjoyich giddeebeeti gijjoo guureebeeti xaaꞌoochaa axaaxee deejjoyich giddeebeeti gijjoo Doono Yeeri ta aafooch aroochaa guureebe. Ebi deejjoo oogeti yaafoone. 26Ebi deejjoon giddiibeeti qeeshoo deejjeeti gijjoochi meenon maayemmone. Yaafoo tuneti xaaꞌoochaa, danee duukkaanee addibaaboochaa manjebe. 27Ebi meechi achooch shaggimmi asho tuneba amee mooyolla bi toommooch magge mooyo kindemmone. Bi damoo tahooch bi wucee gaata, yaafoo tuneti xaaꞌooch daamaa machebe. 28Meeno kiicheti qondoo tiichebe. Xuuroochee shuuneeti qiico bi tunegaata gaawichi mayaa aacona qeqqicheebe. 29Qeesheenaꞌo yaroochee tuneti anaamo bulli aroochee maayemmone; ebiyoo oogeti yaafoone. 30Tunebaani axaaxoon maariyoyicha getaa, danee duukkaanooch beeti Yaafe Xaaꞌooch bi damoo giyiti, axaaxoyich deejjeeti gijjee meeno qaaqqooch gokkeshalli bi gettemmo, ciroona manjeyaachemmone.
Currently Selected:
Leweenaꞌo 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
